អាកាសយានិកជាន់ឋានព្រះចន្ទចុងក្រោយគេ ស្លាប់ក្នុងវ័យ៨២ឆ្នាំ

អន្តរជាតិ

អាកាសយានិកជាន់ឋានព្រះចន្ទចុងក្រោយគេ ស្លាប់ក្នុងវ័យ៨២ឆ្នាំ

17, Jan 2017 , 11:10 am

រូបភាព

ដោយ: ថ្មីៗ

អាកាសយានិកអាមេរិក Gene Cernan ដែលជាមនុស្សចុងក្រោយគេបន្សល់ទុកដានជើងលើឋានព្រះចន្ទ បានស្លាប់ហើយក្នុងវ័យ៨២ឆ្នាំ សោយសារជម្ងឺ។ នេះបើយោងតាមការប្រកាសរបស់ទីភ្នាក់ងារអវកាសជាតិ (NASA)។ លោក Gene Cernan ក៏ជាអតីតនាយទាហានជើងទឹកអាមេរិកដែលបានចូលនិវត្តន៍ផងដែរ។

លោក Gene Cernan គឺជាមនុស្សម្នាក់ក្នុងចំណោមមនុស្សបីនាក់ ដែលបានធ្វើដំណើរទៅកាន់ឋានព្រះចន្ទចំនួនដល់ទៅពីរដង។ លោក ក៏ជាជនជាតិអាមេរិកទីពីរ ដែលបានទៅដល់ឋានព្រះចន្ទ ហើយក៏ជាមនុស្សចុងក្រោយគេ ដែលជាន់ដីភពមួយនេះដែរ គឺក្នុងឆ្នាំ១៩៧២ ដែលពេលនោះលោកជាមេបញ្ជាការបេសកកម្ម Apollo 17 ទៀតផង។

មុនពេលធ្វើដំណើរទៅកាន់ឋានព្រះចន្ទជាមួយ Apollo 17 លោក Gene Cernan ក៏ធ្លាប់ធ្វើដំណើរទៅកាន់ទីអវកាសពីរដងដែរ គឺក្នុងឆ្នាំ១៩៦៦ និងឆ្នាំ១៩៦៩ ។ បុរសកើតនៅរដ្ឋ Illinois ក្នុងឆ្នាំ១៩៣៤ រូបនេះ ជាមនុស្សក្នុងចំណោម១៤នាក់ ត្រូវបានជ្រើសរើសឲ្យចូលរួមជាមួយ NASA ក្នុងឆ្នាំ១៩៦៣ ក្នុងកម្មវិធី Apollo ដែលជាគម្រោងនាំយកមនុស្សទៅកាន់ឋានព្រះចន្ទតែម្ដង។

បើតាមសារព័ត៌មាន CNN នៅពេលឈានជើងចាកចេញពីឋានព្រះចន្ទក្នុងឆ្នាំ១៩៧២ លោក Gene Cernan និយាយថា៖ «ខណៈដែលខ្ញុំដកជើងចេញពីផ្ទៃដីឋានព្រះចន្ទ ខ្ញុំចង់ឲ្យមានការកត់ត្រាថា ការប្រឈមមុខរបស់អាមេរិកនៅបច្ចុប្បន្ននេះ បានវែកផ្លូវសម្រាប់មនុស្សជាតិនៅថ្ងៃស្អែក»។ ចំណែកក្រុមគ្រួសាររបស់លោក ក៏និយាយដែរថាលោក Gene Cernan មិនចង់មានឈ្មោះជាអ្នកចុងក្រោយ ដែលជាន់ដីឋានព្រះចន្ទឡើយ។

សូមបញ្ជាក់ថា មកទល់ពេលនេះ មានតែមនុស្ស១២នាក់ប៉ុណ្ណោះធ្លាប់ធ្វើដំណើរទៅដល់ឋានព្រះចន្ទ ហើយមានតែ៦នាក់ទេ ដែលនៅរស់រានមានជីវិតដល់សព្វថ្ងៃ៕