អន្តរជាតិ
ទោះមានវ័យ៩៣ឆ្នាំ មេដឹកនាំផ្ដាច់ការ Mugabe ប្រកាសថា លោកមិនទៅណាឡើយ ប្រធានាធិបតីស៊ីមបាវ៉េ Robert Mugabe និងភរិយា Grace Mugabe ក្នុងពិធីខួបកំណើតគម្រប់៩៣ឆ្នាំ (រូបថត Xinhua)
× ប្រធានាធិបតីវ័យជរា Robert Mugabe ទើបតែប្រារព្ធពិធីអបអរខួបកំណើតអាយុ៩៣ឆ្នាំ នៅថ្ងៃទី២៥ ខែកុម្ភៈ បើទោះជាលោកចូលដល់វ័យនេះតាំងពីថ្ងៃទី២១ មកក្ដី។ មានអាយុក្បែរមួយសតវត្សរ៍ទៅហើយក្ដី លោក Mugabe នៅតែក្ដាប់អំណាចជាប្រធានាធិបតីស៊ីមបាវ៉េមិនលែងដៃ និងថែមទាំងប្រកាសចំពោះមុខភ្ញៀវចូលរួមកម្មវិធីខួបកំណើតថា លោកនឹងមិនលាលែងពីនយោបាយឡើយ ហើយលោកក៏មិនទាន់តែងតាំងអ្នកស្នងតំណែងដែរ។
កម្មវិធីខួបកំណើតអាយុ៩៣ឆ្នាំ របស់ប្រធានាធិបតីស៊ីមបាវ៉េ Robert Mugabe បានធ្វើឡើងយ៉ាងអធិកអធម និងបានចំណាយលុយជាង២លានដុល្លារអាមេរិក ខណៈដែលប្រជាជនរាប់លាននាក់រកអង្ករច្រកឆ្នាំមិនចង់បាន។ ចំពោះមុខ អ្នកគាំទ្ររាប់ពាន់នាក់ និងភ្ញៀវកិត្តិយសជាច្រើននៅឯ Matabeleland លោក Mugabe ដែលកាន់អំណាចតាំងពីឆ្នាំ១៩៨០ មកនោះ មិនបានបង្ហាញបំណងបោះបង់អំណាចក្ដាប់ពេញដៃរបស់លោកឡើយ។
ដោយស្លៀកសម្លៀកបំពាក់ចម្រុះពណ៌អបអរថ្ងៃកំណើតខ្លួនឯង ប្រធានាធិបតីស៊ីមបាវ៉េរូបនេះ និយាយថា៖ «មានមនុស្សជាច្រើនប្រមូលផ្ដុំគ្នា រួចស្រែកឲ្យខ្ញុំចុះចេញ។ ខ្ញុំសួរខ្លួនឯងថា ខ្ញុំត្រូវទៅណា?» ហើយលោកក៏មិនរើសអ្នកណាមកស្នងតំណែងបន្តពីលោក លុះត្រាតែគណបក្ស ZANU-PFរបស់លោកយល់ថា ដល់ពេលលោកត្រូវចាកចេញ ទើបលោកលាលែងពីតំណែង ដែលលោកកាន់កាប់អស់ពេល៣៧ឆ្នាំមកនេះ។
«មានអ្នកខ្លះនិយាយថា លោកប្រធានាធិបតីគួរជ្រើសរើសអ្នកបន្តវេនហើយ មុនលោកចូលនិវត្តន៍។ តើនេះជាការបង្ខំមែនទេ? ខ្ញុំមិនចង់ធ្វើរឿងនេះឡើយ។ នេះជាបញ្ហារបស់គណបក្សខ្ញុំ ដែលត្រូវជ្រើសរើសអ្នកថ្មី។ គណបក្សអាចបើកសន្និបាតវិសាមញ្ញ ប៉ុន្តែពេលនេះ ខ្ញុំជាបេក្ខជនប្រធានាធិបតីសម្រាប់អាណត្តិក្រោយនេះ។» នេះជាការលើកឡើងរបស់លោក Mugabe ដែលផ្សាយដោយសារព័ត៌មាន Al Jazeera ។
កាន់តែពិសេសនោះ ក្នុងពិធីបុណ្យខួបកំណើតគម្រប់ខួប ៩៣ឆ្នាំនេះដែរ លោក Mugabe បានទទួលអំណោយធំមួយពីសហភាពអឺរ៉ុប។ អំណោយនោះគឺ ការបន្តទណ្ឌកម្មសេដ្ឋកិច្ច និងរឹតបន្តឹងការធ្វើដំណើរសម្រាប់មេដឹកនាំស៊ីមបាវ៉េ។ កាលពីថ្ងៃសុក្រសប្តាហ៍មុន ក្រុមប្រឹក្សាអឺរ៉ុបបានបោះឆ្នោតសម្រាប់បន្តទណ្ឌកម្មប្រឆាំងប្រធានាធិបតី Mugabe និងភរិយា Grace Mugabe និងរាល់ឧស្សាហកម្មយោធារបស់រដ្ឋស៊ីមបាវ៉េទាំងមូល។
តាមពិតទៅ ទណ្ឌកម្មទាំងនេះត្រូវដាក់ចេញដំបូងកាលពីឆ្នាំ ២០០២មកម្ល៉េះ ហើយវាមានគោលដៅសំខាន់រឹតបន្តឹងការធ្វើដំណើររបស់ប្រធានាធិបតីផង បង្កកទ្រព្យសម្បត្តិរបស់លោកផង និងហាមប្រទេសសមាជិកសហភាពអឺរ៉ុបធ្វើពាណិជ្ជកម្មអាវុធជាមួយស៊ីមបាវ៉េ។ ប៉ុន្តែ លោក Mugabe នៅតែបន្តកាន់អំណាចយ៉ាងណែន ខណៈប្រជាជនមួយចំនួននាំគ្នារិះគន់មេដឹកនាំស៊ីមបាវ៉េថាមិនគួរខ្ជះខ្ជាយលុយឥតប្រយោជន៍ ស្របពេលសេដ្ឋកិច្ចជាតិនិងប្រជាជនកំពុងត្រដរខ្យល់ឡើយ៕
© រក្សាសិទ្ធិដោយ thmeythmey.com