កីឡាជាតិ
ជាតិ
ម្ចាស់ជើងឯកបឹងកេតអង្គរបង្ហាញភាពខ្លាំងមុនបើករដូវកាលថ្មី២០១៧
× ក្រុមម្ចាស់ជើងឯកពានរង្វាន់លីកកំពូលឆ្នាំចាស់បឹងកេតអង្គរ ដែលដឹកនាំដោយគ្រូបង្វឹកថ្មី John Ynwa Mcglynn បានបង្ហាញភាពខ្លាំងមុនថ្ងៃបើករដូវកាលថ្មីនៃពានរង្វាន់លីកកំពូលកម្ពុជាឆ្នាំ២០១៧ ដោយបានលត់ក្រុមខេមបូឌានថាយហ្គឺរ ៧-២ នាជំនួបមិត្តភាពកាលពីថ្ងៃទី២០ មករា នៅទីលាន International School of Phnom Penh។
នាជំនួបមិត្តភាពកាលពីថ្ងៃទី២០ ខែមករា ក្រុមបឹងកេតអង្គរដែលដឹកនាំដោយគ្រូបង្វឹកថ្មីសញ្ជាតិអូស្ត្រាលី John Ynwa Mcglynn បានលត់ក្រុមដែលលេងក្នុងក្របខ័ណ្ឌលីកកំពូកកម្ពុជាខេមបូឌានថាយហ្គឺរ ៧-២ នៅលើទីលាន International School of Phnom Penh។ ជ័យជម្នះនេះជាសញ្ញាបង្ហាញពីគុណភាពលេងដ៏ខ្លាំងខ្លារបស់ក្រុមម្ចាស់ជើងឯកឆ្នាំចាស់ ដើម្បីត្រៀមប្រជែងក្នុងរដូវកាលថ្មីឆ្នាំ២០១៧ ដែលចាប់ផ្តើមនាខែកុម្ភៈ ខាងមុខនេះ។
ជាមួយគ្នានេះ គ្រូបង្វឹកដើមកំណើតអង់គ្លេសវ័យ៤៩ឆ្នាំ John Ynwa Mcglynn បានសន្យាក្នុងថ្ងៃចុះកិច្ចសន្យាជាមួយក្លិបបឹងកេតថា នឹងខិតខំប្រឹងប្រែងឲ្យអស់ពីសមត្ថភាពដឹកនាំបឹងកេតអង្គរឆ្ពោះទៅកាន់ភាពជោគជ័យក្នុងអាណត្តិមួយឆ្នាំរបស់ខ្លួន។ លោកបានចាត់ទុកជំនួបមិត្តភាពនេះមិនត្រឹមតែ ដើម្បីត្រៀមប្រជែងដណ្តើមជើងឯកលីកកំពូលរដូវកាលថ្មី២០១៧ប៉ុណ្ណោះទេ តែវាក៏ដើម្បីពង្រឹងត្រៀមវគ្គជម្រុះពានរង្វាន់ AFC Cup 2017 ផងដែរ។
ក្រុមបឹងកេតអង្គរត្រូវជួបប្រកួតជាមួយក្រុម Lao Toyota ក្នុងវគ្គជម្រុះពានរង្វាន់ AFC Cup 2017 ពីរជើង ដោយជើងទី១នាថ្ងៃទី៣១ ខែមករា នៅលើទឹកដីរបស់ខ្លួន និងជើងទី២នៅលើទឹកដីឡាវនាខែកុម្ភៈខាងមុខនេះ៕
Tag:
បាល់ទាត់
បឹងកេតអង្គរ
ខេមបូឌានថាយហ្គឺរ
© រក្សាសិទ្ធិដោយ thmeythmey.com