ជាតិ
សម្តេច ស ខេង និយាយថាត្រូវតែលុបបំបាត់បទល្មើសនេសាទឲ្យបាន ជាដាច់ខាត
×
ភ្នំពេញ៖ សម្តេច ស ខេង រដ្ឋមន្ត្រីក្រសួងមហាផ្ទៃ បានចេញបញ្ជាសារជាថ្មីឲ្យមន្ត្រីមានសមត្ថកិច្ចបង្កើនការបង្ក្រាប និងលុបបំបាត់បទល្មើសនេសាទ នៅកម្ពុជា ឲ្យមានប្រសិទ្ធភាពជាដាច់ខាត។
សម្តេចក្រឡាហោមមានប្រសាសន៍បែបនេះនៅក្នុងកិច្ចប្រជុំបូកសរុបលទ្ធផលអនុវត្តន៍ច្បាប់ចរាចរណ៍ផ្លូវគោកថ្មី ឆ្នាំ២០១៦ និងទិសដៅការងារឆ្នាំ២០១៧ នៅថ្ងៃទី២ ខែមករាកន្លងទៅ។ សម្តេច ស ខេង បានបញ្ជាក់ថា សម្តេច គឺជាអ្នកដឹកនាំការងារទាំងនេះដោយផ្ទាល់ឲ្យបានជោគជ័យ។
«បើយើងមិនដោះស្រាយទេ បញ្ហានឹងកើនឡើងថែមទៀត...។ ខ្ញុំនិយាយហើយ ខ្ញុំត្រូវធ្វើហើយ គឺខ្ញុំអត់និយាយច្រើនទេ»។ សម្តេច ស ខេង បានបញ្ជាឲ្យគណបញ្ជាការឯកភាពរាជធានី ខេត្តប្រជុំ ពិនិត្យការងារគ្រប់គ្រងនេសាទប្រចាំសប្តាហ៍ ឬប្រចាំខែឲ្យទៀងទាត់រួចចុះដោះស្រាយបញ្ហាផ្ទាល់។
ត្រីជាប្រភពប្រូតេអ៊ីនដ៏សំខាន់ក្នុងអាហារសម្រាប់ពលរដ្ឋកម្ពុជាដែលបច្ចុប្បន្នមានចំនួនប្រហែល១៥លាននាក់។
ក្រៅពីបញ្ហាបទល្មើសនេសាទនេះ ដែលសម្តេច ស ខេង បានបញ្ជាឲ្យមន្ត្រីចុះរឹតបន្តឹងការអនុវត្តច្បាប់ចរាចរណ៍ ពង្រឹងគោលនយោបាយភូមិ ឃុំមានសុវត្ថិភាព និងបញ្ហាប្រឈមរបស់ពលរដ្ឋផ្សេងៗទៀត។
ប៉ុន្តែ លោក មាស នី អ្នកស្រាវជ្រាវសង្គមម្នាក់ និយាយថា គេលំបាកនឹងមានជំនឿថាបញ្ហាដដែលៗខាងលើនឹង ត្រូវបានដោះស្រាយណាស់ បើអាជ្ញាធរមិនអនុវត្តតាមច្បាប់ឲ្យបានម៉ឺងម៉ាត់និងមានប្រសិទ្ធភាព។ បញ្ហាប្រព័ន្ធយុត្តិធម៌ តុលាការ និងសុខាភិបាល ក៏សុទ្ធតែជាបញ្ហាអាទិភាពសម្រាប់ជីវភាពរស់នៅរបស់ ពលរដ្ឋនៅតាមមូលដ្ឋាន ដែលទាមទារការយកចិត្តទុកដាក់ខ្ពស់របស់អ្នកដឹកនាំ និងអាជ្ញាធរមូលដ្ឋានដោះស្រាយជូនពួកគេដែរ តាមរយៈការអនុវត្តច្បាប់ឲ្យបានម៉ឺងម៉ាត់៕
Tag:
ស ខេង
មាស នី
មន្ត្រី
© រក្សាសិទ្ធិដោយ thmeythmey.com