ត្បូងឃ្មុំទទួលបាន៣ពិន្ទុពីម្ចាស់ផ្ទះកណ្តាល ខណៈជំនួបបីគូទៀតស្មើគ្នា

កីឡាជាតិ

ត្បូងឃ្មុំទទួលបាន៣ពិន្ទុពីម្ចាស់ផ្ទះកណ្តាល ខណៈជំនួបបីគូទៀតស្មើគ្នា

09, Feb 2017 , 12:07 pm

រូបភាព

ក្រុមកីឡាករបាល់ទាត់ខេត្តព្រះវិហារ។ រូបថត Preah Vihear City ft

ដោយ:

ក្រុមបាល់ទាត់ត្បូងឃ្មុំទទួលបាន៣ក្រោយយកឈ្នះក្រុមម្ចាស់ផ្ទះកណ្តាល ៥-២ ចំណែកក្រុមព្រះវិហារ, ឧត្តរមានជ័យ, កំពង់ធំ, សៀមរាប, កំពង់ឆ្នាំង និងបាត់ដំបងទទួលបាន១ពិន្ទុរៀងៗខ្លួន នាការប្រកួតបញ្ចប់ជើងទី១ពានរង្វាន់សម្តេច ហ៊ុន សែន ប្រចាំឆ្នាំ២០១៧ កាលពីម្សិលមិញ។

ការប្រកួតបញ្ចប់ជើងទី១ដំណាក់កាលទី១នៃវគ្គសន្សំពិន្ទុពានរង្វាន់សម្តេច ហ៊ុន សែន ប្រចាំឆ្នាំ២០១៧ កាលពីថ្ងៃទី៩ ខែកុម្ភៈ ក្រុមត្បូងឃ្មុំបានលត់ក្រុមកណ្តាល ៥-២ ដល់ផ្ទះ ដើម្បីទទួលបាន៣ពិន្ទុសម្រាប់ឈរលំដាប់ទី២ក្នុងពូល B ដោយមាន៣ពិន្ទុ ខណៈព្រៃវែងឈរកំពូលតារាងដោយមាន៦ពិន្ទុ និងកណ្តាលឈរបាតតារាងមាន០ពិន្ទុ។

រីឯពូល C ក្រុមម្ចាស់ផ្ទះព្រះវិហារ ចែកពិន្ទុជាមួយ ឧត្តរមានជ័យក្រោយរក្សាលទ្ធផលស្មើ ០-០។ ឧត្តរមានជ័យឈរកំពូលតារាងដោយមាន៧ពិន្ទុ ខណៈព្រះវិហារឈរបាតតារាងដោយមាន១ពិន្ទុ។ ពូល C ដដែល ក្រុមកំពង់ធំក៏ចែកម្នាក់១ពិន្ទុជាមួយសៀមរាបផងដែរ ក្រោយរក្សាលទ្ធផលស្មើ ១-១ នៅលើកីឡដ្ឋានខេត្តកំពង់ធំ។ ក្រុមសៀមរាបឈរលំដាប់ទី២ដោយមាន៤ពិន្ទុ រីឯកំពង់ធំឈរលំដាប់ទី២ជាមួយ៤ពិន្ទុដូចគ្នា ប៉ុន្តែចាញ់គ្រាប់បាល់ចំណេញក្រុមសៀមរាប។

ចំណែកពូល D ក្រុមកំពង់ឆ្នាំង និងបាត់ដំបងទទួលបានម្នាក់១ពិន្ទុនៅលើទឹកដីខេត្តកំពង់ឆ្នាំង បន្ទាប់ពីក្រុមទាំងពីររក្សាលទ្ធផលស្មើ ១-១។ ក្នុងពូល D ក្រុមបាត់ដំបងឈរកំពូលតារាងដោយមាន៤ពិន្ទុ រីឯកំពង់ឆ្នាំងឈរលំដាប់ទី២ដោយាមាន២ពិន្ទុ និងប៉ៃលិនឈរបាតតារាងដោយមាន១ពិន្ទុ។

ជើងទី២ដំណាក់ទី១នៃសន្សំពិន្ទុពានរង្វាន់សម្តេច ហ៊ុន សែន ប្រចាំឆ្នាំ២០១៧ នឹងចាប់ផ្តើមនៅថ្ងៃទី១៥ ខែកុម្ភៈ សប្តាហ៍ក្រោយនេះ។ ក្នុងវគ្គជម្រុះជើងទី២នេះ ដោយមានការចូលរួមបន្ថែមពីក្រុមតាកែវ និងកំពង់ស្ពឺ ក្រុមទាំងពីរស្ថិតនៅក្នុងពូល A៕

លទ្ធផលពានរង្វាន់សម្តេច ហ៊ុន សែន ប្រចាំថ្ងៃទី០៨ ខែកុម្ភៈ ឆ្នាំ២០១៧

- ពូល B៖ កណ្តាល ២-៥ ត្បូងឃ្មុំ នៅកីឡដ្ឋានខេត្តកណ្តាល

- ពូល C៖ ព្រះវិហារ ០-០ ឧត្តរមានជ័យ នៅកីឡដ្ឋានខេត្តព្រះវិហារ

- ពូល C៖ កំពង់ធំ ១-១ សៀមរាប នៅកីឡដ្ឋានខេត្តកំពង់ធំ

- ពូល D៖ កំពង់ឆ្នាំង ១-១ បាត់ដំបង នៅកីឡដ្ឋានខេត្តកំពង់ឆ្នាំង