អន្តរជាតិ
សិស្សម្នាក់ប្រឈមជាប់គុក៣០ថ្ងៃដោយសារបង្ហោះយន្តហោះក្រដាសចំភ្នែកគ្រូ
× សិស្សវិទ្យាល័យអាមេរិកម្នាក់ដែលស្ថិតនៅក្រុង South Carolina បានបង្ហោះយន្តហោះក្រដាសដោយហើរទៅបុកភ្នែកគ្រូបង្រៀនម្នាក់។ ភ្នែករបស់លោក Edward Mclver ដែលជាគ្រូបង្រៀនផ្នែកវិទ្យាសាស្ត្រនោះ មានការឈឺចាប់យ៉ាងខ្លាំង រហូតដល់ឡើងក្រហមយ៉ាងខ្លាំង។
ការធ្វេសប្រហែសរបស់សិស្សឈ្មោះ David Michael Elliott វ័យ១៧ឆ្នាំ ធ្វើឲ្យគេប្រឈមជាប់ពន្ធនាគាររយៈពេល៣០ឆ្នាំ និងពិន័យជាប្រាក់ចំនួន៥០០អាមេរិក ពីបទបង្ករបួសស្នាមកម្រិតទីបី។ Elliott ត្រូវបានការិយាល័យប៉ូលិស Georgetown County ឃាត់ខ្លួនដើម្បីសាកសួរកាលពីថ្ងៃទី១០ ខែមករា ប៉ុន្តែត្រូវបានដោះលែងវិញនៅដដែល បន្ទាប់ពីមានការតម្កល់ប្រាក់ជាង១០០០ដុល្លារអាមេរិក។
បើតាមការផ្សាយរបស់ South Strand News សំណុំរឿងនេះ នឹងត្រូវបើកជំនុំជម្រះ នាថ្ងៃទី១៤ ខែកុម្ភៈ ឆ្នាំ២០១៧ ខាងមុខ។ សិស្សឈ្មោះ David Michael Elliott ទទួលស្គាល់ថា រូបគេពិតជាបានបង្ករការឈឺចាប់លើភ្នែករបស់គ្រូបង្រៀនមែន ប៉ុន្តែគេបាននិយាយការពារខ្លួនឯងថា វាមិនមែនជាចេតនានោះឡើយ។
ទោះបីជាយ៉ាងណាក៏ដោយ លោក Mclver បាននិយាយទៅកាន់សិស្សផ្សេងទៀតថា សិស្ស Elliott ពិតជាមានបំណងបង្ហោះយន្តហោះក្រដាសទៅបំបុកផ្នែករបស់លោកមែន ដោយសារតែគាត់ធ្លាប់បានស្តីឲ្យ Elliott ទាក់ទងអាកប្បកិរិយាមិនគប្បីរបស់គេមួយចំនួន។
លោកបានអះអាងថា ការរាយការណ៍ពីទង្វើរបស់ Elliott នេះ គឺលោកគ្រាន់តែចង់ប្រដៅគេឲ្យរាងចាលតែប៉ុណ្ណោះ។ បន្ថែមពីលើនេះ លោកបានបន្ថែម ភ្នែកលោកមានប្រតិកម្មដោយសារតែលោកទើបតែធ្វើការវះកាត់កាលពីពេលថ្មីៗកន្លងមក៕
© រក្សាសិទ្ធិដោយ thmeythmey.com