កីឡាជាតិ
ជាតិ
FFC បង្កើតគណៈកម្មការមួយដើម្បីរៀបចំការប្រកួត ឲ្យកាន់តែមានប្រសិទ្ធភាព
× សហព័ន្ធកីឡាបាល់ទាត់កម្ពុជា (FFC) កាលពីល្ងាចថ្ងៃទី២២ ខែមករា បានប្រកាសពីការបង្កើតគណៈកម្មការប្រកួតបាល់ទាត់ជាតិកម្ពុជា (Cambodia National Competitions Committee) ដែលហៅកាត់ថា CNCC ។ គណៈកម្មការនេះ មានតួនាទីជួយពង្រឹង អភិវឌ្ឍន៍បច្ចេកទេស និងបទបញ្ជានៃការប្រកួតឲ្យកាន់តែរីកចម្រើន។
ការប្រកួតក្របខណ្ឌលីកកំពូល និងពានរង្វាន់សម្តេច ហ៊ុន សែន ចាប់ពីឆ្នាំ២០១៧ នេះទៅ ត្រូវស្ថិតក្រោមការគ្រប់គ្រងរបស់គណៈកម្មការប្រកួតបាល់ទាត់ជាតិ (CNCC) ដែលបង្កើតឡើងឡើងកាលពីខែវិច្ឆិកា ឆ្នាំ២០១៦ ។ គណៈកម្មការដែលស្ថិតក្រោមសហព័ន្ធកីឡាបាល់ទាត់កម្ពុជា (FFC) មានតួនាទីជួយសម្រាលបន្ទុករបស់សហព័ន្ធ ជាពិសេសពង្រឹងផ្នែកបច្ចេកទេស និងបទបញ្ជាការប្រកួត។
ថ្លែងក្នុងសន្និសីទសារព័ត៌មានបើករដូវកាលថ្មីនៅសណ្ឋាគារសុខាភ្នំពេញកាលពីថ្ងៃទី២២ ខែមករា លោក ឆាំង ពិសិដ្ឋ លេខាប្រតិបត្តិរបស់ CNCC បានបញ្ជាក់យ៉ាងដូច្នេះថា៖«សហព័ន្ធកីឡាបាល់ទាត់កម្ពុជាបង្កើតគណៈកម្មការប្រកួតបាល់ទាត់ជាតិកម្ពុជា ជានាយកដ្ឋានដោយឡែកនេះគឺ សំដៅដល់ការពង្រឹងផ្នែកការប្រកួតរបស់យើងឲ្យកាន់តែមានគុណភាព។ បើយើងងាកទៅមើលប្រទេសជឿនលឿនដូចជាជប៉ុន និងសិង្ហបុរីជាដើមការប្រកួតលីករបស់គេគឺស្ថិតនៅក្រោមស្ថាប័នដាច់ដោយឡែក»។
គណៈកម្មការប្រកួតបាល់ទាត់ជាតិកម្ពុជានេះ មានលោក ឌី វិជ្ជា ជាប្រធានគណៈកម្មការនាយក ដែលមានលោក ឆាំង ពិសិដ្ឋ ជាលេខាប្រតិបត្តិ។ ចំណែកប្រធាន និងអគ្គលេខាធិការរបស់ក្លិបនីមួយៗត្រូវបានតែងតាំងជាសមាជិកគណៈកម្មការនាយក។
ទោះបីគណៈកម្មការប្រកួតបាល់ទាត់ជាតិកម្ពុជាជាស្ថាប័នដាច់ដោយឡែកក៏ពិតមែន ប៉ុន្តែស្ថាប័ននេះស្ថិតនៅក្រោមការឃ្លាំមើល និងអធិការកិច្ចរបស់សហព័ន្ធកីឡាបាល់ទាត់កម្ពុជា។ «នៅដាច់ដោយឡែក គ្រប់គ្រងដោយឡែក ប៉ុន្តែស្ថិតនៅក្រោមការឃ្លាំមើល និងអធិការកិច្ចរបស់សហព័ន្ធកីឡាបាល់ទាត់ជាតិនីមួយៗ»។ នេះជាសំដីរបស់លោក ឆាំង ពិសិដ្ឋ។
ទោះបីការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន និងក្របខ័ណ្ឌលីកកំពូលកម្ពុជាស្ថិតក្រោមការរៀបចំរបស់ CNCC ក៏ដោយ ប៉ុន្តែស្ថាប័ននេះមិនមានតួនាទីលូកដៃដោះស្រាយបញ្ហារបស់កីឡាករ មន្ត្រីនិងក្លិបនីមួយៗដែលល្មើសពីបទបញ្ជានៃការប្រកួតនោះឡើយ។ ពោលគឺបញ្ហានេះសិ្ថតនៅក្រោមអធិការកិច្ចរបស់គណៈកម្មការវិន័យ។
«នៅក្នុងបទបញ្ជាប្រកួតគឺយើងមានគណៈកម្មការនីមួយដែលជាអង្គការគតិយុទ្ធដែលបង្កើតដោយសហព័ន្ធកីឡាបាល់ទាត់។ យើងមានគណៈកម្មាការវិន័យ ប្រសិនបើក្រុមបាល់ទាត់ កីឡាករ ឬមន្ត្រីក្រុមដែលគាត់ប្រព្រឹត្តិឆ្លងទៅនឹងបញ្ជាការប្រកួតរបស់យើង គឺគណៈកម្មការវិន័យនឹងមានវិធានការចំពោះគាត់។ ប៉ុន្តែសម្រាប់ CNCC បង្កើតឡើងដើម្បីជួយពង្រឹង និងជំរុញបន្ថែម ដើម្បីឲ្យការប្រកួតមានគុណភាពល្អ និងដើម្បីអភិវឌ្ឍន៍បាល់ទាត់យើងតែម្តង»។ នេះជាការបញ្ជាក់របស់លេខាប្រតិបត្តិរបស់ CNCC។
តាំងពីថ្ងៃបង្កើតរហូតដល់មកទល់ពេលនេះ CNCC មិនទាន់បានកំណត់ពីអាណត្តិរបស់ខ្លួននៅឡើយទេ ហើយបច្ចុប្បន្នក៏កំពុងរួមរស់ជាមួយសហព័ន្ធកីឡាបាល់ទាត់កម្ពុជាផងដែរ។ ជាមួយគ្នានេះគណៈកម្មការប្រកួតបាល់ទាត់ជាតិកម្ពុជារំពឹងថា ទៅថ្ងៃអនាគត CNCC នឹងរស់ដោយខ្លួនឯង ដោយមិនបាច់ពឹងផ្អែកលើសហព័ន្ធ។
គួរបញ្ជាក់ថា ការប្រកួតពានរង្វាន់ក្របខណ្ឌលីកកំពូលកម្ពុជា(Cambodian League 2017) នឹងចាប់ផ្តើមពីថ្ងៃទី១៨ ខែកុម្ភៈ ដល់ថ្ងៃទី២ ខែធ្នូ។ ឆ្នាំនេះមានក្រុមចូលរួមចំនួន១២ រួមមានបឹងកេតអង្គរ, ក្រសួងការពារជាតិ, ព្រះខ័នរាជស្វាយរៀង, ភ្នំពេញក្រោន, ណាហ្គាវើល, ខេមបូឌានថាយហ្គឹរ, ប៉ូលិស, ស៊ីម៉ាក់, វេស្ទើនភ្នំពេញ, គីរីវង់សុខសែនជ័យ, អគ្គិសនីកម្ពុជា និងអាស៊ីអឺរ៉ុប៕
Tag:
បាល់ទាត់
Hun Sen Cup 2017
Cambodian League 2017
© រក្សាសិទ្ធិដោយ thmeythmey.com