កណ្តាលស្វាគមន៍ត្បូងឃ្មុំ, ព្រះវិហារជួបឧត្តរមានជ័យ រីឯខេត្តកំពង់ធំប៉ះសៀមរាប

កីឡាជាតិ

ជាតិ

កណ្តាលស្វាគមន៍ត្បូងឃ្មុំ, ព្រះវិហារជួបឧត្តរមានជ័យ រីឯខេត្តកំពង់ធំប៉ះសៀមរាប

08, Feb 2017 , 9:59 am

រូបភាព

ក្រុមបាល់ទាត់សៀមរាប

ដោយ:

ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ប្រចាំឆ្នាំ២០១៧ បានឈានដល់សប្តាហ៍ទី៤ នៃវគ្គជម្រុះបឋមសន្សំពិន្ទុ ដោយនៅរសៀលថ្ងៃទី៨ ខែកុម្ភៈ នេះ មានការប្រកួតចំនួន៣គូដែលធ្វើឡើងនៅលើទីលាន៣ផ្សេងគ្នា។ ក្នុងនោះក្រុមកណ្តាលស្វាគមន៍ក្រុមត្បូងឃ្មុំក្នុងពូល B រីឯពូល C ម្ចាស់ផ្ទះព្រះវិហារជួបឧត្តរមានជ័យ ខណៈកំពង់ធំ ប៉ះ សៀមរាប។ ជំនួបថ្ងៃនេះក៏ជាការប្រកួតបញ្ចប់ជើងទី១ក្នុងដំណាក់កាលទី១ផងដែរ។

ពូល B នាវេលាម៉ោង៣រសៀលនេះ ក្រុមម្ចាស់ផ្ទះកណ្តាលនឹងបើកទ្វារកីឡដ្ឋានរបស់ខ្លួន ដើម្បីស្វាគមន៍ក្រុមភ្ញៀវត្បូងឃ្មុំ ក្នុងវគ្គជម្រុះសន្សំពិន្ទុពានរង្វាន់សម្តេច ហ៊ុន សែន ប្រចាំឆ្នាំ២០១៧ ក្នុងសប្តាហ៍ទី៤។ សម្រាប់ការជួបគ្នាជាលើកដំបូងនេះក្រុមទាំងពីរសុទ្ធតែរំពឹងទទួលបាន៣ពិន្ទុដូចគ្នា ព្រោះ១ប្រកួតដំបូងក្រុមទាំងពីរសុទ្ធតែបរាជ័យដូចគ្នាក្រោមថ្វីជើងព្រៃវែង ដោយក្នុងនោះកណ្តាលចាញ់ព្រៃវែង ៧-៣ ចំណែកត្បូងឃ្មុំចាញ់ព្រៃវែង ១២-០។

ចំណែកពូល C ក្រុមព្រះវិហារក្រោយរងបរាជ័យពីរប្រកួតជាប់គ្នាកាលពីកន្លងទៅ នៅរសៀលម៉ោង៣នេះ នឹងប្រើកីឡដ្ឋានរបស់ខ្លួនស្វាគមន៍ក្រុមឈរកំពូលកំពូលតារាង ឧត្តរមានជ័យ ក្នុងជំនួបលើកទី៣។ ព្រះវិហារ បានចាញ់ក្រុមសៀមរាប ៣-១ ក្នុងលើកទី១ ហើយបន្តចាញ់ក្រុមកំពង់ធំ ២-១ ក្នុងលើកទី២លើទឹកដីខ្លួន។

ជាមួយគ្នានេះ ក្រុមម្ចាស់ផ្ទះកំពង់ធំនឹងបើកទ្វារកីឡដ្ឋានខេត្តកំពង់ធំ ស្វាគមន៍ក្រុមជើងខ្លាំងសៀមរាប នាវេលាម៉ោង៣រសៀល ដើម្បីប្រជែងដណ្តើមយក៣ពិន្ទុ សម្រាប់រង់ចាំអ៊ុតលទ្ធផលរវាងក្រុមព្រះវិហារ និងឧត្តរមានជ័យក្នុងការឡើងឈរកំពូលតារាងពូល C។ ការប្រកួតពានរង្វាន់សម្តេច ហ៊ុន សែន ក្នុងសប្តាហ៍ទី៤នារសៀលនេះ ជាការប្រកួតបញ្ចប់ជើងទី១ ក្នុងដំណាក់កាលទី១នៃវគ្គសន្សំ៕

*កម្មវិធីប្រកួតពានរង្វាន់សម្តេច ហ៊ុន សែន ថ្ងៃទី៨ ខែកុម្ភៈ ឆ្នាំ២០១៧
- ម៉ោង៣:០០នាទី៖ ខេត្តកណ្តាល ជួប ខេត្តត្បូងឃ្មុំ នៅកីឡដ្ឋានខេត្តខេត្តកណ្តាល
- ម៉ោង៣:០០នាទី៖ ខេត្តព្រះវិហារ ជួប ខេត្តឧត្តរមានជ័យ នៅកីឡដ្ឋានខេត្តព្រះវិហារ
- ម៉ោង៣:០០នាទី៖ ខេត្តកំពង់ធំ ជួប ខេត្តសៀមរាប នៅកីឡដ្ឋាន ខេត្តកំពង់ធំ