កីឡាជាតិ
ជាតិ
បឹងកេតអង្គរនិងការពារជាតិ ប្រជែងយកពាន Charity Cup មុនបើករដូវកាលថ្មី
× មុនបើករដូវកាលពានរង្វាន់លីកកំពូលកម្ពុជាប្រចាំឆ្នាំ២០១៧ ម្ចាស់ការពារតំណែងជើងឯក បឹងកេតអង្គរ ត្រូវប្រជែងគ្នាជាមួយក្រុមក្រសួងការពារជាតិដែលជាម្ចាស់ពានរង្វាន់សម្តេច ហ៊ុន សែន ក្នុងពានរង្វាន់សប្បុរសធម៌ស៊ីអិនស៊ីស៊ីឆ្នាំ២០១៧(CNCC Charity Cup 2017) នាថ្ងៃទី១២ ខែកុម្ភៈ នៅពហុកីឡដ្ឋានជាតិ។
ក្រុមបឹងកេតអង្គរ និងក្រសួងការពារជាតិមុនបំពេញបេសកកម្មក្នុងពានរង្វានក្របខ័ណ្ឌមិត្តហ្វូនខេមបូឌានលីកប្រចាំឆ្នាំ២០១៧ (Cambodian League 2017)។ នៅថ្ងៃទី១២ ខែកុម្ភៈ ខាងមុខនេះ ក្រុមទាំងពីរត្រូវជួបប្រកួតគ្នាក្នុងពានរង្វាន់សប្បុរសធម៌ស៊ីអិនស៊ីស៊ីឆ្នាំ២០១៧(CNCC Charity Cup 2017) នៅពហុកីឡដ្ឋានជាតិ។
ពានរង្វាន់ដែលរៀបចំដោយគណៈកម្មការប្រកួតបាល់ទាត់ជាតិ(CNCC) នេះ ធ្វើឡើងក្នុងគោលបំណងដើម្បីប្រមូលថវិកាដែលបានមកពីការលក់សំបុត្រចូលរួមទស្សនា និងការឧបត្ថម្ភផ្សេងៗ សម្រាប់ជួយដល់អង្គការស្ថាប័ននានាដែលធ្វើការបម្រើឲ្យមនុស្សធម៌។ សំបុត្រចូលរួមទស្សនាមានពីរប្រភេទក្នុងនោះកន្លែងមានដំបូលតម្លៃ៥ពានរៀល និងកន្លែងអត់ដំបូលតម្លៃ៣ពាន់រៀល។
គណៈកម្មការប្រកួតបាល់ទាត់ជាតិ(CNCC) ត្រូវបានសហព័ន្ធកីឡាបាល់ទាត់កម្ពុជាបង្កើតឡើងតាំងពីខែវិច្ឆិកា ឆ្នាំ២០១៦ ប៉ុន្តែបានប្រកាសជាផ្លូវការនៅថ្ងៃទី២២ ខែមករា ឆ្នាំ២០១៧។ ស្ថាប័ននេះបង្កើតឡើង ដើម្បីទទួលបន្ទុករៀបចំការប្រកួតពានរង្វាន់សម្តេច ហ៊ុន សែន និងលីកកំពូលកម្ពុជា ឲ្យកាន់តែមានគុណភាពល្អប្រសើរ។
គួរបញ្ជាក់ថា ក្រុមបឹងកេតអង្គរ និងក្រសួងការពារជាតិ នឹងជួបប្រកួតគ្នាក្នុងថ្ងៃបើកឆាកពានរង្វាន់ក្របខ័ណ្ឌលីកកំពូលកម្ពុជា Cambodian League 2017 នាថ្ងៃទី១៨ ខែកុម្ភៈ ខាងមុខ នៅពហុកីឡដ្ឋានជាតិ។ ក្រៅពីនេះក៏មានការប្រកួតពីគូទៀតផងដែរ ក្នុងនោះក្រុមអគ្គិសនីកម្ពុជាជួបណាហ្គាវើលនៅកីឡដ្ឋានស្វាយរៀង ខណៈក្រុមខេមបូឌានថាយហ្គឺរ ជួប ស៊ីម៉ាក់ នៅកីឡដ្ឋានសៀមរាប។ សំបុត្រចូលរួមទស្សនាមានតម្លៃ៣ពាន់រៀល និង៥ពាន់រៀល៕
Tag:
បាល់ទាត់
CNCC
Cambodian League 2017
© រក្សាសិទ្ធិដោយ thmeythmey.com