អត្តពលិកជិត៤ពាន់នាក់ចូលរួមរត់ប្រណាំងនៅកោះពេជ្រ

កីឡាជាតិ

ជាតិ

អត្តពលិកជិត៤ពាន់នាក់ចូលរួមរត់ប្រណាំងនៅកោះពេជ្រ

12, Feb 2017 , 9:11 am

រូបភាព

ដោយ:

អត្តពលិកជាតិ និងអន្តរជាតិប្រមាណជាជិត៤ពាន់នាក់បានចូលរួមរត់ប្រណាំងអន្តរជាតិដើម្បីទាំងអស់គ្នានៅព្រឹកថ្ងៃអាទិត្យទី១២ ខែកុម្ភៈ នៅមជ្ឈមណ្ឌលកម្សាន្តកោះពេជ្រ។ អត្តពិកទាំងនេះប្រកួតប្រជែងលើវិញ្ញាសារត់ចម្ងាយ៥គីឡូម៉ែត្រ ដើរចងជើងជាគូចម្ងាយ២០០ម៉ែត្រ និងមានល្បែងកម្សាន្តផ្សេងៗទៀត។

នៅព្រឹកថ្ងៃទី១២ ខែកុម្ភៈ គណៈកម្មការកីឡានិងស្រី សហការជាមួយគណៈកម្មាធិការជាតិអូឡាំពិកកម្ពុជា បានរៀបចំទិវារត់ប្រណាំងអន្តរជាតិដើម្បីទាំងគ្នា ដើម្បីបំផុសការអប់រំដល់យុវវ័យពីអត្ថន័យទិវាបុណ្យនៃក្តីស្រលាញ់ថ្ងៃទី១៤ ខែកុម្ភៈ។ ប៉ុន្តែនៅមានយុវវ័យមួយចំនួនយល់ច្រឡំថា ជាថ្ងៃបុណ្យសង្សារ នឹងជាថ្ងៃដែលពួកគេត្រូវលះបង់អ្វីគ្រប់យ៉ាងដើម្បីមនុស្សជាទីស្រលាញ់ ដែលជាហេតុធ្វើឲ្យប្រាសចាកវប្បធម៌ប្រពៃណីរបស់ខ្មែរ។

អាស្រ័យហេតុនេះហើយទើបគណៈកម្មការកីឡានិងស្ត្រីកម្ពុជា បានសហការជាមួយ NOCC និងសាលារាជធានីភ្នំពេញបង្កើតឲ្យមានទិវានេះឡើង ដើម្បីផ្លាស់ប្តូរផ្នត់គំនិតខុសឆ្គងទាំងនេះ។ «យើងរៀបទិវានេះឡើងដើម្បីអប់រំផ្នត់គំនិតយុវវ័យឲ្យយល់ដឹងពីអត្ថន័យថ្ងៃ១៤ កុម្ភៈ ដែលជាទិវាវប្បធម៌បរទេស។ ដូច្នេះយុវវ័យគួរគប្បីយល់ដឺង និងឲ្យនិយមន័យនៃក្តីស្រឡាញ់ ពោលគឺមិនមែនជាថ្ងៃដែលត្រូវលះបង់អ្វីៗនោះឡើយ ព្រោះវាផ្ទុយពីវប្បធម៌ខ្មែរ»។ នេះជាការប្រសាសន៍របស់លោក វ៉ាត់ ចំរើន អគ្គលេខាធិការ NOCC។

ទិវារត់ប្រណាំងដើម្បីទាំងអស់គ្នានេះដែលរៀបចំឡើងនៅមជ្ឈមណ្ឌលកោះពេជ្រមានអត្តពលិកជាតិ និងអន្តរជាតិប្រមាណជាជិត៤ពាន់នាក់ចូលរួម។ ថវិកាដែលបានពីការចុះឈ្មោះចូលរួម និងការឧបត្ថម្ភផ្សេងៗនឹងយកទៅប្រើប្រាស់ដើម្បីបម្រើដល់អំពើមនុស្សធម៌។ សម្រាប់វិញ្ញាសាដែលត្រូវប្រកួតប្រជែងរួមមានរត់ប្រណាំងចម្ងាយ៥គីឡូម៉ែត្រ ដើរចងជើងជាគូចម្ងាយ១០០ម៉ែត្រ និងរត់គៀបប៉េងប៉ោងចម្ងាយ១០០ម៉ែត្រ៕