អន្តរជាតិ
ស្ដេចអារ៉ាប៊ីសាអូឌីត នាំប្រតិភូ១៥០០នាក់ និងសម្ភារជាង៥០០តោន មកទស្សនកិច្ចនៅឥណ្ឌូណេស៊ី
× មហាក្សត្រអារ៉ាប៊ីសាអូឌីត Salman Abdulaziz Al Saud បានចាប់ផ្ដើមទស្សនកិច្ចមួយជុំនៅតំបន់អាស៊ី ដើម្បីគៀងគរ និងពង្រឹងទំនាក់ទំនងពាណិជ្ជកម្ម។ គោលដៅទី១របស់ស្ដេចអារ៉ាប៊ីសាអូឌីត គឺម៉ាឡេស៊ី ដែលនៅទីនោះក្រុមហ៊ុនប្រេងអារ៉ាប៊ីសាអូឌីត និងក្រុមហ៊ុនប្រេងម៉ាឡេស៊ីចុះកិច្ចព្រមព្រៀងតម្លៃមហាសាលលើការវិនិយោគប្រេង។ គោលដៅបន្ទាប់ពីម៉ាឡេស៊ី គឺឥណ្ឌូណេស៊ី ដែលក្នុងដំណើរទៅទីនោះ ទ្រង់មានមន្ត្រីហែរហមច្រើនជាងមួយពាន់នាក់ និងកាបូបជាច្រើនរយតោន។
បន្ទាប់ពីបញ្ចប់ទស្សនកិច្ចម៉ាឡេស៊ី មហាក្សត្រអារ៉ាប៊ីសាអូឌីត Salman Abdulaziz Al Saud នឹងចាប់ផ្ដើមទស្សនកិច្ច៩ថ្ងៃនៅឥណ្ឌូណេស៊ី ចាប់ពីថ្ងៃទី១ ដល់ថ្ងៃទី៩ ខែមីនា។ នេះជាទស្សនកិច្ចលើកទី១ របស់មហាក្សត្រអារ៉ាប៊ីសាអូឌីតទៅកាន់ឥណ្ឌូណេស៊ី ដែលជាប្រទេសឥស្លាមធំជាងគេលើពិភពលោកក្នុងរយៈពេលជិត៥០ឆ្នាំមកនេះ។ ស្ដេចអារ៉ាប៊ីសាអូឌីតអង្គនេះ នឹងចំណាយពេលពាក់កណ្ដាលនៃទស្សនកិច្ចនេះនៅទីក្រុងទេសចរណ៍បាលី ក្រោយជួបប្រធានាធិបតីឥណ្ឌូណេស៊ី ចូកូ វីដូដូ (Joko Widodo) រួច។
បើតាមសារព័ត៌មាន The Jakarta Post ប៉ូលិសឥណ្ឌូណេស៊ី ពង្រឹងសន្តិសុខខ្លាំងបំផុតនៅឯ Bogor ជាទីដែលស្ដេច Salman ជួបលោក ចូកូ វីដូដូ មុនបន្តដំណើរទៅកាន់បាលី។ អាជ្ញាធរក៏បានបង្កើនការត្រួតពិនិត្យសន្តិសុខសម្រាប់ប្រតិភូអមដំណើរដែលមានទៅ១៥០០នាក់ ក្នុងនោះមានរដ្ឋមន្ត្រី១០នាក់ និងព្រះអង្គម្ចាស់២៥អង្គ។ ប៉ូលិស នឹងរឹតបន្តឹងសន្តិសុខនៅគ្រប់កន្លែងទាំងអស់រួមទាំងនៅសណ្ឋាគារ ផ្លូវដែលប្រតិភូឆ្លងកាត់ ក៏ដូចជាគោលដៅទេសចរណ៍ផងដែរ។
ក្នុងដំណើរលើកដំបូងនេះ មហាក្សត្រ Salman បាននាំយកសម្ភារចាំបាច់ជាច្រើនដែលមានទម្ងន់ដល់ទៅជាង៥០០តោន ក្នងនោះមានរថយន្ត Mercedes ២គ្រឿង និងជណ្ដើរយន្ត ២គ្រឿងដែរ។ លោក Adji Gunawan មកពីក្រុមហ៊ុនដឹកជញ្ជូនផ្លូវអាកាស PT Jasa Angkasa Semesta បានប្រាប់ទីភ្នាក់ងារព័ត៌មាន Antara ថា ក្រុមហ៊ុនរបស់លោកត្រូវបានចាត់តាំងឲ្យទទួលបន្ទុកការងារដឹកជញ្ជូនសម្ភារ និងឧបករណ៍ត្រៀមសម្រាប់ស្ដេច Salman ដែលមកដល់តាំងពីថ្ងៃទី១៨ ខែកុម្ភៈ។
មហាក្សត្រអារ៉ាប៊ីសាអូឌីត នឹងចំណាយពេលពីថ្ងៃទី១ ដល់ថ្ងៃទី៤ នៅខេត្ត ជ្វាខាងលិច បន្ទាប់មកនឹងបន្តដំណើរទៅកាន់កោះបាលីរហូតដល់ថ្ងៃទី៩ ខែកុម្ភៈ។ អាកាសយានដ្ឋានអន្តរជាតិ Ngurah Rai របស់កោះបាលី នឹងបិទត្រូវការហោះហើរ និងចុះចតរយៈពេលយ៉ាងហោចណាស់៤៥ នាទី សម្រាប់ការត្រៀមរៀបចំទទួលការមកដល់របស់មហាក្សត្រ Salman ។
ក្រោយបញ្ចប់ទស្សនកិច្ចនៅឥណ្ឌូណេស៊ី មហាក្សត្រអារ៉ាប៊ីសាអូឌីត នឹងបន្តដំណើរទៅកាន់ព្រុយណេ, ជប៉ុន, ចិន, ម៉ាល់ឌីវ, និងគោលដៅចុងក្រោយនៅហ្សកដានី មុនត្រឡប់ចូលប្រទេសវិញ។ ទស្សនកិច្ចមួយជុំអាស៊ីនេះ ធ្វើឡើងខណៈដែលសេដ្ឋកិច្ចប្រទេសនាំចេញប្រេងដ៏ធំនេះ កំពុងប្រឈមមុខវិបត្តិដោយសារទិន្នផលប្រេងធ្លាក់ចុះ៕
Tag:
ឥណ្ឌូណេស៊ី
អារ៉ាប៊ីសាអូឌីត
Salman Abdulaziz Al Saud
© រក្សាសិទ្ធិដោយ thmeythmey.com