ចិនផ្តល់ថវិកាជិត ១៦លានដុល្លារដល់ព្រឹទ្ធសភា រយៈពេលជាង ១០ឆ្នាំ

ជាតិ

ចិនផ្តល់ថវិកាជិត ១៦លានដុល្លារដល់ព្រឹទ្ធសភា រយៈពេលជាង ១០ឆ្នាំ

20, Jan 2017 , 10:59 pm

រូបភាព

លោក អ៊ុំ សារឹទ្ធ អគ្គលេខាធិការព្រឹទ្ធសភា។ រូបថតពីព្រឹទ្ធសភា

ដោយ:

ភ្នំពេញ៖ លោក អ៊ុំ សារឹទ្ធ អគ្គលេខាធិការព្រឹទ្ធសភាបាន ឲ្យដឹងថា សាធារណរដ្ឋប្រជាមានិតចិនបានផ្តល់ជំនួយចំនួន ១៤លើក ស្មើនឹងទឹកប្រាក់សរុបចំនួន ១៥,៩១៥,២៣៥.១៤ ដុល្លារអាមេរិក ចាប់តាំងពីព្រឹទ្ធសភាបង្កើតឡើង តាំងឆ្នាំ១៩៩៩ រហូតដល់បច្ចុប្បន្ន។

តាមរបាយការណ៍ដែលលោក អ៊ុំ សារឹទ្ធ បានអានក្នុងពិធីសម្ពោធអគារការិយាល័យព្រឹទ្ធសភាថ្មីចំនួន ១ខ្នង កម្ពស់៣ជាន់ នៅថ្ងៃនេះ ជំនួយចិនទាំងនោះ រួមមាន រថយន្ត សម្ភារការិយាល័យ ការសាងសង់ ឬជួសជុលអគារ និងប្រព័ន្ធលូទឹកព្រឹទ្ធសភា ជាដើម។

អគ្គលេខាធិការព្រឹទ្ធសភាបានបង្ហាញជំនួយរបស់រដ្ឋាភិបាលចិននៅថ្ងៃទី២០ ខែមករានេះ មាន ជំនួយទី១, មានទឹកប្រាក់ ២៥០,០០០ ដុល្លារអាមេរិកសម្រាប់ការជួសជុលកែលំអសាលប្រជុំពេញអង្គព្រឹទ្ធសភា និងបំពាក់គ្រឿងសម្ភារៈបរិក្ខារ។ ទី២, មានទឹកប្រាក់៣១០,០០០ដុល្លារ សម្រាប់ជួសជុលផ្លូវ ក្រាលបេតុង និងកែលំអប្រព័ន្ធលូទឹកនៅក្នុងបរិវេណព្រឹទ្ធសភា។ ទី៣, មានទឹកប្រាក់១៨០,០០០ដុល្លារ សម្រាប់រៀបចំជួសជុលដំបូលអគារក្រហម ។

ទី៤, មានទឹកប្រាក់ ចំនួន ២,០៨៥,៧៤៨ ដុល្លារ សម្រាប់សាងសង់អគារបណ្ណាល័យ ០១ខ្នង និងអគារការិយាល័យធ្វើការរបស់សមាជិក សមាជិកាព្រឹទ្ធសភាចំ
នួន ០៣ខ្នង ។ ទី៥, មានទឹកប្រាក់ ចំនួន ២៥៣,៧៤៦ ដុល្លារ សម្រាប់ជួសជុលផ្លូវថ្នល់ ជួសជុលខ្លោងទ្វារចេញ-ចូលព្រឹទ្ធសភា ចំនួន០៤ និងផ្តល់រថយន្ត ១២ កៅអី ០២គ្រឿង ។

ទី៦, ផ្តល់ជាគ្រឿងសម្ភារការិយាល័យ មានកុំព្យូទ័រ Desktop - Laptop និង Printer ចំនួន ២៦ គ្រឿង មានតម្លៃ ៣១.៦០៤ ដុល្លារ។ ទី៧, ផ្តល់រថយន្ត ១២ កៅអី ចំនួន ០៣ គ្រឿង កុំព្យូទ័រ Laptopចំនួន ៥០ គ្រឿង មានតម្លៃចំនួន ១៥៣,៨៤៦ ដុល្លារ។

