ជាតិ
លោក អំ សំអាត ចូលបំភ្លឺនៅតុលាការ ក្នុងនាមជាជនសង្ស័យ នៅម៉ោង៣រសៀលនេះ
× ភ្នំពេញ៖ លោក ច័ន្ទ ពុទ្ធស័ក្ត តំណាងសហគមន៍បឹងកក់ បានដើរចូលក្នុងតុលាការហើយ នៅម៉ោងជាង២រសៀលនេះ ដើម្បីបំភ្លឺជុំវិញអំពើហិង្សា កាលពីឆ្នាំ២០១៦។ រហូតដល់ម៉ោង៣រសៀល លោក អំ សំអាត មន្ត្រីជាន់ខ្ពស់នៃអង្គការលីកាដូ ក៏នឹងចូលបំភ្លឺនៅតុលាការផងដែរ ពាក់ព័ន្ធនឹងអំពើហិង្សាខាងលើ។
ខណៈពេលនេះ លោក លោក ច័ន្ទ ពុទ្ធិស័ក្ដ តំណាងសហគមន៍បឹងកក់ កំពុងបំភ្លឺនៅចំពោះមុខព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ជុំវិញអំពើហិង្សា កាលពីឆ្នាំ២០១៦កន្លងទៅ។ ចំណែកឯ លោក សំអាត ប្រធានផ្នែកឃ្លាំមើលនិងការពារសិទ្ធិមនុស្ស នៃអង្គការលីកាដូ ដែលរងការវាយដំក្នុងអំពើហិង្សានេះ ហើយត្រូវបានចាត់ទុកថាជាជនសង្ស័យដែរនោះ កំពុងតែផ្តល់បទសម្ភាសដល់ក្រុមអ្នកសារព័ត៌មាន នៅមុខសាលាដំបូងរាជធានីភ្នំពេញ មុននឹងលោក ចូលទៅបំភ្លឺ នៅម៉ោង៣រសៀល។
ដោយឡែក ប្រជាពលរដ្ឋមួយចំនួន កំពុងតែប្រមូលផ្តុំគ្នានៅមុខសាលាដំបូងរាជធានីភ្នំពេញ ដើម្បីបង្ហាញការគាំទ្រ និងលើកទឹកចិត្ត ដល់លោក អំ សំអាត និងលោក ច័ន្ទ ពុទ្ធិស័ក្ត។
ទាក់ទងនឹងបញ្ហាខាងលើ អង្គការលីកាដូ បានចេញសេចក្តីថ្លែងការណ៍មួយ ដោយអះអាងថា លោក អំ សំអាត រួមទាំងលោក ច័ន្ធ ពុទ្ធិស័ក្ត គឺជាជនរងគ្រោះ ដែលរងការវាយដំពីសំណាក់សមត្ថកិច្ច ដូច្នេះអ្នកទាំងពីរ មិនគួរណាត្រូវបានតុលាការ ចាត់ទុកថាជនសង្ស័យនោះទេ។
យ៉ាងណា លោក អំ សំអាត បានបញ្ជាក់ថា ការដែលព្រះរាជអាជ្ញា ចាត់ទុកលោក ថាជាជនសង្ស័យបែបនេះ គឺយោងទៅតាមរបាយការណ៍ដែលសមត្ថកិច្ចបានបញ្ជូនទៅ។ លោក អំ សំអាត បានអះអាងថា មន្ត្រីប៉ូលិស បានបញ្ជូនរបាយការណ៍ទៅឲ្យព្រះរាជអាជ្ញា ដោយចោទលោកថា ជាជនសង្ស័យ ក្នុងអំពើហិង្សានេះ។
សូមរម្លឹកថា កាលពីថ្ងៃទី១០ ខែតុលា ឆ្នាំ២០១៦ អំពើហិង្សាមួយបានកើតឡើង ដោយការប៉ះទង្គិចគ្នារវាងប្រជាពលរដ្ឋ និងអាជ្ញាធរខណ្ឌដូនពេញ ក្នុងពិធីដង្ហែក្បួនប្រារព្ធទិវាលំនៅដ្ឋានពិភពលោក។ កាលនោះ លោក អំ សំអាត ធ្លាប់និយាយថា លោក បានចូលទៅឃាត់សមត្ថកិច្ច និងប្រជាពលរដ្ឋ កុំឲ្យប្រើអំពើហិង្សាដាក់គ្នា។ ប៉ុន្តែ នៅពេលលោក អំ សំអាត កំពុងចូលឃាត់ ស្រាប់តែកម្លាំងសមត្ថកិច្ចខណ្ឌដូនពេញ បានប្រើកណ្ដាប់ដៃវាយលោកតែម្ដង៕
Tag:
តុលាការ
ច័ន្ទ ពុទ្ធិស័ក្ត
អំ សំអាត
© រក្សាសិទ្ធិដោយ thmeythmey.com