ក្រសួងបរិស្ថានពន្យល់ពីមូលហេតុ ដែលបណ្តាលឲ្យទឹកដងទន្លេបាសាក់តូចប្រែពណ៌ខ្មៅ

ជាតិ

ក្រសួងបរិស្ថានពន្យល់ពីមូលហេតុ ដែលបណ្តាលឲ្យទឹកដងទន្លេបាសាក់តូចប្រែពណ៌ខ្មៅ

24, Feb 2017 , 7:59 am

រូបភាព

ដោយ: ថ្មីៗ

បន្ទាប់ពីពិនិត្យឃើញទឹកក្នុងទន្លេបាសាក់តូច ប្រែពណ៌ទៅជាខ្មៅ និងមានក្លិនស្អុយខុសប្រក្រតី ក្រសួងបរិស្ថាន បានបញ្ជូនមន្ត្រីជំនាញ ដើម្បីចុះពិនិត្យ និងស្រាវជ្រាវរកប្រភពនៃការបង្ហូរទឹកកង្វក់នេះ ដោយសហការជាមួយមន្ទីរ និងអង្គការពាក់ព័ន្ធរបស់រដ្ឋបាលរាជធានីភ្នំពេញ។

ក្រោយពីចុះពិនិត្យ និងស្រាវជ្រាវរកមូលហេតុដែលនាំឲ្យទឹកទន្លេពណ៌ខ្មៅរួច ក្រុមជំនាញបានរកឃើញថា បញ្ហានេះ បណ្តាលមកពីពីការកកស្ទះនៃបណ្តាញលួមេនៅតាមបណ្តោយមហាវិថីសុធារស ធ្វើឲ្យទឹកលូដែលត្រូវហូរទៅកាន់បណ្តាញលូនៅបឹងត្របែក ត្រូវហូរច្រាលចេញមកខាងផ្នែកទន្លេបាសាក់តូចវិញ។ នេះបើតាមសេចក្តីជូនដំណឹងរបស់ក្រសួងបរិស្ថាននៅថ្ងៃទី ២៣ ខែកុម្ភៈ។

សេចក្តីជូនដំណឹងរបស់ក្រសួងដដែល បន្តលើកឡើងយ៉ាងនេះថា៖«អង្គភាពជំនាញរបស់រដ្ឋបាលរាជធានីភ្នំពេញ បាននិងកំពុងចាត់វិធានការ ដោយធ្វើសកម្មភាពស្តារបណ្តាញលូ ដែលកកស្ទះទាំងនោះ ហើយកិច្ចការនេះ នឹងត្រូវបញ្ចប់ក្នុងរយៈពេលប្រមាណ ៣០ ថ្ងៃ»។

ជាមួយគ្នានេះ ក្រសួងបរិស្ថាន ក៏សុំការយោគយល់ពីសាធារណជន និងប្រជាពលរដ្ឋ ដែលរស់នៅតាមដងទន្លេសាក់តូចផងដែរ ដើម្បីទុកពេលឲ្យអង្គភាពជំនាញដោះស្រាយបញ្ហានេះ៕