ទី៨, មានទឹកប្រាក់ចំនួន ១,២៥០,០០០ ដុល្លារ សម្រាប់ជួសជុល កែលំអឡើងវិញអគារបណ្ណាល័យ ០១ខ្នង និងអគារការិយាល័យធ្វើការរបស់សមាជិក សមាជិកាព្រឹទ្ធសភា ចំនួន ០៣ ខ្នង ។ ទី៩, ផ្តល់កុំព្យូទ័រចំនួន ៩៧គ្រឿង, ម៉ាស៊ីនត្រជាក់ ៩៧គ្រឿង មានតម្លៃ ១៧០,០០០ ដុល្លារ សម្រាប់បំពាក់ជំនួសកុំព្យូទ័រ និងម៉ាស៊ីនត្រជាក់ចាស់ៗដែលរដ្ឋាភិបាលចិនបានផ្តល់ឲ្យព្រឹទ្ធសភា កាលពីឆ្នាំ ២០០១ ។

ទី១០, ផ្តល់រថយន្ត ១២កៅអី ចំនួន ០៣គ្រឿង ម៉ាស៊ីនហ្វូតូកូពី ខ្នាតធំចំនួន ០៥គ្រឿង ម៉ាស៊ីនស្កេនណ័រ០៩គ្រឿង កុំព្យូទ័រលើតុ ៣០គ្រឿង កុំព្យូទ័រ Laptop ចំនួន ៣០គ្រឿង និងស្តង់ដាទូរស័ព្ទ (Telephone Extension System) ចំនួន ០១គ្រឿង ដែលមានទឹកប្រាក់ ចំនួន ១៥៨,៧៣០ ដុល្លារអាមេរិក ។ ទី១១, សាងសង់អគារ ០៣ខ្នង មានកំពស់ ០៣ ជាន់ មានទំហំ ៤.៧៧៩ ម៉ែត្រការ៉េ មានទឹកប្រាក់ចំនួន ៧,៧០០,០០០ ដុល្លារ។

ទី១២, រថយន្តក្រុងចំណុះ ៣០កៅអី ចំនួន ០៣គ្រឿង ដែលមានតម្លៃ ១៥១,៩០៧,១៤ ដុល្លារ។ ទី១៣, កុំព្យូទ័រ Desktop ចំនួន ៣៦គ្រឿង មានតម្លៃ ៣០,១២៥ ដុល្លារអាមេរិក និងទី១៤ , នាពេលនេះ មានទឹកប្រាក់ ចំនួន ២២,២០០,០០០ យ័ន ស្មើនឹង ៣,៣៤៣,៣៧៥ ដុល្លារអាមេរិក សម្រាប់សាងសង់អគារការិយាល័យថ្មីថ្នាក់ដឹកនាំព្រឹទ្ធសភា ១ខ្នងកំពស់ ៣ជាន់ មានទំហំ ១,៥០០ ម៉ែត្រការ៉េ រួមទាំងការបំពាក់សម្ភារៈ ឧបករណ៍អេឡិកត្រូនិក សម្ភារៈការិយាល័យ និងជណ្តើរយន្ត ។

«អគ្គលេខាធិការដ្ឋានបានដាក់ឱ្យប្រើប្រាស់ប្រកបដោយត្រឹមត្រូវមានគណនេយ្យភាព និងតម្លាភាពយ៉ាងខ្ពស់បំផុតមានន័យថាព្រឹទ្ធសភាបានប្រើប្រាស់ជំនួយដោយស្មារតីថែទាំ សន្សំសំចៃ និងមានការគ្រប់គ្រងបានល្អពុំមានបាត់បង់ទេរហូតមកដល់នេះ»។ លោក អ៊ុំ សារឹទ្ធ អគ្គលេខាធិការព្រឹទ្ធសភា បានបញ្ជាក់ ក្នុងពិធីសម្ពោធអគារការិយាល័យថ្មីដែលចិនជួយព្រឹទ្ធសភា នៅថ្ងៃទី២០ មករានេះ៕