អន្តរជាតិ
ព្រះអង្គម្ចាស់អារ៉ាប៊ីសាអូឌីតមួយអង្គនាំស្ទាំង៨០ក្បាលជិះយន្តហោះនៅកៅអី First Class
× រូបថតមួយសន្លឹកអំពីសត្វស្ទាំងចំនួន៨០ក្បាលដែលស្ថិតនៅក្នុងយន្តហោះ ត្រូវបានបង្ហោះឡើងលើកដំបូងនៅតាមបណ្តាញសង្គម Reddit កាលពីដើមសប្តាហ៍កន្លងមក។ បន្ទាប់មក គេឃើញសកម្មភាពដ៏មិនគួរឲ្យជឿនេះ ត្រូវបានបង្ហោះឡើងនៅលើ Youtube។
អ្នកបង្ហោះដំបូងនៅលើ Reddit បានអះអាងថា ខ្លួនបានទទួលរូបថតពីមិត្តភក្តិដែលជាអ្នកបើកបរយន្តហោះនៅក្រុមហ៊ុន Qatar Airways។ ប្រភពបានអះអាងថា ព្រះអង្គម្ចាស់មួយអង្គនៃប្រទេសអារ៉ាប៊ីសាអូឌីត បានទិញសំបុត្រយន្តហោះដល់សត្វស្ទាំងទាំង៨០ក្បាលរបស់ខ្លួនក្នុងការធ្វើដំណើរកម្សាន្ត ដោយពួកវាជិះនៅលំដាប់កៅអីជួរមុខ First Class។
បុរសដែលប្រើឈ្មោះថា Lensoo បានអះអាងនៅលើ Reddit ថា៖ «មិត្តម្នាក់ដែលជាអ្នកបើកយន្តហោះ បានផ្ញើរូបនេះមកខ្ញុំ។ ព្រះអង្គម្ចាស់អារ៉ាប៊ីសាអូឌីតមួយអង្គ បានទិញសំបុត្រយន្តហោះសម្រាប់សត្វស្ទាំងរបស់ព្រះអង្គ»។
តាមពិតទៅសកម្មភាពបែបនេះ មិនមែនជារឿងថ្មីនោះឡើយសម្រាប់ប្រទេសនៅតំបន់ឈូងសមុទ្រពែក្ស។ ក្រុមហ៊ុនអាកាសចរណ៍ជាច្រើន ដូចជា Etihad Airways, Emirates Airlines, Royal Jordanian Airline និង Qatar Airlines ជាដើមនោះ សុទ្ធតែបានអនុញ្ញាតឲ្យសត្វជិះលើយន្តហោះ។
បើតាមការផ្សាយរបស់ Fox News អ្វីដែលគួរឲ្យកត់សម្គាល់នោះ សត្វស្ទាំងទាំងនោះ សុទ្ធតែមានលិខិតឆ្លងដែន និងចងភ្ជាប់ជាមួយខ្សែក្រវាត់សុវត្ថិភាព។ អ្វីដែលគួរឲ្យកត់សម្គាល់នោះ កាលពីឆ្នាំ២០០២ ប្រទេសអារ៉ាប់រួមអេមីរ៉េត ក៏បានបង្កើតលិខិតឆ្លងដែនសម្រាប់សត្វ ជាពិសេសស្ទាំង ដែលរហូតមកសព្វថ្ងៃនេះ ឯកសារលិខិតឆ្លងដែនរាប់រយ ត្រូវបានផ្តល់ឲ្យសម្រាប់ដំណើរតាមយន្តហោះរបស់សត្វទាំងនោះ៕
ទស្សបានវីដេអូខាងក្រោម
Tag:
ស្ទាំង
អារ៉ាប៊ីសាអូឌីត
© រក្សាសិទ្ធិដោយ thmeythmey.com