អន្តរជាតិ
ហ្វាំងឡង់៖ អ្នកអត់ការងារធ្វើ នឹងបានបៀវត្សមូលដ្ឋាន៥៨៦ដុល្លារក្នុងមួយខែ
× សាធារណរដ្ឋហ្វាំងឡង់ ត្រូវបានគេចាត់ទុកជាប្រទេសដែលមានជីវភាពរស់នៅកម្រិតខ្ពស់មួយ ដោយប្រជាជនទទួលបានសេវាឥតគិតថ្លៃយ៉ាងច្រើនពីរដ្ឋាភិបាល។ បន្ថែមពីលើនេះ ហ្វាំងឡង់ នឹងក្លាយជាប្រទេសដំបូងគេលើពិភពលោក ដែលនឹងផ្ដល់ប្រាក់ចំណូលមូលដ្ឋានសម្រាប់អ្នកអត់ការងារធ្វើមកពីវិស័យផ្សេងគ្នា។ គម្រោងផ្ដល់ប្រាក់ចំណូលថ្នាក់ជាតិនេះ ជាពិសោធន៍មួយសំដៅកាត់បន្ថយភាពក្រីក្រ, ជំរុញឲ្យប្រជាជនចូលធ្វើការ ដើម្បីកាត់បន្ថយអត្រាអ្នកអត់ការងារធ្វើនៅក្នុងប្រទេសផងដែរ។
ប្រជាជនហ្វាំងឡង់២០០០នាក់ ដែលអត់ការងារធ្វើ និងមានអាយុចន្លោះ២៥ឆ្នាំ ទៅ២៨ឆ្នាំ នឹងត្រូវបានជ្រើសរើសឲ្យចូលរួមក្នុងពិសោធន៍មួយ។ ក្នុងពិសោធន៍ដែលត្រូវធ្វើរយៈពេល២ឆ្នាំ អ្នកអត់ការងារធ្វើទាំងនោះ នឹងទទួលបានប្រាក់ចំណូលប្រចាំខែចំនួន៥៨៦ដុល្លារ ដោយមិនគិតពន្ធ និងគ្មានលក្ខខណ្ឌអ្វីឡើយ។ ប្រាក់ចំណូលប្រចាំខែថ្មី នឹងត្រូវផ្ដល់ជំនួសផលប្រយោជន៍សង្គមផ្សេងទៀតដែលរដ្ឋកំពុងផ្ដល់ជូន និងត្រូវផ្ដល់ឲ្យរហូត បើទោះជាពួកគេមានការងារក៏ដោយ។
បើតាមសារព័ត៌មាន The Guardian វិទ្យាស្ថានធានារ៉ាប់រងសង្គម (KELA) ដែលទទួលបន្ទុកលើគម្រោងនេះ និយាយថា ពិសោធន៍សាកល្បងនេះ មានគោលដៅកាត់បន្ថយដំណើរការស្មុគស្មាញនៃការិយាធិបតេយ្យ និងជាងនេះទៅទៀត គឺការកាត់បន្ថយអត្រាអ្នកអត់ការងារធ្វើតែម្ដង ព្រោះអត្រាអត់ការងារធ្វើនៅប្រទេសនេះមានកម្រិត៩.៤ភាគរយ។ នេះក៏ព្រោះតែប្រព័ន្ធធានារ៉ាប់រងសង្គមបច្ចុប្បន្ន មិនបានជំរុញឲ្យអ្នកអត់ការងារ រកការងារឡើយ ដ្បិតពួកគេទទួលបានសេវាច្រើនពីរដ្ឋាភិបាល។
ផែនការថ្មីដែលបានចាប់ផ្ដើមពីថ្ងៃទី១ ខែមករា ឆ្នាំ២០១៧ នឹងជំរុញឲ្យប្រជាជនអត់ការងារធ្វើទាំងឡាយ ព្យាយាមរកមុខរបរចិញ្ចឹមជីវិតដោយមិនចាំបាច់ទទួលប្រាក់ឧបត្ថម្ភពីរដ្ឋាភិបាលឡើយ ដ្បិតនៅពេលត្រូវបានជ្រើសរើសឲ្យចូលរួមក្នុងការពិសោធនេះ ពួកគេ មិនអាចទទួលបានអត្ថប្រយោជន៍សង្គមបានដូចមុនឡើយ។ ម្យ៉ាងទៀត ការភ័យខ្លាចបាត់បង់អត្ថប្រយោជន៍សង្គមនេះ នឹងនាំឲ្យពួកគេរកការងារដោយប្រិតប្រៀនផងដែរ។
នរណាក៏ដឹងដែរថា ហ្វាំងឡង់ ជាប្រទេសមានសេដ្ឋកិច្ចរីកចម្រើន និងបានផ្ដល់សេវាមូលដ្ឋានឥតគិតថ្លៃយ៉ាងច្រើនដល់ប្រជាជនរបស់ខ្លួន រាប់ទាំងសេវាកម្មសុខាភិបាល ប្រាក់ឧបត្ថម្ភប្រចាំខែ និងការអប់រំជាដើម។ យ៉ាងណាមិញ គុណវិបត្តិនៃអត្ថប្រយោជន៍ទាំងនេះ គឺប្រជាជនអត់ការងារធ្វើជាច្រើន មិនចង់រកការងារធ្វើ ឬរើសការងារទៀតផង ដ្បិតបើទោះជាអត់ការងារ ក៏មានរដ្ឋចិញ្ចឹមដែរ ដែលរឿងនេះហើយទើបធ្វើឲ្យអត្រាអត់ការងារ កើនឡើងខ្លាំង។
មួយវិញទៀតនោះ គម្រោងប្រាក់ខែមូលដ្ឋានសម្រាប់អ្នកអត់ការងារធ្វើនេះ កំពុងត្រូវបានការចាប់អារម្មណ៍យ៉ាងច្រើន។ ប្រជាជននៅអឺរ៉ុបភាគច្រើន ចង់បានគម្រោងរបៀបនេះសម្រាប់អ្នកអត់ការងារធ្វើ។ សម្រាប់ហ្វាំងឡង់ នេះគឺជាគម្រោងពិសោធន៍ថ្នាក់ជាតិ ដែលខុសពីប្រទេសអឺរ៉ុបដទៃ ដែលមានត្រឹមថ្នាក់ខេត្ត ឬក្រុងប៉ុណ្ណោះ។ រដ្ឋាភិបាលហ្វាំងឡង់ នឹងពិនិត្យមើលលទ្ធផលនៃគម្រោងនេះក្នុងឆ្នាំ២០១៩ មុននឹងសម្រេចចិត្តថា គួរបន្តគម្រោងនេះទៀតឬយ៉ាងណា៕
Tag:
អឺរ៉ុប
ហ្វាំងឡង់
ការងារ
© រក្សាសិទ្ធិដោយ thmeythmey.com