អន្តរជាតិ
របបសឹកថៃ រឹតបន្តឹងសន្តិសុខខ្លាំងលើបុគ្គលសំខាន់រដ្ឋាភិបាល ក្រោយមានការគំរាមសម្លាប់ប្រមុខការពារជាតិ នាយករដ្ឋមន្ត្រីថៃ ប្រាយុទ្ធ ចន្ទ អូចា
× ការគំរាមកំហែងសុវត្ថិភាពបុគ្គលសាធារណសំខាន់ៗរបស់រដ្ឋាភិបាលរបបសឹកថៃនៅតាមបណ្តាញសង្គម បាននិងកំពុងតែកើនឡើង បើទោះបីជារដ្ឋាភិបាល បានមានវិធានការតឹងរឹងខ្លាំងក៏ដោយ។ ដើម្បីឆ្លើយតបទៅនឹងការគំរាមកំហែង និងទប់ស្កាត់ឧប្បទ្ទវហេតុណាមួយកើតឡើងនោះ មេទ័ពថៃ លោក Chalermchai Sittisat បានដាក់បទបញ្ជាយ៉ាងម៉ឺងម៉ាត់ដល់កងកម្លាំងសន្តិសុខដើម្បីធានាពីសុវត្ថិភាពមេដឹកនាំ។
លោកឧត្តមសេនីយ៍ Chalermchai Sittisat មេទ័ពភូមិន្ទថៃ បានអះអាងថា លោក ជឿជាក់ថា អាចនឹងមានផែនការធ្វើឃាតលើលោកឧបនាយករដ្ឋមន្ត្រី និងជារដ្ឋមន្ត្រីការពារជាតិថៃ Prawit Wongsuwonមែន។ លោកឧត្តមសេនីយ៍ ថ្លែងបែបនេះ ក្រោយលោករដ្ឋមន្ត្រីការពារជាតិ បានឲ្យដឹងមុនថា មានជនមិនស្គាល់មុខ បានគំរាមកំហែងធ្វើឃាតលោកជាច្រើនដងតាមរយៈបណ្តាញសង្គម។ នេះបើយោងតាមការចុះផ្សាយរបស់សារព័ត៌មានថៃ បាងកកប៉ុស្តិ៍។
ឆ្លើយនឹងសំណួររបស់អ្នកសារព័ត៌មានថាតើ ការគំរាមកំហែងនោះ អាចទុកចិត្តបានកម្រិតណានោះ លោកឧត្តមសេនីយ៍ បានអះអាងថា លោក ជឿជាក់ថា ផែនការឃាតកម្មនោះ អាចជាពិតប្រាកដ។ ហើយ លោក ក៏បញ្ជាក់ដែរថា ការរៀបចំសន្តិសុខឲ្យបានតឹងរឹង ក៏ត្រូវបានដាក់តាមគោលដៅដើម្បីការពារបុគ្គលសំខាន់របស់រដ្ឋាភិបាលរួចរាល់ហើយ។
ក្រៅពីការជឿជាក់ថា មិនមានហេតុការណ៍អាក្រក់ណាមួយកើតឡើង ដ្បិតការគ្រប់គ្រងសន្តិសុខល្អហើយនោះ លោកឧត្តមសេនីយ៍ បានបន្ថែមទៀតថា រដ្ឋាភិបាល កំពុងតែចាត់វិធានស៊ើបអង្កេតលើករណីនេះផងដែរ។ លោក សង្កត់ធ្ងន់ថា៖« ខ្ញុំ ជឿជាក់ថា គ្មានអ្វីអាក្រក់កើតឡើងនោះទេ។ ហើយអ្នកដែលចេញផ្សាយការគំរាមនោះ នឹងត្រូវនាំយកមកកាត់ទោសជាក់ជាពុំខាន។» លោក ពន្យល់ថា ការដាក់ទិសដៅលើរដ្ឋមន្ត្រីការពារជាតិ ក៏ព្រោះតែ លោក រដ្ឋមន្ត្រី ជា បេះដូង និងដួងវិញ្ញាណនៃប្រតិបត្តិការសន្តិសុខថៃ។ នេះបើយោងតាមប្រភពព័ត៌មានដដែល។
សូមជម្រាបផងដែរ ក្រោយពីការឡើងកាន់តំណែងជារដ្ឋាភិបាល ក្រោមរដ្ឋប្រហារយោធាថ្ងៃទី២២ ខែឧសភា ២០១៤ មក មានចលនាច្រើនប្រឆាំងនឹងរបបសឹក ជាពិសេសនោះ តាមរយៈបណ្តាញសង្គម និងព័ត៌មាន។ យ៉ាងណាក៏ដោយ ប្រមុខរបបសឹកដែលដឹកនាំដោយ លោកឧត្តមសេនីយ៍ និងនាយករដ្ឋមន្ត្រីថៃ ប្រាយុទ្ធ ចន្ទ អូចា ក៏មិននៅស្ងៀមដែរ។ លោក បានបញ្ជាឲ្យសារព័ត៌មានដកខ្លឹមសារទាំងឡាយណាដែលចុះផ្សាយប៉ះពាល់ដល់របបសឹក។ ចំណាត់ការនេះ ក៏រាប់បញ្ចូលទាំងវិធានតឹងរឹងដោយរាប់បញ្ចូលទាំងការកាត់ទោសដាក់ពន្ធនាគារដល់ជនទាំងឡាយណាដែលនិយាយប៉ះពាល់ដល់ស្ថាប័នព្រះមហាក្សត្រថៃតាមរយៈបណ្តាញសង្គមផងដែរ៕
Tag:
ថៃ
សន្តិសុខ
អាស៊ាន
© រក្សាសិទ្ធិដោយ thmeythmey.com