អន្តរជាតិ
ប្រមុខការពារជាតិថៃ បញ្ជាក់ជាថ្មី ថា ការបោះឆ្នោតនាយករដ្ឋមន្ត្រីឆ្នាំ២០១៧ មិនអាចលើកពេលឡើយ ប្រភពរូបភាព៖ Today Online
× រដ្ឋាភិបាលក្រុងបាងកក នៅថ្ងៃទី៤ មករា បានបញ្ជាក់ជាថ្មីម្តងទៀតថា ការបោះឆ្នោតសកល ឬជ្រើសរើសនាយករដ្ឋមន្ត្រី នៅតែប្រព្រឹត្តឡើងក្នុងឆ្នាំ២០១៧នេះដដែល។ សេចក្តីថ្លែងការណ៍នេះ ធ្វើឡើងបន្ទាប់ពី សមាជិកសភាថៃម្នាក់ បានលើកឡើងថា ការបោះឆ្នោតថៃ មិនអាចធ្វើទៅរួចបានឡើយ ដ្បិតមានច្បាប់ចម្រូងចម្រាសច្រើន មិនទាន់បានអនុម័ត។
ទំនងជាពាក្យសម្តីរបស់អ្នកនាំពាក្យមិនទាន់ធ្វើឲ្យរដ្ឋាភិបាលរបបសឹកថៃស្ងប់ចិត្តហើយ លោកឧបនាយករដ្ឋមន្ត្រី និងរដ្ឋមន្ត្រីការពារជាតិថៃ Prawit Wongsuwan នៅថ្ងៃទី០៤ មករា បានថ្លែងប្រាប់អ្នកព័ត៌មានដោយផ្ទាល់ពីការមិនប្រែប្រួលនៃកាលបរិច្ឆេទនៃការបោះឆ្នោត។ លោក បានបញ្ជាក់យ៉ាងដូច្នេះថា៖«យើងមិនអាចលើកពេលបានឡើយ។ វា គឺជាពេលកំណត់។ អ្វីដែលសមាជិករដ្ឋសភានិយាយ គឺរឿងរបស់គេនោះទេ»។ នេះបើយោងតាមការចុះផ្សាយរបស់ភា្នក់ងារព័ត៌មាន Reuters។
សូមរម្លឹកបន្តិចថា នៅថ្ងៃទី០២ មករាកន្លងទៅ សមាជិករដ្ឋសភាថៃលោក Somjet Boonthanom បានអះអាងថា ការបោះឆ្នោតសកលឆ្នាំនេះ នឹងត្រូវពន្យារពេលដល់ឆ្នាំក្រោយដ្បិតថៃ ត្រូវការពេលវេលាបន្ថែមដើម្បីអនុម័តច្បាប់ ខណៈប្រទេសត្រូវផ្លាស់ប្តូរពីរបបដឹកនាំដោយយោធាមកកាន់ស៊ីវិលវិញ។ តំណាងរាស្ត្ររូបនោះ បានថ្លែងប្រាប់អ្នកសារព័ត៌មានថា ការបោះឆ្នោត អាចនឹងប្រព្រឹត្តនៅខែមិនា ឬមេសាឆ្នាំ២០១៨វិញ។
លោក Somjet Boonthanom បានសង្កត់ធ្ងន់ថា៖«នេះ មិនមានដោយសារការចង់លើកពេលនោះទេ ក៏ប៉ុន្តែ ក៏ព្រោះតែ មានរឿងចម្រូងចម្រាសជាច្រើនដែលពាក់ព័ន្ធនឹងច្បាប់ស្តីពីការបោះឆ្នោត ហើយ ការបោះឆ្នោត នឹងមិនអាចកើតឡើងឆ្នាំនេះនោះទេ»។ នេះបើយោងតាមការចុះផ្សាយរបស់សារព័ត៌មាន Aljazeera។
ភ្លាមៗនេះ រដ្ឋាភិបាលក្រុងបាងកក ក៏បានបដិសេធផងដែរ។ តាមរយៈអ្នកនាំពាក្យលោក Sansern Kaewkamnerd រដ្ឋាភិបាលថៃបា នបញ្ជាក់ថា៖« យើង នៅតែធ្វើតាមមាគ៌ានៃផែនការរបស់យើង។ ហើយការលើកឡើងរបស់សមាជិករដ្ឋសភាពីការពន្យារពេលនោះ គឺគ្រាន់តែជាការយល់ឃើញរបស់គេប៉ុណ្ណោះ»។
សូមជម្រាបផងដែរថា រដ្ឋាភិបាលរបបសឹកថៃ ដែលមានលោកឧត្តមសេនីយ៍ ប្រាយុទ្ធ ចន្ទ អូចា ជាប្រមុខ បានដឹកនាំរាជាណាចក្រថៃ ក្រោយពីលោកឧត្តមសេនីយ៍ បានដឹកនាំរដ្ឋប្រហារទម្លាក់អតីតនាយករដ្ឋមន្ត្រីថៃ លោកស្រី យីងឡាក់ ស៊ីនណាវ៉ាត់ត្រា នៅថ្ងៃទី២២ ខែឧសភា ឆ្នាំ២០១៤។ ការដឹកនាំរបស់របបសឹក ធ្វើឡើងក្រោមហេតុផលថា អតីតរដ្ឋបាលរបស់លោកស្រី យីងឡាក់ ធ្វើឲ្យមានការបែងចែកនិន្នការនយោបាយរវាងប្រជាជនថៃ។
ក្រោយអតីតព្រះមហាក្សត្រថៃ បានតែងតាំងជានាយករដ្ឋមន្ត្រីអន្តរកាលដើម្បីធានាពីស្ថិរភាពប្រទេសឡើងវិញ លោកនាយករដ្ឋមន្ត្រី ប្រាយុទ្ធ បានសន្យានឹងនាំមកវិញនូវលទ្ធិប្រជាធិបតេយ្យតាមមាគារបស់ខ្លួន តាមរយៈការធ្វើរដ្ឋធម្មនុញ្ញថ្មី និងចុងក្រោយ រៀបចំឲ្យមានការបោះឆ្នោត។ តាមពិតទៅ រឿងបញ្ហាបោះឆ្នោតថៃ មិនមែនទើបតែកើតឡើងនោះទេ ពោលគឺ ផែនការនៃការបោះឆ្នោត ត្រូវបានលើកពេលជាច្រើនលើកច្រើនសារមកហើយ ដោយក្នុងនោះ ក៏មានហេតុផលពាក់ព័ន្ធនឹងការបរាជ័យក្នុងការធ្វើរដ្ឋធម្មនុញ្ញ។
យ៉ាងណាក៏ដោយនៅ នៅឆ្នាំមុន រដ្ឋាភិបាលរបបសឹកថៃ បានរៀបចំឲ្យមានការធ្វើប្រជាមតិលើសេចក្តីព្រាងរដ្ឋធម្មនុញ្ញថ្មី ដែលធ្វើឡើងក្នុងរដ្ឋបាលរបស់ខ្លួន ដោយជោគជ័យ ពោលគឺប្រជាជន បានសម្រេចយកសេចក្តីព្រាងរដ្ឋធម្មនុញ្ញ ដែលមតិមួយចំនួនមើលឃើញជារដ្ឋធម្មនុញ្ញដែលបម្រើផលប្រយោជន៍យោធានោះ។ នេះ ក៏មានន័យដែរថា ការបោះឆ្នោត ក៏នឹងប្រព្រឹត្តទៅនៅក្នុងឆ្នាំ២០១៧ផងដែរ៕
© រក្សាសិទ្ធិដោយ thmeythmey.com