ស្វាយរៀង ជួប ទ័ពដណ្តើមជើងឯក រីឯក្រុមសិង្ហបុរីប៉ះក្រុមម៉ាឡេស៊ីដណ្តើមលេខ៣រសៀលនេះ

កីឡាជាតិ

ស្វាយរៀង ជួប ទ័ពដណ្តើមជើងឯក រីឯក្រុមសិង្ហបុរីប៉ះក្រុមម៉ាឡេស៊ីដណ្តើមលេខ៣រសៀលនេះ

05, Feb 2017 , 1:17 pm

រូបភាព

ដោយ:

ក្រុមតំណាងកម្ពុជាទាំងពីរ ព្រះខ័នរាជស្វាយរៀង និងក្រសួងការពារជាតិត្រូវប្រជែងគ្នាក្នុងវគ្គផ្តាច់ព្រ័ត្រ ដើម្បីដណ្តើមជើងឯកពានរង្វាន់ Asian Club Pre-Season Championship 2017 ខណៈក្រុមមកពីសិង្ហបុរី ត្រូវជួបជាមួយក្រុមមកពីម៉ាឡេស៊ី ដើម្បីដណ្តើមយកចំណាត់ថ្នាក់លេខ៣។ ការប្រកួតនេះនឹងចាប់ផ្តើមពីម៉ោង៤រសៀលថ្ងៃទី៥ ខែកុម្ភៈ នៅពហុកីឡដ្ឋានជាតិ។

ក្រុមឈរកំពូលតារាងនៃវគ្គជម្រុះសន្សំពិន្ទុ ព្រះខ័នរាជស្វាយរៀង ត្រូវតទល់ជាមួយក្រុមឈរលំដាប់ទី២ ក្រសួងការពារជាតិក្នុងវគ្គផ្តាច់ព្រ័ត្រ ដើម្បីដណ្តើមជើងឯកពានរង្វាន់មិត្តភាពក្លិបបាល់ទាត់អាស៊ី២០១៧(Asian Club Pre-Season Championship 2017)។ ការប្រកួតនេះធ្វើឡើងនាវេលាម៉ោង៧យប់ថ្ងៃទី៥ ខែកុម្ភៈ នៅពហុកីឡដ្ឋានជាតិ។

សម្រាប់ការប្រកួតក្នុងវគ្គជម្រុះសន្សំពិន្ទុកន្លងទៅ ក្រុមព្រះខ័នរាជស្វាយរៀង បានយកឈ្នះក្រុមមកពីម៉ាឡេស៊ី Petaling Jaya Rangers FC ៣-១ ក្នុងថ្ងៃបើឆាក។ បន្ទាប់មកយកឈ្នះលើក្រុមមកពីសិង្ហបុរី Warriors FC ៤-១ ក្នុងជើងទី២ និងបន្តយកឈ្នះក្រសួងការពារជាតិ ១-០ ក្នុងជំនួបដែលកីឡាករ ប្រាក់ សុវណ្ណពិសិដ្ឋ កូនប្រុសបង្កើតរបស់លោក ប្រាក់ សុវណ្ណារ៉ា បាក់ឆ្អឹងដៃស្តាំជាពីរកំណាត់។

ចំណែកក្រសួងការពារជាតិក្នុងចំណោម៣ប្រកួតរបស់ខ្លួនគឺចាញ់១ និងឈ្នះ២ ក្នុងនោះឈ្នះក្រុម Warriors FC របស់សិង្ហបុរី ២-១ និងឈ្នះក្រុម Petaling Jaya Rangers FC របស់ម៉ាឡេស៊ី ២-១ មុនចាញ់ក្រុមព្រះខ័នរាជស្វាយ ១-០ ក្នុងជំនួបចុងក្រោយ។

ដោយឡែក នាវេលាម៉ោង៤រសៀលនៅពហុកីឡដ្ឋានជាតិដដែល ពោលគឺមុនការប្រកួតគូដណ្តើមជើងឯក ក៏មានការប្រកួតដណ្តើមយកចំណាត់ថ្នាក់លេខ៣ រវាងក្រុម Warriors FC របស់សិង្ហបុរី ជាមួយក្រុម Petaling Jaya Rangers FC របស់ម៉ាឡេស៊ីផងដែរ៕