បឹងកេតអង្គរ ជួប Lao Toyota នៅឡាវ ខណៈភ្នំពេញក្រោន ប៉ះ Home United នៅសិង្ហបុរី
07, Feb 2017 , 9:19 am
រូបភាព
×
ដោយ:
ក្រុមបាល់ទាត់តំណាងកម្ពុជាបឹងកេតអង្គរ និងភ្នំពេញក្រោនត្រូវជួបប្រកួតជើងទី២នៃវគ្គជម្រុះពានរង្វាន់ AFC Cup 2017 នាល្ងាចថ្ងៃទី៧ ខែកម្ភៈ នេះ។ ក្នុងនោះបឹងកេតអង្គរប្រជែងជាមួយក្រុម Lao Toyota នៅលើទឹកដីឡាវ ខណៈភ្នំពេញក្រោនតទល់ជាមួយក្រុម Home United នៅលើទឹកដីសិង្ហបុរី។
បឹងកេតអង្គរក្រោយពីអាចទប់ស្មើ ១-១ ជាមួយ Lao Toyota ដោយប្រើកីឡាករតែ៩នាក់ក្នុងជើងទី១នៅលើទឹកដីខ្លួនកាលពីចុងខែមករា កន្លងទៅ។ ក្រុមនេះត្រូវជួបប្រកួតជាមួយក្រុម Lao Toyota ក្នុងជើងទី២នៃវគ្គ Playoff Stage ពានរង្វាន់ AFC Cup 2017 នាល្ងាចថ្ងៃទី៧ ខែកុម្ភៈ នៅកីឡដ្ឋាន Lao National Staduim 16KM ក្នុងប្រទេសឡាវ។
ទាំងក្រុមបឹងកេតអង្គរ និង Lao Toyota ប្រសិនបើក្រុមណាមួយអាចយកឈ្នះក្នុងជំនួបល្ងាចនេះ នឹងទទួលបានកៅអីឡើងទៅលេងនៅពូល F ដែលមានក្លិបម៉ាឡេស៊ី Johor Darul Ta’zim ក្លិបមីយ៉ាន់ម៉ា Magwe និងក្លិបហ្វីលីពីន Global នៅរង់ចាំ។
នៅថ្ងៃដដែលនេះ ក្រុមភ្នំពេញក្រោនក្រោយរងបរាជ័យ ៣-៤ នៅលើទឹកដីខ្លួនក្នុងជើងទី១ ត្រូវបន្តតទល់ជាមួយក្រុមម្ចាស់ផ្ទះ Home United ក្នុងជើងទី២នៃវគ្គ Playoff នៅកីឡដ្ឋាន Jalan Besar Stadium ប្រទេសសិង្ហបុរី។
ភ្នំពេញក្រោនត្រូវធ្វើការខ្លាំងក្នុងជំនួបល្ងាចនេះ ព្រោះទាមទារឲ្យក្រុមនេះត្រូវយកឈ្នះក្រុមម្ចាស់ផ្ទះ Home United លើសពីមួយគ្រាប់ជាដាច់ខាត ដើម្បីទទួលកៅអីទៅលេងក្នុងពូល H ដែលមានក្រុម Yadanarbon របស់មីយ៉ាន់ម៉ា និង Than Quang Ninhរបស់វៀតណាម៕