ពីនេះ ពីនោះ
ព័ត៍មានសុខភាព
អត្ថប្រយោជន៍របស់ប្រទាលកន្ទុយក្រពើដែលអាចផ្តល់ឲ្យស្បែករបស់អ្នក
× ប្រទាលកន្ទុយក្រពើគឺជារុក្ខជាតិដ៏ពេញនិយមបំផុតសម្រាប់ពេលបច្ចុប្បន្ន ដោយសារតែវាផ្ទុកទៅដោយជីវជាតិជាច្រើនដែលមានប្រយោជន៍សម្រាប់សុខភាពនៅពេលប្រើប្រាស់បានត្រឹមត្រូវ។ យ៉ាងណាមិញ មិនមែនមានមនុស្សច្រើនដឹងអំពីភាពខ្លាំងរបស់រុក្ខជាតិមួយនេះនៅឡើយទេ។
នៅក្នុងប្រទាលកន្ទុយក្រពើត្រូវបានបង្កប់ដោយសារធាតុសំខាន់ៗពីរយ៉ាងនោះគឺជាជែល ហើយមួយទៀតគឺជាតិជ័រ ដែលវាសុទ្ធសឹងតែផ្ទុកទៅដោយជាតិទឹក និងជីវជាតិជាច្រើនដែលធ្វើឲ្យរុក្ខជាតិមួយនេះសំខាន់សម្រាប់គេហដ្ឋានមនុស្សគ្រប់គ្នា។
ដូច្នេះដើម្បីដឹងថា ប្រទាលកន្ទុយក្រពើមានភាពខ្លាំងអ្វីខ្លះសម្រាប់ជាប្រយោជន៍ដល់សុខភាពស្បែកយើង ចូរតាមដានជាមួយខ្ញុំដូចតទៅ៖
កាត់បន្ថយស្នាមសង្វា
ស្នាមសង្វាអាចនឹងកើតឡើងនៅពេលដែលធាត់ មានផ្ទៃពោះ ឬរីកសាច់ដុំ។ សម្រាប់ជាលិកាដែលស្ថិតនៅខាងក្រោមស្បែកនឹងត្រូវបានរហែក ដែលជាហេតុនាំឲ្យកើតជាផ្នត់ៗនៅស្បែកខាងលើហើយចេញជាស្នាមសង្វាតែម្តង។ សំណាងដែរ ការប្រើជែលប្រទាលកន្ទុយក្រពើមកលាបលើស្បែកអាចលុបបំបាត់ស្នាមសង្វានេះបាន។
ព្យាបាលជំងឺមុន
សម្រាប់យុវវ័យ និងមនុស្សធំដែលកើតមុនលើស្បែកមិនចេះចប់នោះ មិនមែនមានន័យថា អ្នកមិនអាចដោះស្រាយវាបាននោះទេ។ មធ្យោបាយមួយដើម្បីព្យាបាលជំងឺមុន គឺប្រើជែលរបស់ប្រទាលកន្ទុយក្រពើលាយជាមួយនឹងទឹកក្រូចឆ្មាពីរបីដំណក់ ហើយលាបវាលើកន្លែងដែលមានបញ្ហានោះទៅ។
ព្យាបាលបញ្ហារលាកស្បែកដោយសារពន្លឺព្រះអាទិត្យ
ការចំណាយពេលច្រើនដើរហាលថ្ងៃ គឺជារឿងចៀសមិនផុត តែក៏អាចបណ្តាលឲ្យរលាកស្បែក និងមានអារម្មណ៍ឈឺដែរនៅពេលប៉ះវាម្តងៗ។ ប៉ុន្តែការប្រើជែលប្រទាលកន្ទុយក្រពើលាបពីលើ នឹងជួយស្បែកឲ្យនៅល្អវិញ ព្រមទាំងជំរុញដល់ការជាពីការរលាកទៀត។
ព្យាបាលការឈឺចាប់ដោយសារសត្វល្អិតទិច ឬខាំ
អត្ថប្រយោជន៍មួយផ្សេងទៀតរបស់ប្រទាលកន្ទុយក្រពើលើស្បែកគឺថា វាអាចជួយព្យាបាលការឈឺចាប់ដោយសារសត្វល្អិតទិច ឬខាំបាន តាមរយៈការលាបជែលប្រទាលកន្ទុយក្រពើនេះ។
ទប់ស្កាត់អាការៈនៃភាពចាស់
ភាពជ្រីវជ្រួញទំនងជានឹងកើតមានលើផ្ទៃមុខនៅពេលអាយុកាន់តែច្រើន ប៉ុន្តែមានកត្តាច្រើនណាស់ដែលអាចបង្កើនល្បឿននៃការចេញស្នាមជ្រីវជ្រួញនេះ។ បើសិនជាអ្នកចង់បន្ថយល្បឿនរបស់វា សូមកុំបារម្ភអី ព្រោះប្រទាលកន្ទុយក្រពើអាចជួយបាន៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com