អន្តរជាតិ
កូនតោកាត់ខ្លា (Liger) មួយក្បាលនៅរុស្ស៊ីដែលធំធាត់ដោយសារទឹកដោះពពែ
× កូន Liger ដែលកើតចេញពីការបង្កាត់រវាងតោឈ្មោល និងខ្លាញី នៅសួនសត្វមួយក្នុងប្រទេសរុស្ស៊ី តាំងពីខែវិច្ឆិកាមក កំពុងធំធាត់ដ៏គួរឲ្យសម្គាល់។ កូន Liger ឈ្មោលឈ្មោះ Tsar នេះ អាចមានទម្ងន់រហូតដល់៤០០គីឡូក្រាម និងប្រវែង៣ម៉ែត្រ។
Tsar ជាកូនតោកាត់ខ្លា (Liger) មួយក្បាល ដោយមានបាជាតោឈ្មោលឈ្មោះ Caesar និងមេជាខ្លាញីឈ្មោះ Princess។ នេះបើតាមការបញ្ជាក់របស់លោក Erik Airapetyan ប្រធានមជ្ឈមណ្ឌល និងសួនសត្វ Samara Circus ដែលកំពុងនាំ Tsar ទៅសម្តែងតាមតំបន់មួយចំនួន។
លោកបានបញ្ជាក់ថា ដោយសារតែមេវាគ្មានទឹកដោះ បច្ចុប្បន្ន Tsar ត្រូវបានចិញ្ចឹមបីបាច់ដោយទឹកដោះពពែដែលស្ថិតនៅក្នុងសួនសត្វជាមួយគ្នា។ លោកបានកត់សម្គាល់ផងដែរថា Tsar មានការធំធាត់ដ៏គួរឲ្យកត់សម្គាល់ នារយៈពេល៣ខែចុងក្រោយនេះ។
បច្ចុប្បន្ន គេរកឃើញមាន Liger តែ២៣ក្បាលប៉ុណ្ណោះនៅលើពិភពលោក។ Liger ដែលធំជាងគេ គឺ Hercules ដែលរស់នៅសហរដ្ឋអាមេរិក ដោយវាមានឈ្មោះក្នុងសៀវភៅកំណត់ត្រា Guinness Book of World Records ជាមួយទម្ងន់៤១៨គីឡូក្រាម និងប្រវែង៣,៣៣ម៉ែត្រ។
កន្លងមក កូន Liger បីក្បាលត្រូវម្តាយរបស់ខ្លួនបោះបង់ចោលនៅសួនសត្វ Sochi ប្រទេសរុស្ស៊ី តែពួកវាត្រូវបានសត្វឆ្កែខ្មៅមួយក្បាលចិញ្ចឹមថែរក្សាដូចជាកូនរបស់ខ្លួន នេះបើតាមការបញ្ជាក់របស់អ្នកទទួលខុសត្រូវសួនសត្វ៕
© រក្សាសិទ្ធិដោយ thmeythmey.com