ជាតិ
នយោបាយជាតិ
អាមេរិក ចង់ឃើញបក្សនយោបាយនៅកម្ពុជាមាន«ការផ្សះផ្សានយោបាយពិតប្រាកដ»
× បើទោះបីជារដ្ឋបាលប្រធានាធិបតីអាមេរិកថ្មី ដូណាល់ ត្រាំ បានកាន់កាប់អំណាចប្រមាណពីរសប្តាហ៍ក៏ដោយ រដ្ឋបាលថ្មីនេះ មិនទាន់បញ្ចេញគោលនយោបាយការបរទេសមកតំបន់ច្រើនប៉ុន្មាននោះទេ ដែលរាប់បញ្ចូលទាំងកម្ពុជាផងដែរ។ យ៉ាងណាក៏ដោយ សម្រាប់កិច្ចការលើកកម្ពស់សិទ្ធិមនុស្ស និងលទ្ធិប្រជាធិបតេយ្យ ត្រូវបានលោកអគ្គរដ្ឋទូតអាមេរិកប្រចាំកម្ពុជា ជឿជាក់ថា វិស័យនេះ នៅតែជាវិស័យអាទិភាពរបស់អាមេរិកដដែល។
ថ្លែងក្នុងសន្និសីទសារព័ត៌មានតុមូលនៅថ្ងៃទី០៣ កុម្ភៈ ស្តីពីសមិទ្ធផលឆ្នាំ២០១៦កន្លងទៅ លោកអគ្គរដ្ឋទូតអាមេរិកប្រចាំកម្ពុជា William Heidt បានឲ្យដឹងថា លោក មិនទាន់អាចបញ្ជាក់ពីគោលនយោបាយរបស់រដ្ឋបាលថ្មីអាមេរិកមកកាន់កម្ពុជានៅឡើយនោះទេ ដ្បិតរដ្ឋមន្ត្រីការបរទេសថ្មី ក៏ទើបតែស្បថកាន់តំណែងផងនោះ។ លោក និយាយថា៖«ការលើកកម្ពស់សិទ្ធិមនុស្ស និងប្រជាធិបតេយ្យជុំវិញពិភពលោក គឺជាកិច្ចការដែលអាមេរិកបានធ្វើជាច្រើនឆ្នាំហើយ ហើយ យើងក៏មិនទាន់ឃើញមានអ្វីប្រែប្រួលផងដែរ»។
សួរថាតើលោក យល់ឃើញយ៉ាងណាដែរចំពោះការបោះឆ្នោតរបស់កម្ពុជានាពេលខាងមុខនេះ លោកអគ្គរដ្ឋទូត អះអាងថា លោកមានសុទិដ្ឋិនិយមចំពោះបច្ចេកទេសក្នុងការរៀបចំសម្រាប់ការបោះឆ្នោត ដែលរាប់បញ្ចូលទាំងរបៀបនៃការចុះឈ្មោះថ្មីរបស់គណៈកម្មាធិការរៀបចំការបោះឆ្នោត ដែលបានដំណើរការដោយរលូន។
យ៉ាងណាក៏ដោយ ដើម្បីឲ្យការបោះឆ្នោតអាចធានាថាមានតម្លាភាព និងត្រឹមត្រូវ លោកអគ្គរដ្ឋទូត យល់ឃើញថា ការធានាពីការអាចធ្វើយុទ្ធនាការការបោះឆ្នោត ក៏ត្រូវរាប់បញ្ចូលផងដែរពោលគឺ កម្ពុជាក៏ត្រូវធានាថា គណបក្សនយោបាយទាំងអស់ អាចមានលទ្ធភាពក្នុងការជួបជាមួយនឹងអ្នកគាំទ្ររបស់ខ្លួន និងអាចនិយាយក្នុងសារព័ត៌មានជាដើម។
តែនៅពេលអ្នកសារព័ត៌មានសួរថាតើលោក យល់ឃើញបែបណាចំពោះការវិវត្តចុងក្រោយរវាងគណបក្សនយោបាយកម្ពុជា លោក មិនបានអត្ថាធិប្បាយច្រើនឡើយ។ ក៏ប៉ុន្តែលោក យល់់ឃើញគណបក្សទាំងអស់គួរតែដកថយជំហររបស់ខ្លួនបន្តិច ហើយបង្កើត«ការផ្សះផ្សានយោបាយមួយពិតប្រាកដតាមរយៈវប្បធម៌សន្ទនា»។ លោក ពន្យល់ថា កត្តាសំខាន់សម្រាប់ការផ្សះផ្សានយោបាយ គឺគណបក្សនយោបាយទាំងអស់គួរតែទទួលស្គាល់នូវសិទ្ធិ និងវត្តមានរបស់គណបក្សផ្សេងទៀត។
លោកអគ្គរដ្ឋទូត បានប្រៀបធៀបពីស្ថានភាពនយោបាយអាមេរិកបច្ចុប្បន្ន ក៏មានភាពស្មុគស្មាញផងដែរ តែពលរដ្ឋអាមេរិក នៅតែទទួលស្គាល់គណបក្សនយោបាយទាំងអស់។ លោក បានបញ្ជាក់យ៉ាងដូច្នេះថា៖«ដូចអ្នកបានឃើញអាមេរិក បច្ចុប្បន្នពិតជាមានរឿងចម្រូងចម្រាស(ពាក់ព័ន្ធដំណើរការនយោបាយ) ... ក៏ប៉ុន្តែអ្នកគ្រប់គ្នា នៅតែគោរពសិទ្ធិគ្នាទៅវិញទៅមក»។ លោកអគ្គរដ្ឋទូត បានអះអាងថាដើម្បីអាចទទួលបានការផ្សះផ្សានៅកម្ពុជា គឺតាមរយៈកិច្ចសន្ទនា និងការជជែកជាមួយគ្នាដូចប្រជាជនសាមញ្ញ៕
© រក្សាសិទ្ធិដោយ thmeythmey.com