អន្តរជាតិ
ដូណាល់ត្រាំ តែងតាំងកូនប្រសារជាទីប្រឹក្សាជាន់ខ្ពស់
× ប្រធានាធិបតីជាប់ឆ្នោតលោក ដូណាល់ ត្រាំ បានសម្រេចតែងតាំងកូនប្រសាររបស់ខ្លួនលោកJared Kushner ជាទីប្រឹក្សាជាន់ខ្ពស់នៅសេតវិមាន។ វាមានការព្រួយបារម្ភខ្លាំងដែរផ្នែកផ្លូវច្បាប់ចំពោះការតែងតាំងកូនប្រសារខ្លួន ប៉ុន្តែ Jared Kushner នឹងលាលែងពីតំណែងនាយកប្រតិបត្តិក្រុមហ៊ុនដើម្បីការពារក្រែងមានទំនាស់ផលប្រយោជន៍។
កូនប្រសារលោក ដូណាល់ ត្រាំ លោក Jared Kushner ត្រូវបានតែងតាំងជាទីប្រឹក្សាជាន់ខ្ពស់ប្រចាំសេតវិមាន។ លោក Jared Kushner ឆ្នាំនេះជាស្វាមី Ivanka Trump ដែលកូនស្រីរបស់លោក ដូណាល់ ត្រាំ។ ក្នុងវ័យ៣៦ហើយ លោកនឹងក្លាយជាសមាជិករដ្ឋបាលថ្មីដែលក្មេងបំផុតមួយ។
យោងតាមទីភ្នាក់ងារព័ត៌មាន AFP កូនប្រសារលោកដូណាល់ ត្រាំ ជាអ្នកអភិវឌ្ឍអចលនទ្រព្យនិងអ្នកបោះពុម្ពទស្សនាវដ្តីផង។ នៅពេលលោកបំពេញការងារជាទីប្រឹក្សាជាន់ខ្ពស់ប្រចាំសេតវិមាន លោកនឹងបំពេញការងារជាមួយប្រធានបុគ្គលិកសេតវិមាន Reince Priebus និងប្រធានផ្នែកយុទ្ធសាស្ត្រ Steve Bannon។
ពាក់ព័ន្ធការតែងតាំងនេះ ប្រធានាធិបតីជាប់ឆ្នោតលោក ដូណាល់ ត្រាំ បានប្រកាសថា៖« Jared ជាធនធានមួយដ៏ពិសេស និងជាទីប្រឹក្សាមួយដ៏គួរឲ្យទុកចិត្តបំផុតតាមរយៈការឃោសនានិងការរៀបចំក្រុមអន្តរកាលកន្លងមក។ ខ្ញុំមានមោទនភាពណាស់ដែលមានគាត់ធ្វើការងារក្នុងក្បាលម៉ាស៊ីនដឹកនាំនៃរដ្ឋបាលរបស់ខ្ញុំ»។
តាមពិតទៅការប្រកាសតែងតាំងកូនប្រសារខ្លួននេះកើតឡើងប្រហែលពីរថ្ងៃប៉ុណ្ណោះមិនពេលដែលលោក ដូណាល់ ត្រាំ ត្រូវបើកសន្និសីទសារព័ត៌មានមួយដោយលោកនឹងផ្តល់ព័ត៌មានលម្អិតពាក់ព័ន្ធគម្រោងរបស់លោកក្នុងការគ្រប់គ្រងក្រុមហ៊ុន និងវិធានការដែលអាចទប់ស្កាត់ទំនាស់ផល់ប្រយោជន៍ពេលលោកស្បថចូលកាន់តំណែង។
ការតែងតាំងកូនប្រសារនេះ ក៏ធ្វើឲ្យមានក្តីបារម្ភខ្លាំងដែរពាក់ព័ន្ធបញ្ហាច្បាប់និងក្រមសីលធម៌វិជ្ជាជីវៈ ព្រោះលោកដូណាល់ ត្រាំ មិនបានលើកឡើងពីច្បាប់ស្តីពីគ្រួសារនិយម និងទំនាស់ផលប្រយោជន៍ឡើយ។ ច្បាប់សហព័ន្ធអាមេរិក ដែលត្រូវបានអនុម័តក្រោយអាណត្តិលោក John F. Kennedy ហាមប្រធានាធិបតីជួលមន្ត្រីដែលជាសាច់ញាតិខ្លួនឡើយ។
តែមេធាវីកូនប្រសារលោក ដូណាល់ ត្រាំ បានអះអាងថា លោក Kushner នឹងលាលែងពីតំណែងជានាយកប្រតិបត្តិក្រុមហ៊ុន Kushner និងចាត់ចែងទ្រព្យសម្បតិ្តតាមការកំណត់នៃច្បាប់សហព័ន្ធ ដើម្បីធានាថា ទំនាស់ផលប្រយោជន៍មិនអាចកើតមានឡើងនោះឡើយ៕
© រក្សាសិទ្ធិដោយ thmeythmey.com