អ្នកលេងគុនខ្មែរចម្រុះ វី ស្រីខួច ប៉ះកីឡាការិនី Ann Osman នៅម៉ាឡេស៊ីថ្ងៃនេះ
10, Feb 2017 , 1:42 pm
រូបភាព
×
ដោយ:
កីឡាការិនី វី ស្រីខួច អ្នកលេងក្បាច់គុនចម្រុះរបស់កម្ពុជា ដែលកំពុងលេចធ្លោរនៅកម្ពុជាត្រូវជួបប្រកួតជាមួយកីឡាការិនី Ann Osman អ្នកលេងគុនចម្រុះជើងខ្លាំងរបស់ម៉ាឡេស៊ីក្នុងព្រឹត្តិការណ៍ One Championship 2017 នៅប្រទេសម៉ាឡេស៊ី ថ្ងៃនេះ។
អ្នកលេងគុនខ្មែរចម្រុះ វី ស្រីខួច ដែលមានបទពិសោធន៍តិចតួចនៅលើសង្វៀនប្រកួតក្បាច់ចម្រុះក្នុងទ្រុង(MMA) ត្រូវតទល់ជាមួយអ្នកលេងគុនចម្រុះចាស់វស្សារបស់ម៉ាឡេស៊ី Ann Osman ដែលមានបទពិសោធន៍ច្រើនជាងខ្លួន ក្នុងព្រឹត្តិការណ៍ One Championship 2017 នាល្ងាចថ្ងៃទី១០ ខែកុម្ភៈ នេះ។ ការប្រកួតនេះធ្វើឡើងនៅក្នុងពហុកីឡដ្ឋាន NEGARA ក្នុងទីក្រុងកូឡាឡាំពួរ ប្រទេសម៉ាឡេស៊ី។
ងាកមកមើល Ann Osman ឯណេះវិញ នាងធ្លាប់ឆ្លងកាត់ការប្រកួតរហូតដល់៧ដង ក្នុងនោះឈ្នះ៤ដង និងចាញ់៣ដង។ ប៉ុន្តែអ្វីដែលគួរឲ្យកត់សម្គាល់ក្នុងជ័យជម្នះ៤ដង គឺ Osman បានយកឈ្នះលើកីឡាការិនីអេហ្ស៊ីបចំនួន៣លើក និងអាមេរិក១លើក។
ជ័យជម្នះទាំងនោះរួមមាននៅខែកក្កដា ឆ្នាំ២០១៦ Osman បានយកឈ្នះកីឡាការិនីអេហ្ស៊ីប Haiat Farag Youssef, កីឡាការិនីអេហ្ស៊ីប Walaa Abbas Mohamed Kamaly នៅខែមីនា ឆ្នាំ២០១៥, កីឡាការិនីអេហ្ស៊ីប Aya Saber នៅខែតុលា ឆ្នាំ២០១៤ និឈ្នះកីឡាការិនីអាមេរិក Ana Julaton នៅខែសីហា ឆ្នាំ២០១៤។
ចំណែកការចាញ់៣ដងរបស់ Osman រួមមាន៖ ចាញ់កីឡាការិនីសិង្ហបុរី Sherilyn Lim នៅខែតុលា ឆ្នាំ២០១៣, កីឡាការិនីរុស្ស៊ី Irina Mazepa នៅខែតុលា ឆ្នាំ២០១៥ និងចាញ់កីឡាការិនីហ្វីលីពិន April Osenio នៅខែកញ្ញា ឆ្នាំ២០១៦ កន្លងទៅ៕