ឥណ្ឌូណេស៊ី ផ្អាកកិច្ចសហប្រតិបត្តការយោធាជាមួយនឹងអូស្ត្រាលី ក្រោយយោធាខ្លួនរងការប្រមាថពេលហ្វឹកហ្វឺន

អន្តរជាតិ

ឥណ្ឌូណេស៊ី ផ្អាកកិច្ចសហប្រតិបត្តការយោធាជាមួយនឹងអូស្ត្រាលី ក្រោយយោធាខ្លួនរងការប្រមាថពេលហ្វឹកហ្វឺន

04, Jan 2017 , 10:19 pm

រូបភាព

កងទ័ពឥណ្ឌូណេស៊ី

ដោយ: ថ្មីៗ

រដ្ឋាភិបាលឥណ្ឌូណេស៊ី បានប្រកាសផ្អាកកិច្ចសហប្រតិបត្តិការយោធាគ្រប់ទម្រង់ជាមួយនឹងរដ្ឋាភិបាលអូស្ត្រាលី ក្រោមហេតុផលបច្ចេកទេសលើការហ្វឹកហាត់យោធា។ ក៏ប៉ុន្តែឥណ្ឌូណេស៊ី អះអាងថា កិច្ចប្រតិបត្តិការនេះ អាចនឹងបន្តឡើងវិញនៅពេលមួយ ដែលបញ្ហាត្រូវបានដោះស្រាយរវាងរដ្ឋាភិបាលទាំងពីរ។

លោកឧត្តមសេនីយ៍ Wuryanto អ្នកនាំពាក្យកងកម្លាំងឥណ្ឌូណេស៊ី នៅថ្ងៃទី០៤ មករា បានបញ្ជាក់យ៉ាងដូច្នេះថា៖«កិច្ចសហប្រតិបត្តិការយោធាគ្រប់ទម្រង់រវាងឥណ្ឌូណេស៊ី និងអូស្ត្រាលី ត្រូវបានផ្អាកជាបណ្តោះអាសន្នតាំងពីខែធ្នូកន្លងទៅ។ មានបញ្ហាបច្ចេកទេសជាច្រើន ត្រូវពិភាក្សា ដែលបញ្ហាទាំងនោះ ក៏រាប់បញ្ចូលទាំងបញ្ហានៃការប្រើប្រាស់សម្ភារប្រមាថមួយចំនួនដែលត្រូវបានរកឃើញនៅមូលដ្ឋានយោធាអូស្ត្រាលី។ ហើយកិច្ចសហប្រតិបត្តិការ ក៏អាចនឹងបន្តនៅពេលណាមួយផងដែរនៅពេលដែលបញ្ហាបានដោះស្រាយ»។ នេះបើយោងតាមភ្នាក់ងារព័ត៌មាន Reuters។

តែបើតាមសារព័ត៌មាន The Sydney Morning Herald ដែលបានដកស្រង់ពីគេហទំព័រឥណ្ឌូណេស៊ី Kompas ហេតុផលមួយក្នុងចំណោមហេតុផលជាច្រើនផ្សេងទៀតនៃការផ្អាកកិច្ចសហប្រតិបត្តិការយោធារវាងឥណ្ឌូណេស៊ី និងអូស្ត្រាលីនោះគឺ ដោយសារតែ កងកម្លាំងពិសេសឥណ្ឌូណេស៊ី ដែលទទួលបានវគ្គហ្វឹកហ្វឺននៅអូស្ត្រាលី យល់ឃើញថាពួកគេ បានរងនូវការប្រមាថទាំងតាមរយៈសម្ភារហ្វឹកហ្វឺន និងសំណេរប៉ះពាល់ដល់មនោគមន៍មូលដ្ឋានរបស់ឥណ្ឌូណេស៊ីដែលមានឈ្មោះថា«Pancasila»។

Pancasila គឺជាមនោគមន៍វិជ្ជារដ្ឋរបស់ឥណ្ឌូណេស៊ី ដែលផ្តោតសំខាន់លើគោលការណ៍ចម្បងដូចជា សាសនា អារ្យធម៌ យុត្តិធម៌សង្គម ប្រជាធិបតេយ្យ និងការរួបរួម។

តាមពិតទៅ នេះ មិនមែនជាលើកដំបូងឡើយដែលឥណ្ឌូណេស៊ី ប្រកាសផ្អាកកិច្ចសហប្រតិបត្តិការយោធាជាមួយនឹងអូស្ត្រាលីនោះ។ នៅឆ្នាំ២០១៣កន្លងទៅ ប្រទេសទាំងពីរ ក៏ធ្លាប់មានបញ្ហាជាមួយនឹងគ្នាខ្លាំងផងដែរ ក្រោយពី ឥណ្ឌូណេស៊ី បានរកឃើញថា អូស្ត្រាលី បានធ្វើចារកម្មលើប្រធានាធីបតីឥណ្ឌូណេស៊ីនៅឆ្នាំ២០០៩នោះ៕