កីឡាជាតិ
ជាតិ
គ្រូបង្វឹកភ្នំពេញក្រោនជឿជាក់ថា ក្រោននៅតែមានឱកាសឡើងទៅវគ្គចែកពូល AFC Cup
× ក្រុមភ្នំពេញក្រោននៅមានឱកាសឡើងទៅលេងក្នុងវគ្គចែកពូលពានរង្វាន់លំដាប់ទី២សម្រាប់ក្លិបបាល់ទាត់ប្រចាំទ្វីបអាស៊ី AFC Cup 2017 ប្រសិនបើអាចយកឈ្នះក្រុម Home United លើសពីមួយគ្រាប់ក្នុងជំនួបជើងទី២នៃវគ្គ Playoff នៅសិង្ហបុរី ល្ងាចនេះ។ ប៉ុន្តែឱកាសរបស់ភ្នំពេញក្រោនស្ថិតក្នុងភាគរយតិចក្រោយចាញ់ក្នុងជើងទី១។
ការចាញ់ក្រុម Home United ៤-៣ ក្នុងវគ្គជម្រុះជើងទី១លើទឹកដីខ្លួននៅកីឡដ្ឋាន RSN កាលពីចុងខែមករា កន្លងទៅ បានធ្វើឲ្យក្រុមភ្នំពេញក្រោន មានភាគរយតិចក្នុងការឡើងទៅកាន់វគ្គចែកពូលពានរង្វាន់ AFC Cup 2017 ជាងក្រុម Home United។ ប៉ុន្តែក្រុមនេះនៅមានឱកាសប្រសិនបើអាចយកឈ្នះ Home United លើសពីមួយគ្រាប់ក្នុងជើងទី២នៃវគ្គ Playoff នៅកីឡដ្ឋាន Jalan Besar Stadium ក្នុងប្រទេសសិង្ហបុរី នាវេលាម៉ោង៦លា្ងចនេះ។
ទោះបីជាយ៉ាងនេះក្តី គ្រូបង្វឹករបស់ភ្នំពេញក្រោន លោក សែម សំណាង (Sam Schweingruber) នៅតែមានការជឿជាក់ថា ភ្នំពេញក្រោននឹងអាចឡើងទៅកាន់វគ្គបន្ត ព្រោះក្រុមលោកមានទាំងកម្លាំង និងល្បឿន។«យើងមានគុណភាព និងកម្លាំង ប្រសិនបើយើងប្រើវាបានល្អ ខ្ញុំជឿជាក់ថា នឹងមានសំណាងឈ្នះក្នុងជំនួបល្ងាចនេះ»។ នេះជាសំដីរបស់គ្រូបង្វឹកភ្នំពេញក្រោន។
លោកគ្រូបង្វឹករូបនេះបានបញ្ជាក់ទៀតថា៖«អ្វីដែលសំខាន់បំផុតនោះគឺថា យើងមានការជឿជាក់ និងមានទស្សនវិស័យច្បាស់លាស់ យើងមិនមែនត្រូវការត្រឹមតែឈ្នះប៉ុណ្ណោះទេ គឺគោលដៅរបស់ពួកយើងត្រូវការឡើងទៅលេងក្នុងវគ្គចែកពូល AFC Cup 2017»។
ជាមួយគ្នានេះ ខ្សែប្រយុទ្ធដ៏ឆ្នើមរបស់ភ្នំពេញក្រោន Shane Booysen បានទាត់ទុកការបង្ហាញខ្លួនរបស់ភ្នំពេញក្រោននៅលើទឹកដីសិង្ហបុរី គឺដើម្បីប្រកួតយកជ័យជម្នះដែលពួកគេចង់បាន មិនមែនត្រឹមតែផ្តល់ឱកាសឲ្យកីឡាករវ័យក្មេងបង្ហាញសមត្ថភាពនោះឡើយ។ ដូច្នេះការគោរពចំពោះម្ចាស់ផ្ទះក្រុម Home United គឺទុកមួយឡែក។
«យើងមានការគោរពចំពោះម្ចាស់ផ្ទះ Home United និងកីឡាកររបស់ពួកគេ ប៉ុន្តែទុកនៅចុងបញ្ចប់នៃថ្ងៃនេះ។ យើងបានទុកការគោរពនេះមួយឡែក ហើយអ្វីសំខាន់គឺក្រុមរបស់យើងត្រូវការឈ្នះក្នុងជំនួបល្ងាចនេះ។ យើងមកទីនេះគឺដើម្បីប្រកួត និងទទួលបានលទ្ធផលដែលយើងចង់បាន។ យើងមិនមែនមកទីនេះត្រឹមតែផ្តល់ឱកាសឲ្យកីឡាករវ័យក្មេងប៉ុណ្ណោះទេ ប៉ុន្តែយើងចង់ឲ្យកម្ពុជាឈានទៅកាន់វគ្គបន្ត និងចង់បង្ហាញថា យើងអាចធ្វើវាបាន»៕
Tag:
បាល់ទាត់
ភ្នំពេញក្រោន
សែម សំណាង
AFC Cup 2017
© រក្សាសិទ្ធិដោយ thmeythmey.com