អន្តរជាតិ
George W. Bush ៖ សង្គមប្រជាធិបតេយ្យត្រូវការសារព័ត៌មានដើម្បីពិនិត្យមេដឹកនាំញៀននឹងអំណាច លោកអតិតប្រធានាធិបតីអាមេរិក Bush (ប្រភពរូបភាព៖ Politico)
× អតីតប្រធានាធិបតីអាមេរិក លោក George W. Bush បានលើកឡើងពីតួនាទីរបស់សារព័ត៌មានក្នុងការចូលរួមចំណែកកសាងរបបប្រជាធិបតេយ្យ។ លោក បានចាត់ទុកសារព័ត៌មាន ថា ជាដៃគូដែលមិនអាចខ្វះបាន ជាពិសេស នោះតួនាទីរបស់សារព័ត៌មាន ក្នុងការពិនិត្យលើមេដឹកនាំ ដែលឈ្លក់វង្វេងនឹងអំណាច ដែលអាចបង្កឲ្យមានមហន្តរាយដល់សង្គមនោះ។
«ខ្ញុំ ចាត់ទុកប្រព័ន្ធផ្សាយគឺជាដៃគូដែលមិនអាចខ្វះបានសម្រាប់សង្គមប្រជាធិបតេយ្យ។ យើង ត្រូវការប្រព័ន្ធផ្សព្វផ្សាយឯករាជ្យដើម្បីឲ្យប្រជាជនដូចជាខ្ញុំមានការទទួលខុសត្រូវ។ អំណាច អាចធ្វើមនុស្សឈ្លក់វង្វេង ហើយ វា ក៏បង្កឲ្យមានមហន្តរាយ។ ហើយ វាពិតជាសំខាន់ណាស់សម្រាប់ប្រព័ន្ធផ្សព្វផ្សាយក្នុងការដាស់តឿនអ្នកដែលបំពាននឹងអំណាច មិនថានៅទីណាក៏ដោយឲ្យមកទទួលខុសត្រូវ»។ នេះគឺជាការលើកឡើងរបស់លោកអតីតប្រធានាធិបតី George W. Bush នៅក្នុងកិច្ចសម្ភាសជាមួយនឹងសារព័ត៌មាន NBC ។
ក្នុងកិច្ចសម្ភាសដដែលនោះ លោក Bush បានអះអាងថា វា គឺជារឿងដែលសំខាន់ណាស់សម្រាប់អាមេរិកដែលត្រូវមានប្រព័ន្ធផ្សព្វផ្សាយឯករាជ្យដើម្បីដាក់សម្ពាធទៅលើប្រទេសដទៃផ្សេងទៀតឲ្យយកគំរូតាមខ្លួននោះ។
អតីតប្រធានាធិបតីរូបនេះ បានសង្កត់ធ្ងន់ថា៖«កិច្ចការមួយក្នុងចំណោមកិច្ចការជាច្រើនដែលលោកបានធ្វើជាច្រើនលើកនោះ គឺបញ្ចុះបញ្ចូលបុគ្គលម្នាក់ដូចជា លោក Vladirmir Putin ដើម្បីទទួលយកគំនិតនៃសារព័ត៌មានឯករាជ្យ។ តែ វា គឺជារឿងដែលពិបាកណាស់ដើម្បីប្រាប់អ្នកដទៃដើម្បីឲ្យមានប្រព័ន្ធផ្សព្វផ្សាយដែលឯករាជ្យ ខណៈពេលដែលយើង ក៏មិនមានឆន្ទៈក្នុងបង្កើតឲ្យមានក្នុងសង្គមខ្លួនឯងនោះ»។
ការអត្ថាធិប្បាយរបស់អតីតប្រធានាធិបតីទី៤៣នៃសហរដ្ឋអាមេរិករូបនេះ ធ្វើឡើងស្របពេលដែល រដ្ឋបាលថ្មីរបស់លោកប្រធានាធិបតី ដូណាល់ ត្រាំ កំពុងតែមានរឿងចម្រូងចម្រាសជាមួយនឹងសារព័ត៌មានធំៗអាមេរិក ដោយ លោកប្រធានាធិបតី ត្រាំ បានចាត់ទុកសារព័ត៌មានដូចជាសត្រូវ ឬក្រុមប្រឆាំងយ៉ាងដូច្នេះឯង។ នៅសប្តាហ៍មុន លោក ត្រាំ ថែមទាំងប្រកាសមិនចូលរួមកម្មវិធីជួបជុំជាមួយនឹងអ្នកសារព័ត៌មាន ដែលជាកម្មវិធីមួយដែលប្រធានាធិបតីអាមេរិក តែងតែធ្វើជាទម្លាប់នោះ៕
Tag:
អាមេរិក
ប្រជាធិបតេយ្យ
សារព័ត៌មាន
© រក្សាសិទ្ធិដោយ thmeythmey.com