ជាតិ
មេយោធាសឹករងខេត្តបន្ទាយមានជ័យម្នាក់ ត្រូវដកតំណែង ក្រោយពីប្រើប្រាស់អាវុធគំរាមបាញ់ពលរដ្ឋ
× ភ្នំពេញ៖ មេបញ្ជាការយោធាសឹកខេត្តបន្ទាយមានជ័យ នឹងដកតំណែងមេយោធាសឹករងស្រុកមង្គលបូរីម្នាក់ឈ្មោះ កែវ ស៊ុនលី ដែលបានប្រើប្រាស់អាវុធខុសច្បាប់ គំរាមកំហែងអាយុជីវិតប្រជាពលរដ្ឋ ក្នុងគោលដៅរបស់ខ្លួនកាលពីថ្ងៃទី០១ មករា។ នេះបើតាមស្នងការដ្ឋាននគរបាលជាតិ។
មេបញ្ជាការតំបន់ប្រតិបត្តិការសឹករងលោក ភ្លន់ តារា បានឲ្យដឹងថា មេយោធាសឹករងលោក កែវ ស៊ុនលី ត្រូវបានចាប់ឃុំនៅទីបញ្ជាការយោធាខេត្ត ដោយមិនទាន់ត្រូវបានដោះលែងនៅឡើយទេ ។ លោកបញ្ជាក់ដូច្នេះថា៖«នៅម៉ោង៥ល្ងាចនេះ ខ្ញុំនឹងស៊ីញ៉េដកគាត់ហើយ មិនអាចទុករបៀបនេះទៀតទេ ហើយតែងតាំងលោក ព្រុំ សង ជា មេបញ្ជាការរងឡើងស្ដីទីវិញ» ។
ក្រោយពីដកហូតតំណែងលោក កែវ ស៊ុនលីហើយ មន្ត្រីយោធារូបនេះ ក៏នឹងត្រូវទទួលទោសទណ្ឌកម្មតាមផ្លូវច្បាប់ នៃកងកម្លាំងប្រដាប់អាវុធផងដែរ ។ បើតាមលោក ភ្លន់ តារា។
ស្នងការដ្ឋាននគរបាលជាតិ បានឲ្យដឹងថា ការចាប់ខ្លួនមន្ត្រីយោធាសឹករងស្រុកមង្គលបុរីនេះ ក្រោយពីម្ចាស់ភោជនីយ៏ដ្ឋាននិងខារ៉ាអូខេលោក ហេង គង់ បានដាក់ពាក្យប្ដឹងមេយោធាសឹករងរូបនេះ ដែលបានផឹកស្រាស្រវឹងហើយបំផ្លាញទ្រព្យសម្បត្តិក្នុងហាង ,ជេប្រមាថបុគ្គលិក និងយកកាំភ្លើងមកគំរាមបាញ់រូបលោកផងដែរ៕
Tag:
យោធា
បន្ទាយមានជ័យ
© រក្សាសិទ្ធិដោយ thmeythmey.com