អន្តរជាតិ
អស់ពីក្រុមហ៊ុន FORD ដូណាល់ ត្រាំ គំរាមដំឡើងពន្ធនាំចូលលើក្រុមហ៊ុនឡាន GM ម្ដង
× មិនទាន់ទាំងស្បថចូលកាន់តំណែងផងនោះ ប្រធានាធិបតីជាប់ឆ្នោត ដូណាល់ ត្រាំ បានបញ្ចេញកណ្ដាប់ដៃដែក ដាក់ក្រុមហ៊ុនធំៗរបស់អាមេរិកដែលរកស៊ីនៅក្រៅប្រទេស ជាពិសេសម៉ិកស៊ិកតែម្ដង។ លោក ត្រាំ ទើបតែទទួលជោគជ័យក្នុងការបង្ខំឲ្យក្រុមហ៊ុនផលិតឡាន FORD លុបចោលគម្រោងបង្កើតរោងចក្រនៅម៉ិកស៊ិក។ ចុងក្រោយនេះ លោកក៏គំរាមក្រុមហ៊ុនឡាន General Motors (GM) ដែលកំពុងផលិតឡាននៅទឹកដីម៉ិកស៊ិកថែមទៀត។
ប្រធានាធិបតីជាប់ឆ្នោត ដូណាល់ ត្រាំ បានគំរាមដំឡើងពន្ធនាំចូលលើក្រុមហ៊ុនផលិតឡាន GM បើក្រុមហ៊ុននេះមិនព្រមបិទរោងចក្រនៅម៉ិកស៊ិក និងងាកមកបើករោងចក្រនៅទឹកដីអាមេរិកវិញទេនោះ។ លោក ត្រាំ ដែលមាននយោបាយបង្កើតការងារសម្រាប់ប្រជាជនអាមេរិក ប្រឆាំងដាច់ខាតក្រុមហ៊ុនអាមេរិកណា ដែលមានរោងចក្រនៅបរទេស ដោយអះអាងថា រោងចក្រទាំងនោះបង្កើតការងារឲ្យជនជាតិដទៃ និងជាការលួចយកការងារពីជនជាតិអាមេរិក។
ដូចសព្វដងនោះ លោក ត្រាំ បានប្រើគណនី Twitter របស់លោកដើម្បីគំរាមក្រុមហ៊ុនអាមេរិកទាំងឡាយ ដែលមិនទាន់កសាងរោងចក្ររបស់ខ្លួនលើទឹកដីអាមេរិក។ នៅថ្ងៃទី៣ ខែមករា ប្រធានាធិបតីជាប់ឆ្នោតអាមេរិករូបនេះ បានសរសេរសារគំរាមក្រុមហ៊ុនផលិតឡាន GM លើ Twitter ថា៖«General Motors កំពុងនាំចូលឡានម៉ាក Chevy Cruze ដែលផលិតនៅម៉ិកស៊ិក មកកាន់ក្រុមហ៊ុនចែកចាយបន្តនៅអាមេរិកដែលមិនគិតពន្ធ។ ផលិតនៅអាមេរិក ឬត្រូវបង់ពន្ធព្រំដែនដ៏ច្រើន!»
បើតាមសារព័ត៌មាន CNBC បន្ទាប់ពីការគំរាមរបស់លោក ត្រាំ ក្រុមហ៊ុនផលិតឡាន GM ក៏បានឆ្លើយវិញថា ឡានម៉ាក Chevy Cruze ភាគច្រើនផលិតនៅអាមេរិកផ្ទាល់ ហើយមានតែបរិមាណតិចតួចប៉ុណ្ណោះ ដែលផលិតនៅម៉ិកស៊ិក រួចនាំចូលមកលក់នៅអាមេរិក។ ក្រុមហ៊ុន GM បាននិយាយក្នុងសេចក្តីថ្លែងការណ៍របស់ខ្លួនថា ឡានម៉ាក Chevrolet Cruze sedan ផលិតនៅរដ្ឋ Ohio ឯឡានម៉ាក Chevrolet Cruze hatchback ផលិតនៅម៉ិកស៊ិកសម្រាប់ទីផ្សារពិភពលោក និងអាមេរិកខ្លះ។
ដោយសារនយោបាយរបស់លោក ត្រាំ ក្រុមហ៊ុនផលិតឡានដ៏ធំរបស់អាមេរិក FORD ទើបតែសម្រេចចិត្តលុបចោលគម្រោងសាងសង់រោងចក្រនៅម៉ិកស៊ិក។ ក្រុមហ៊ុន FORD ប្រកាសនៅថ្ងៃទី៣ ខែមករា ថា ខ្លួននឹងលុបចោលគម្រោងរោងចក្រតម្លៃ១.៦ពាន់លានដុល្លារនៅម៉ិកស៊ិក ហើយជំនួសមកវិញ ខ្លួននឹងវិនិយោគរោងចក្រថ្មីតម្លៃ៧០០លានដុល្លារនៅ Michigan វិញ។ លោក ត្រាំ បានហៅការសម្រេចចិត្តរបស់ FORD ថា ស្របគោលនយោបាយរបស់លោក។
សូមរម្លឹកដែរថា តាំងពីក្នុងយុទ្ធនាការស្វែងរកសំឡេងឆ្នោតមកម្ល៉េះ ដែលលោក ត្រាំ សន្យាបង្កើតការងារសម្រាប់ប្រជាជនអាមេរិក តាមរយៈការហៅឲ្យក្រុមហ៊ុនអាមេរិកទាំងឡាយ មករកស៊ី ឬបើករោងចក្ររបស់ខ្លួននៅអាមេរិកវិញ។ ជាមួយគោលនយោបាយគាំពារនិយមនោះ លោក ក៏ប្រកាសលុបចោលកិច្ចព្រមព្រៀងពាណិជ្ជកម្មសេរីជាច្រើនដូចជាកិច្ចព្រមព្រៀងសេរីអាមេរិកខាងជើង (NAFTA) និងកិច្ចព្រមព្រៀងអន្តរប៉ាស៊ីហ្វិក (TPP) ទៀតផង៕
Tag:
ដូណាល់ ត្រាំ
GM
FORD
អាមេរិក
© រក្សាសិទ្ធិដោយ thmeythmey.com