ជាតិ
ព័ត៍មានសុខភាព
CDC ប្រាប់ឲ្យពលរដ្ឋបង្ការ និងប្រុងប្រយ័ត្នជំងឺពងបែកដៃ ជើង និងក្នុងមាត់
× ភ្នំពេញ៖ នាយកដ្ឋានប្រយុទ្ធនឹងជំងឺឆ្លង CDC នៃក្រសួងសុខាភិបាល បានចេញសារជាសំណួរ ចម្លើយ ដែលទាក់ទងនឹង ជំងឺពងបែកដៃ ជើង និងក្នុងមាត់។ នាយកដ្ឋានប្រយុទ្ធនឹងជំងឺឆ្លង បញ្ជាក់ថា កន្លងមកថ្មី ជំងឺពងបែកនៅលើដៃ ជើង និងក្នុងមាត់ ហាក់មានការកើនឡើង។ នេះបើតាមទំព័រហ្វេសប៊ុកផ្លូវការរបស់CDC។
នាយកដ្ឋានប្រយុទ្ធប្រឆាំងនឹងជំងឺឆ្លង បញ្ជាក់ថា កន្លងមកនេះ CDC ទទួលបានរបាយការណ៍ពីការកើនឡើងនៃជំងឺពងបែកលើដៃ ជើង និងក្នុងមាត់។ ហេតុនេះ CDC ណែនាំឲ្យអាណាព្យាបាល ឪពុកម្ដាយ និងប្រជាពលរដ្ឋទាំងអស់ប្រុងប្រយ័ត្នឲ្យបានខ្ពស់ ក្នុងការបង្ការ និងព្យាបាលជំងឺនេះឲ្យបានទាន់ពេលវេលា។
បើតាមនាយកដ្ឋានប្រយុទ្ធប្រឆាំងនឹងជំងឺឆ្លង ជំងឺពងបែកដៃ ជើង និងក្នុងមាត់ (HFMD) គឺជាជំងឺឆ្លងមួយកើតឡើងជាញឹកញាប់ចំពោះទារក និងកុមារ។ ជំងឺនេះ មានរោគសញ្ញា គ្រុនក្ដៅ មានដំបៅឈឺក្នុងមាត់ និងមានកន្តួលលើបាតដៃ បាត់ជើង។ ម្យ៉ាងទៀត ជំងឺនេះ កើតមាននៅក្នុងប្រទេសជាច្រើនពេញទូទាំងពិភពលោក។
ជំងឺពងបែក ដៃ ជើង និងក្នុងមាត់ ភាគច្រើនជាជំងឺស្រាល ហើយអ្នកដែលកើតជំងឺនេះ ស្ទើរតែទាំងអស់ជាសះស្បើយក្នុងរយៈពេលពី៧ ទៅ១០ ថ្ងៃ។ ជាកម្រជំងឺនេះ អាចបង្ករឲ្យមានផលលំបាកធ្ងន់ធ្ងរមួយចំនួន រួមមាន រោគសញ្ញាប្រព័ន្ធប្រសាទ និងរោគសញ្ញាផ្លូវដង្ហើម។ ជំងឺនេះ កើតឡើងចំពោះកុមារអាយុក្រោម ១០ឆ្នាំ ហើយកុមារតូចៗងាយនឹងមានរោគសញ្ញាធ្ងន់ធ្ងរ។
ជាមួយគ្នានេះ ឪពុកម្ដាយ ឬអាណាព្យាបាលត្រូវនាំកុមារទៅមន្ទីរពេទ្យ បើកុមារទាំងនោះ មានអាការៈដូចជា ក្អូត ពិបាកដកដង្ហើម ប្រកាច់ ឬទន់ដៃទន់ជើងជាដើម។ ដោយឡែក ជំងឺនេះ អាចការពារបាន ដោយការអនុវត្តន៍អនាម័យល្អ និងបញ្ជូនកូនទៅពេទ្យទាន់ពេលវេលា ប្រសិនបើធ្ងន់ធ្ងរ។ ជាពិសេស ដើម្បីការពារជំងឺនេះ ត្រូវលាងសម្អាតដៃឲ្យបានស្អាតមុនពេលទទួលទានអាហារ សម្រាប់កុមារក្រោយប្ដូរទ្រនាប់ខោ ត្រូវសម្អាត និងជូតឲ្យបានស្អាត។ ដើម្បីជៀសវាងការប៉ះពាល់ស្និតស្នាល ជាមួយកុមារដែលមានជំងឺនេះ ដើម្បីកាត់បន្ថយការឆ្លងផងដែរ។
គួរបញ្ជាក់ថា ជំងឺពងបែក ដៃជើង និងក្នុងមាត់ បណ្ដាលមកពី មេរោគវីរុសដែលស្ថិតនៅក្នុងក្រុម Enterovirus ជាអ្នកបង្ក ជំងឺពងបែក ដៃជើង និងក្នងមាត់ភាគច្រើនបង្កឡើងដោយ coxsackievirus តែក៏អាចបង្ករដោយមេរោគ enterovirus 71 (EV71)ផងដែរ។ ជំងឺនេះ អាចឆ្លងពីមនុស្សម្នាក់ទៅមនុស្សម្នាក់ ដោយការប៉ះពាល់ផ្ទាល់ជាមួយ នឹងវត្ថុរាវ នៃផ្លូវដង្ហើម និងទឹករងៃដែលចេញពីពងបែក។ ជំងឺនេះ អាចចម្លងខ្លាំងបំផុតក្នុងសប្ដាហ៍ទី១។ សម្រាប់ព័ត៌មានបន្ថែម អាចទាក់ទងតាមលេខទូរសព្ទ ១១៥៕
Tag:
CDC
ពងបែកដៃ ជើង និងក្នុងមាត់
© រក្សាសិទ្ធិដោយ thmeythmey.com