អន្តរជាតិ
តុលាការហ្វីលីពីនចេញដីកាចាប់សមាជិកព្រឹទ្ធសភាដែលរិះគន់ Duterte ញាត់គុកពាក់ព័ន្ធរឿងគ្រឿងញៀន
× តុលាការហ្វីលីពីន បានចេញដីកាចាប់ខ្លួនលោកស្រី Leila de Lima សមាជិកព្រឹទ្ធសភាចូលចិត្តរិះគន់ប្រធានាធិបតី Rodrigo Duterte និងគូកន២នាក់ទៀត ជុំវិញការចោទប្រកាន់ពាក់ព័ន្ធសំណុំរឿងគ្រឿងញៀនអំឡុងពេលលោកស្រីកាន់តំណែងជារដ្ឋមន្ត្រីយុត្តិធម៌។ ដីកាចាប់ខ្លូនថ្ងៃទី២៣ ខែកុម្ភៈនេះ ធ្វើឡើងបន្ទាប់រដ្ឋបាលលោក Duterte ដាក់ពាក្យបណ្ដឹងលើលោកស្រី de Lima ដែលសង្ស័យថាបានការពារឈ្មួញគ្រឿងញៀនក្នុងពន្ធនាគាររដ្ឋ។
ក្រុមមន្ត្រីធ្វើការឲ្យលោកស្រី Leila de Lima បានបញ្ជាក់នៅថ្ងៃទី២៣ ខែកុម្ភៈថា ចៅក្រម Juanita Gurrero នៃតុលាការតំបន់ Muntinlupa RTC បានចេញដីកាចាប់ខ្លួនសមាជិកព្រឹទ្ធសភារូបនេះ និងបុរសពីរនាក់ទៀតទាក់ទងនឹងសំណុំរឿងគ្រឿងញៀន។ ដីកាចាប់ខ្លួននេះ ធ្វើឡើងតាមពាក្យបណ្ដឹងរបស់ក្រសួងយុត្តិធម៌នៃរដ្ឋាភិបាលប្រធានាធិបតី Rodrigo Duterte ដែលតែងត្រូវបានលោកស្រី Leila រិះគន់ធ្ងន់ៗរឿងសង្គ្រាមប្រឆាំងគ្រឿងញៀន។
បើតាមសារព័ត៌មាន Rappler ដីកាចាប់ខ្លួននេះអះអាងថា ឆ្លងកាត់ការវាយតម្លៃយ៉ាងប្រុងប្រយ័ត្នលើព័ត៌មាន និងភស្តុតាងទាំងអស់ ដែលបង្ហាញក្នុងការស៊ើបអង្កេតបឋមរបស់ក្រសួងយុត្តិធម៌ តុលាការមានមូលហេតុគ្រប់គ្រាន់ដើម្បីចេញដីកាចាប់ខ្លួនលោកស្រី Leila M. de Lima, លោក Rafael Marcos Z. Ragos ដែលជាអតីតប្រធានការិយាល័យកែប្រែ និងលោក Ronnie Palisoc Dayan អតីតអ្នកបើកឡាន និងជាមិត្តប្រុសលោកស្រី Leila។
រដ្ឋមន្ត្រីយុត្តិធម៌ Vitaliano Aguirre II បាននិយាយក្នុងកិច្ចសម្ភាសជាមួយសារព័ត៌មាន dzMM ថា ដីកាចាប់ខ្លួន អាចត្រូវបានអនុវត្តគ្រប់ពេលនៅថ្ងៃទី២៣ ខែកុម្ភៈ។ យ៉ាងណាមិញ មេធាវីលោកស្រី Leila ហៅការវិវត្តចុងក្រោយនេះ ជារឿងគួរអស់សំណើច និងសោកស្ដាយ ព្រោះតុលាការមិនទាន់ចាត់ការបណ្ដឹងរបស់លោកស្រីប្រឆាំងនឹងរឿងនេះនៅឡើយ។
យោងតាមពាក្យបណ្ដឹងរបស់រដ្ឋាភិបាល សមាជិកព្រឹទ្ធសភា Leila បានទទួលលុយចំនួន៥លានពឺសូ ស្មើ១សែនដុល្លារពីឈ្មួញគ្រឿងញៀន ដែលត្រូវបានបញ្ជូនទៅផ្ទះលោកស្រី កាលពីពេលលោកស្រីកាន់តំណែងរដ្ឋមន្ត្រីយុត្តិធម៌។ ពាក្យបណ្ដឹងដដែលបន្តថា លោកស្រី បានបើកដៃឲ្យឈ្មួញរកស៊ីគ្រឿងញៀនពីខាងក្នុងពន្ធនាគារជាតិ ដែលប៉ូលិសពណ៌នា ថាស្មើនឹង៧០ភាគរយនៃគ្រឿងញៀនចរាចរក្នុងប្រទេស។
ទោះជាយ៉ាងណាក្ដី លោកស្រី Lima ដែលជាអ្នកប្រឆាំងលោក Duterte រហូតមកនោះ បានទាត់ចោលការចោទប្រកាន់នេះ និងចាត់ទុកពាក្យបណ្ដឹងប្រឆាំងលោកស្រី ជារឿងនយោបាយទៀតផង។ លោកស្រីនិយាយដែរថា នេះ ជារឿងផ្ទាល់ខ្លួនដែលលោកប្រធានាធិបតី Duterte មិនពេញចិត្តលោកស្រី ពេលលោកស្រីនៅធ្វើជាប្រធានគណៈកម្មការសិទ្ធិមនុស្ស ហើយលោក Duterte ធ្វើជាអភិបាលក្រុង Davao និងពេលលោកស្រីផ្ដើមគំនិតស៊ើបអង្កេតរឿងឃាតករសម្ងាត់ធ្វើការឲ្យលោក Duterte ផងនោះ៕
Tag:
ហ្វីលីពីន
Rodrigo Duterte
Leila de Lima
© រក្សាសិទ្ធិដោយ thmeythmey.com