អន្តរជាតិ
ថៃ-អាមេរិក ធ្វើសមយុទ្ធយោធាទ្រង់ទ្រាយធំប្រចាំអាស៊ី«ពស់វែកមាស»ជាមួយគ្នាចាប់ពីថ្ងៃ១៤ កុម្ភៈ
× ថៃ និងអាមេរិក នឹងជាម្ចាស់ផ្ទះសម្រាប់ការធ្វើលំហាត់យោធាប្រចាំឆ្នាំដែលឈ្មោះថា ពស់វែកមាស ( Cobra Gold) លើវិញ្ញាសារជាច្រើនប្រភេទ ដែលនឹងចាប់ផ្តើមពីថ្ងៃទី១៤ ដល់ថ្ងៃទី២៤ កុម្ភៈ នៅក្នុងប្រទេសថៃ។ សមយុទ្ធយោធា នឹងមានការចូលរួម និងអង្កេតដោយប្រទេសជាងម្ភៃផងដែរ។
សមយុទ្ធយោធា«ពស់វែកមាស» ដែលជាសមយុទ្ធពហុភាគីទ្រង់ទ្រាយធំបំផុតមួយនៅក្នុងតំបន់អាស៊ី បានអនុវត្តជារៀងរាល់ឆ្នាំអស់រយៈពេលជាង៣០ឆ្នាំមកហើយ។ ហើយសម្រាប់ ពស់វែកមាស ដែលជាសមយុទ្ធលើកទី៣៦នេះ នឹងមានការចូលរួមពីបណ្តាប្រទេសជាងម្ភៃដើម្បីចូលរួមសមយុទ្ធយោធាដើម្បីដោះស្រាយបញ្ហាប្រឈមក្នុងតំបន់ និងសន្តិសុខសកល ក៏ដូចជាលើកកម្ពស់កិច្ចសហប្រតិបត្តិការអន្តរជាតិ និងស្ថិរភាពក្នុងតំបន់។ នេះបើយោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំថៃ ដែលចុះនៅថ្ងៃទី០១ កុម្ភៈ។
សមយុទ្ធយោធាពស់វែកមាស២០១៧ នឹងជួយពង្រឹងកិច្ចសហប្រតិបត្តិការក្នុងតំបន់ បង្កើនសមត្ថភាពនៃការចូលរួមធ្វើការរវាងរដ្ឋនិងរដ្ឋលើប្រតិបត្តិការពហុវិស័យ ដូចជាបញ្ហាសន្តិសុខដែនសមុទ្រ ការទប់ស្កាត់ និងប្រឆាំងការងើបឡើងនៃជំងឺ និងការឆ្លើយតបទៅនឹងមហន្តរាយធម្មជាតិទ្រង់ទ្រាយ។ នេះបើយោងតាមសេចក្តីប្រកាសព័ត៌មានដដែលបានបន្តទៀតថា សមយុទ្ធយោធានេះ នឹងមានការចូលរួមពីយោធាអាមេរិកប្រមាណ ៣៦០០នាក់ ផងដែរ។
សូមជម្រាបផងដែរ បើទោះបីជា ក្រោយរដ្ឋាភិបាលរបបសឹក ដឹកនាំប្រទេសថៃ ប្រទេសទាំងពីរ អាមេរិក និងថៃ ហាក់ដូចជាមានការប៉ះទង្គិចច្រើនតាមរយៈភាសាការទូត ដ្បិត របបសឹកមិនសូវគោរពគោលការណ៍ប្រជាធិបតេយ្យក៏ដោយ សមយុទ្ធយោធាពស់វែក នៅតែបន្តធ្វើជារៀងរាល់ឆ្នាំ៕
© រក្សាសិទ្ធិដោយ thmeythmey.com