អន្តរជាតិ
រជ្ជទាយាទជប៉ុន ណារ៉ូហ៊ីតុ ត្រៀមខ្លួនរួចរាល់ដើម្បីស្នងរាជ្យបន្តបិតា អាគីហ៊ីតុ
× រជ្ជទាយាទជប៉ុន ណារ៉ូហ៊ីតុ បង្ហាញជំហរត្រៀមខ្លួនរួចរាល់ដើម្បីស្នងរាជ្យសម្បត្តិបន្តពីអធិរាជ អាគីហ៊ីតុ ជាបិតា។ អធិរាជ អាគីហ៊ីតុ ដែលមានព្រះសុខភាពចុះខ្សោយខ្លាំង ទំនងជាដាក់រាជ្យនៅដើមឆ្នាំ២០១៩ ខណៈដែលរដ្ឋាភិបាលជប៉ុន កំពុងដំណើរការពិភាក្សាបង្កើតច្បាប់ដើម្បីបើកផ្លូវឲ្យព្រះអង្គដាក់រាជ្យបាន។ បើដំណើរការទៅមុខដោយរលូន អធិរាជ អាគីហ៊ីតុ នឹងក្លាយជាអធិរាជជប៉ុនដំបូងគេដែលប្រកាសដាក់រាជ្យក្នុងពេលជាង២០០ឆ្នាំមកនេះ។
ឆ្លៀតក្នុងពិធីគម្រប់ព្រះជន្ម៥៧ វស្សា រជ្ជទាយាទ ណារ៉ូហ៊ីតុ មានបន្ទូលជាលើកទី១ ជុំវិញលទ្ធភាពនៃការដាក់រាជ្យរបស់អធិរាជ អាគីហ៊ីតុ ដែលមានព្រះជន្មច្រើនទៅហើយ។ រជ្ជទាយាទអង្គនេះ ក៏បានត្រៀមខ្លួនរួចរាល់ហើយដើម្បីស្នងតំណែងប្រមុខរដ្ឋបន្តពីបិតា ដែលអាចប្រកាសផ្ទេររាជ្យសម្បត្តិនៅខែមករា ឆ្នាំ២០១៩ ខាងមុខ។ ដោយសាររដ្ឋធម្មនុញ្ញហាមអធិរាជដាក់រាជ្យ រដ្ឋាភិបាលជប៉ុនកំពុងញាប់ដៃក្នុងការបង្កើតច្បាប់ពិសេសមួយ ដើម្បីអនុញ្ញាតឲ្យព្រះអង្គផ្ទេររាជ្យបាន។
សូមស្តាប់សំឡេង៖
ក្នុងសន្និសីទកាសែតនៅថ្ងៃទី២១ ខែកុម្ភៈ រជ្ជទាយាទអង្គនេះ មានបន្ទូលថា ព្រះអង្គនឹងបំពេញរាជកិច្ចដូចដែលបិតាអាគីហ៊ីតុ ធ្លាប់ធ្វើស្របតាមរដ្ឋធម្មនុញ្ញ និងធ្វើជាតំណាងឲ្យប្រទេស និងការរួបរួមរបស់ប្រជាជន។ រជ្ជទាយាទព្រះជន្ម៥៧វស្សា ក៏បានសន្យារំលែកទុក្ខសោក និងក្ដីរីករាយរបស់ប្រជាជនជប៉ុនផងដែរ។ នេះបើតាមការផ្សាយរបស់សារព័ត៌មាន The Japan Times ។
ព្រះអង្គម្ចាស់ ណារ៉ូហ៊ីតុ ឈរនៅលេខរៀងទី១ សម្រាប់ការស្នងតំណែងបន្តពីអធិរាជ អាគីហ៊ីតុ ដែលសោយរាជ្យចាប់តាំងពីឆ្នាំ១៩៨៩មកនោះ។ សម្រាប់រាជានិយមជប៉ុន ការផ្ទេររាជ្យធ្វើបានតែសម្រាប់បុត្រាប៉ុណ្ណោះ ខណៈដែលសមាជិករាជវង្សជាស្ត្រី គ្មានសិទ្ធិស្នងរាជ្យបន្តឡើយ។ អនុជរបស់រជ្ជទាយាទ គឺព្រះអង្គម្ចាស់ អាគីស៊ីណូ ស្ថិតនៅលំដាប់ទី២ នៃការស្នងរាជ្យសម្បត្តិនេះ ហើយបុត្រាព្រះអង្គ ព្រះជន្ម១០វស្សានៅលំដាប់ទី៣។
បើតាមសារព័ត៌មាន The Japan Times រដ្ឋាភិបាលលោក ស៊ីនហ្សូ អាបេ មានគម្រោងបញ្ជូនច្បាប់ពិសេសមួយទៅកាន់ស្ថាប័ននីតិបញ្ញត្តិ ដែលបើកផ្លូវឲ្យអធិរាជ អាគីហ៊ីតុ ដាក់រាជ្យបាន ប៉ុន្តែច្បាប់ពិសេសនេះ នឹងអនុវត្តសម្រាប់តែករណីអធិរាជ អាគីហ៊ីតុ ប៉ុណ្ណោះ។ សេចក្ដីព្រាងច្បាប់ពិសេសនេះ កំពុងពិនិត្យដោយគណៈកម្មាធិការមួយតែងតាំងដោយរដ្ឋាភិបាល មុននឹងបញ្ជូនទៅកាន់សភាទាំងពីរ។ សភាទាំងពីររបស់ជប៉ុន ក៏នឹងពិភាក្សាលើសេចក្ដីព្រាងច្បាប់នេះទៀតដែរ។
គម្រោងច្បាប់ពិសេសថ្មីនេះ លេចជារូបរាង បន្ទាប់ពីអធិរាជ អាគីហ៊ីតុ បង្ហាញព្រះទ័យដាក់រាជ្យកាលពីខែសីហា ឆ្នាំមុន។ នៅពេលនោះ អធិរាជ អាគីហ៊ីតុ មិនមានបំណងបន្តជាព្រះចៅអធិរាជជប៉ុនទៀតទេ ខណៈដែលព្រះអង្គ មានព្រះជន្មកាន់តែច្រើន និងបានកាត់បន្ថយព្រះរាជកិច្ចជាច្រើន ក៏ដូចជាផ្ទេររាជកិច្ចរបស់ទ្រង់ឲ្យរជ្ជទាយាទផងដែរ។ ដោយសាររឿងនេះ រដ្ឋាភិបាលលោកនាយករដ្ឋមន្ត្រី ស៊ីនហ្សូ អាបេ ទំនងជាចង់ឲ្យព្រះអង្គម្ចាស់ ណារ៉ូហ៊ីតុ ឡើងគ្រងរាជ្យឲ្យបានឆាប់នោះ៕
Tag:
ជប៉ុន
Naruhito
Akihito
© រក្សាសិទ្ធិដោយ thmeythmey.com