ជាតិ
រដ្ឋមន្ត្រីកសិកម្មលើកទឹកចិត្តកសិករឲ្យបង្កើតសហគមន៍ប្រមូលកសិផលផ្គត់ផ្គង់ទីផ្សារ
× ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន សន្និដ្ឋានថា កសិករខ្មែរអាច ប្រកួតប្រជែងឈ្នះនៅទីផ្សារបន្លែក្រៅប្រទេស ប្រសិនបើពួកគេបង្កើតសហគមន៍ប្រមូលកសិផលដែលអាចផ្គត់ផ្គង់តាមតម្រូវទីផ្សារទៀងទាត់។
សំឡេងលោក វេង សាខុន ៖
លោក វេង សាខុន បានចាត់ទុកបញ្ហាកសិករខ្វះទីផ្សារកសិកម្មជារឿងស្មុគស្មាញដែលក្រសួងពាក់ព័ន្ធ កំពុងដោះស្រាយជាបន្តបន្ទាប់។ ថ្លែងប្រាប់អ្នកសារព័ត៌មានក្នុងវេទិកាស្តីពី កសិកម្ម រុក្ខាប្រមាញ់ និងនេសាទ នៅថ្ងៃទី២៣កុម្ភៈ នាសណ្ឋាគារសុខាភ្នំពេញ លោកបានពន្យល់ពីមូលហេតុនាំឲ្យលំហូរទំនិញបន្លែពីបរទេសចូលវាយលុកក្នុងទីផ្សារកម្ពុជា ដោយសារគេមានជំនាញបច្ចេកទេសខ្ពស់ ការចំណាយថ្លៃផលិតដើមទាប និង អគ្គិសនីទាបជាដើម។
«គាត់ត្រូវស្គាល់ទីផ្សារ តើត្រូវទាក់ទងកន្លែងលក់កសិផលនៅផ្សារទំនើបបែបណា?...គាត់ត្រូវបង្កើតសមាគម សហគមន៍គាត់ត្រូវបែងចែកអ្នកណាដាំដុះដំណាំប្រភេទណា? និងផ្គត់ផ្គង់ទីផ្សារឲ្យទៀងទាត់»។ រដ្ឋមន្ត្រីបញ្ជាក់ ស្របពេលកសិករកំពុងអនុវត្តផែនការចងក្រងសហគមន៍បែបនេះតាម មូលដ្ឋានមួយចំនួន។
តាមលោក វេង សាខុន កម្ពុជាបាននាំចូលបន្លែពីបរទេសតម្លៃប្រមាណ ២០០លានដុល្លារអាមេរិក ក្នុងឆ្នាំ ២០១៦ កន្លងទៅ៕
Tag:
វេង សាខុន
កសិកម្ម
© រក្សាសិទ្ធិដោយ thmeythmey.com