សហព័ន្ធកីឡាបាល់ទាត់កម្ពុជាប្រកាសរៀបចំការប្រកួតជើងឯកក្នុងសាលប្រចាំឆ្នាំ២០១៧

កីឡាជាតិ

ជាតិ

សហព័ន្ធកីឡាបាល់ទាត់កម្ពុជាប្រកាសរៀបចំការប្រកួតជើងឯកក្នុងសាលប្រចាំឆ្នាំ២០១៧

14, Feb 2017 , 4:35 pm

រូបភាព

ដោយ:

សហព័ន្ធកីឡាបាល់ទាត់កម្ពុជា(FFC)នៅថ្ងៃទី១៤ ខែកុម្ភៈ បានចេញសេចក្តីជូនដំណឹងប្រកាសរៀបចំការប្រកួតបាល់ទាត់ដណ្តើមពានរង្វាន់ជើងឯក Futsal ប្រចាំឆ្នាំ២០១៧ ដោយចាប់ផ្តើមនាដើមខែមេសា ខាងមុខនេះ។ ការប្រកួតនេះមិនអនុញ្ញាតឲ្យកីឡាករដែលលេងក្នុងពានរង្វាន់សម្តេច ហ៊ុន សែន, មិត្តហ្វូនខេមបូឌានលីក និងខេមបូឌានលីក២ក្នុងឆ្នាំ២០១៧ ចូលរួមនោះទេ។

ដោយមើលឃើញពីការរីកចម្រើននៃវិស័យបាល់ទាត់នៅតាមទីលានខ្នាតតូច និងដើម្បីចូលរួមចំណែកជួយលើកស្ទួយកីឡាបាល់ទាត់កម្ពុជាឲ្យកាន់តែរីកចម្រើន សហព័ន្ធកីឡាបាល់ទាត់កម្ពុជា នឹងរៀបចំឲ្យមានការប្រកួតបាល់ទាត់ដណ្តើមជើងឯក Futsal ប្រចាំឆ្នាំ២០១៧។ ការប្រកួតនេះនឹងធ្វើឡើងចាប់ពីថ្ងៃទី១ ខែមេសា ដោយគ្រោងនឹងបញ្ចប់នៅថ្ងៃទី១៨ ខែមិថុនា។

ការប្រកួតនេះមិនអនុញ្ញាតកីឡាករដែលលេងក្នុងក្របខណ្ឌមិត្តហ្វូនខេមបូឌានលីក, ពានរង្វាន់សម្តេច ហ៊ុន សែន និងក្របខណ្ឌខេមបូឌានលីក២ក្នុងឆ្នាំ២០១៧ចូលរួមនោះឡើយ។ ហើយកីឡាករត្រូវមានសញ្ជាតិខ្មែរ និងមានអាយុចាប់ពី១៦ឆ្នាំឡើងទៅ។

ការប្រកួតនឹងធ្វើឡើងរៀងរាល់ថ្ងៃសៅរ៍ និងអាទិត្យចាប់ពីម៉ោង៤រសៀលនៅពហុកីឡដ្ឋានជាតិ។ ការប្រកួតដែលមិនកំណត់ចំនួនក្លិបចូលរួមនេះធ្វើឡើងតាមរូបមន្តពានរង្វាន់សម្តេច ហ៊ុន សែន។ ដូច្នេះគ្រប់បណ្តាក្លិប-សមាគម ដែលមានបំណងចង់ចូលរួមត្រូវមកដាក់ពាក្យចាប់ពីថ្ងៃជូនដំណឹងនេះរហូតដល់ថ្ងៃទី១០ ខែមីនា។ ចំណែកការចាប់ឆ្នោតនឹងប្រព្រឹត្តទៅនៅថ្ងៃទី១៥ ខែមីនា៕