ថ្នាក់ដឹកនាំជំរុញឲ្យបង្កើនការហ្វឹកហាត់ខណៈបណ្តាក្លិប-សមាគមស្នើឲ្យបង្កើនប្រាក់រង្វាន់

កីឡាជាតិ

ជាតិ

ថ្នាក់ដឹកនាំជំរុញឲ្យបង្កើនការហ្វឹកហាត់ខណៈបណ្តាក្លិប-សមាគមស្នើឲ្យបង្កើនប្រាក់រង្វាន់

20, Jan 2017 , 8:19 pm

រូបភាព

ដោយ:

នាអង្គមហាសន្និបាតប្រចាំឆ្នាំ កាលពីព្រឹកថ្ងៃទី២០ ខែមករា នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ថ្នាក់ដឹកនាំសហព័ន្ធ កីឡាវាយសីកម្ពុជាបានជំរុញឲ្យកីឡាករ គ្រូបង្វឹកនៅតាមបណ្តាក្លិប-សមាគមត្រូវខិតខំហ្វឹកហាត់ពង្រឹងសមត្ថភាព ដើម្បីត្រៀមប្រកួតថ្នាក់ជាតិ និងអន្តរជាតិ។ ស្របពេលជាមួយគ្នានេះផងដែរ ថ្នាក់ដឹកនាំក្លិប-សមាគមស្នើឲ្យបង្កើនប្រាក់រង្វាន់ដើម្បីជាការលើកទឹកចិត្ត។

ប្រធានសហព័ន្ធកីឡាវាយសីកម្ពុជាលោក លី កុសល ជំរុញឲ្យកីឡាករកីឡាការិនី និងគ្រូបង្វឹកនៅតាមបណ្តាក្លិប-សមាគមទាំងអស់ត្រូវយកចិត្តទុកដាក់ និងបង្កើនការហ្វឹកហាត់ពង្រឹងបច្ចេកទេស និងសមត្ថភាពរបស់ខ្លួន ដើម្បីត្រៀមប្រកួតដណ្តើមជើងឯកក្នុងព្រឹត្តិការណ៍ជាតិ និងអន្តរជាតិ ជាពិសេសស៊ីហ្គេមឆ្នាំ២០២៣។

ម្យ៉ាងវិញទៀត លោក ជំរុញឲ្យក្លិប-សមាគមទាំងនោះត្រូវជ្រើសរើស និងបណ្តុះបណ្តាលធនធានថ្នាលបន្ថែមឲ្យបានច្រើន ងាយស្រួលក្នុងការចម្រាញ់ជ្រើសរើសកីឡាករដែលមានសមត្ថភាព និងទេពកោលស្យខ្ពស់។ លើសពីនេះ លោប្រធានសហព័ន្ធរូបនេះ បានស្នើឲ្យក្លិប-សមាគមទាំងអស់ត្រូវបញ្ជូនកីឡាកររបស់ខ្លួនផ្ទាល់ក្នុងការចូលរួមប្រកួតជើងឯកម្តងៗ ពោលគឺមិនត្រូវយកកីឡាករដែលនៅក្រៅក្លិប-សមាគមរបស់ខ្លួននោះទេ។

ដើម្បីចូលរួមចំណែកអភិវឌ្ឍន៍បច្ចេកទេស និងសមត្ថភាពរបស់កីឡាករកីឡាការិនីវាយសីកម្ពុជានៅតាមបណ្តាក្លិប-សមាគមឲ្យកាន់តែរីកចម្រើន ប្រធានក្លិប-សមាគមមួយចំនួនបានស្នើឲ្យសហព័ន្ធជួយចិត្តទុកដាក់ និងបង្កើនប្រាក់រង្វាន់លើកទឹកចិត្តរាល់ពេលមានការប្រកួតម្តងៗ។ ការស្នើសុំនេះ ដោយពួកគេគិតថា ប្រាក់រង្វាន់ក៏ជាកត្តាមួយក្នុងការជួយជំរុញទឹកចិត្តកីឡាករឲ្យបង្កើនការហ្វឹកហាត់ផងដែរ។

ជាមួយគ្នានេះ លោក ខាវ សុផល ប្រធានក្លិបកីឡាវាយសីខេត្តកំពង់ចាម ដែលជាក្លិបមួយដ៏មានសមត្ថភាពប្រចាំខេត្ត បានស្នើសុំឲ្យសហព័ន្ធកីឡាវាយសីកម្ពុជាជួយដោះស្រាយនូវបញ្ហារឿងទីលាន ព្រោះបច្ចុប្បន្នក្លិបនេះកំពុងខ្វះខាតទីលានសម្រាប់ឲ្យកីឡាករកីឡាការិនីហ្វឹកហាត់ ដើម្បីពង្រឹងបច្ចេកទេស និងសមត្ថភាព។ ទោះបីជាយ៉ាងនេះក្តី ការស្នើសុំនេះ មិនទាន់មានការឆ្លើយតបពីថ្នាក់ដឹកនាំសហព័ន្ធនោះឡើយ។

បច្ចុប្បន្នសហព័ន្ធកីឡាវាយសីកម្ពុជាមានក្លិប-សមាគមដែលជាសមាជិកទាំងអស់ចំនួន២៧ ក្នុងនោះមានកីឡាករកីឡាការិនីទាំងអស់ចំនួន៦៥៥នាក់ អាជ្ញាកណ្ដាលចំនួន២២នាក់ និងគ្រូបង្វឹកចំនួន៣៦នាក់។ ហើយសហព័ន្ធមានទីលានវាយសីនៅទូទាំងប្រទេសទាំងអស់ចំនួន៥០ទីលានក្នុងនោះ៤៧ទីលានមានកម្រាលត្រឹមត្រូវ។

គួរបញ្ជក់ថា ក្នុងអង្គមហាសន្និបាតបញ្ចប់អាណត្តិចាស់ដាក់ទិសដៅអាណត្តិថ្មី(២០១៦-២០២០) មិនមានការផ្លាស់ប្តូរឬតែងតាំងថ្នាក់ដឹកនាំ សមាជិក សមាជិការប្រតិបត្តិថ្មីនោះឡើយ។ ក្នុងនោះ លោក លី កុសល ប្រធាន, លោក មាស សារិន អនុប្រធាន, លោក ស្តើង ជា អគ្គលេខាធិការ, លោក អាំង សំបូរ អគ្គលេខាធិការរងទទួលបន្ទុកបច្ចេកទេស និងលោក ជាម សុភា អគ្គលេខាធិការរងទទួលបន្ទុករដ្ឋបាល។

ក្រៅពីនេះក៏មានសមាជិក-សមាជិការប្រតិបត្តិជាច្រើនរូបទៀតរួម លោក កុសល សុវណ្ណវិសាល ទទួលបន្ទុកបច្ចេកទេសពត៌មានវិទ្យា និងទីផ្សារ, លោក ធិន សៅ អគ្គហិរញ្ញិក, លោក កែវ រស់ ទទួលបន្ទុកទំនាក់ទំនងបរទេស និងលោក លឹម កៅ ទទួលបន្ទុកហ្វឹកហ្វឺន និងទីផ្សារ៕