ជាតិ
លោកស្រី ទេព វន្នី ជាប់ពន្ធនាគារជាលើកទី៣ ព្រោះការតវ៉ានានាទាក់ទងនឹងរឿងបឹងកក់
× ភ្នំពេញ៖ ចាប់តាំងពីឆ្នាំ២០១១ ជាពេលដែលប្រជាពលរដ្ឋ ក្នុងតំបន់បឹងកក់ ត្រូវបានបណ្តេញចេញពីលំនៅដ្ឋាន លោកស្រី ទេព វន្នី បានក្លាយជាសកម្មជនមួយរូប ដែលតែងតែចូលរួមតវ៉ាជាញឹកញាប់ ដើម្បីទាមទារអ្វីមួយពីអាជ្ញាធរ។ ការតវ៉ារបស់លោកស្រី ទេព វន្នី មិនសូវជាទទួលបានផលវិជ្ជមានប៉ុន្មាន នោះទេ។ ផ្ទុយមកវិញ ដោយសារតែការចូលរួមតវ៉ាទាំងនោះ លោកស្រី ទេព វន្នី បានជាប់ពន្ធនាគាររហូតដល់ទៅបីដងឯណោះ តាមរយៈការកាត់ទោសរបស់តុលាការនៅកម្ពុជា។
សាលាដំបូងរាជធានីភ្នំពេញ នៅព្រឹកថ្ងៃទី២៣ ខែកុម្ភៈ បាសម្រេចកាត់ទោសលោកស្រី ទេព វន្នី ឲ្យជាប់ពន្ធនាគាររយៈពេល២ឆ្នាំកន្លះ ក្រោមបទចោទ«បង្កហិង្សាដោយចេតនាមានស្ថានទម្ងន់ទោស»។ ជាបទចោទ ដែលទាក់ទងនឹងអំពើហិង្សា តាំងពី២០១៣ មកម្ល៉េះ ដែលកាលនោះ លោកស្រី ទេព វន្នី រួមទាំងប្រជាពលរដ្ឋផ្សេងៗទៀត បានប្រមូលផ្តុំគ្នានៅមុខផ្ទះសម្តេច ហ៊ុន សែន ដើម្បីសុំអន្តរាគមន៍ លើជម្លោះដីធ្លីនៅក្នុងតំបន់បឹងកក់។
លោកស្រី បូវ សោភា សកម្មជនបឹងកក់មួយរូបដែលស្និទ្ធនឹងលោកស្រី ទេព វន្នី និងតែងតែមានវត្តមានជាមួយគ្នាពេលតវ៉ាលើបញ្ហានានានោះ បានចាត់ទុកការសម្រេចរបស់តុលាការ នេះ ថាជារឿងអយុត្តិធម៌។ លោកស្រី បូវ សោភា បានរិះគន់តុលាការនៅកម្ពុជា ថាកាត់ក្តីដោយលម្អៀង ហើយជាពិសេសប្រជាពលរដ្ឋទន់ខ្សោយដូចក្រុមលោកស្រី មិនដែលទទួលបានយុត្តិធម៌ឡើយ។
លោកស្រី បូវ សោភា បញ្ជាក់ថា លោកស្រី រួមទាំងប្រជាពលរដ្ឋផ្សេងទៀ នឹងបន្តធ្វើ «យុទ្ធនាការថ្ងៃចន្ទពណ៌ខ្មៅ» ដដែល ដើម្បីសុំឲ្យដោះលែងលោកស្រី ទេព វន្នី។
នេះជាលើកទី៣ហើយ ដែលតុលាការបានកាត់ទោសលោកស្រី ទេព វន្នី ឲ្យជាប់ពន្ធនាគារ។
ក្រោយជម្លោះដីធ្លីនៅក្នុងតំបន់បឹងកក់ ផ្ទុះឡើងក្នុងឆ្នាំ២០១១ ប្រជាពលរដ្ឋ បានធ្វើបាតុកម្មជាបន្តបន្ទាប់ ដើម្បីទាមទារឲ្យរដ្ឋាភិបាល និងស្ថាប័នពាក់ព័ន្ធដោះស្រាយ។ រហូតដល់ឆ្នាំ២០១២ ប្រជាពលរដ្ឋ១៥នាក់ ក្នុងនោះក៏មានលោកស្រី ទេវ វន្នី ម្នាក់ដែរ ត្រូវបានតុលាការចោទពីបទ «ជេរប្រមាថមន្ត្រីរាជការសាធារណៈ» ហើយកាត់ទោសឲ្យជាប់ពន្ធនាគារ រយៈពេល២ឆ្នាំកន្លះ ដោយសារតែតវ៉ានឹងរឿងលុបបឹងកក់ ដែលប៉ះពាល់ដល់លំនៅដ្ឋានរបស់ពួកគេ។ ប៉ុន្តែ ក្រោយអនុវត្តទោសបានត្រឹមមួយខែ បីថ្ងៃ តុលាការ ក៏សម្រេចដោះលែង ប្រជាពលរដ្ឋទាំង១៥នាក់ ឲ្យមានសេរីភាពឡើងវិញ។
នៅឆ្នាំ២០១៤ លោកស្រី ទេព វន្នី ត្រូវបានតុលាការ កាត់ទោសឲ្យជាប់ពន្ធនាគារអស់រយៈពេល៥ខែ ក្រោមបទោចោទ «បង្កឲ្យកកស្ទះចរាចរណ៍តាមដងផ្លូវ»៕
© រក្សាសិទ្ធិដោយ thmeythmey.com