ជាតិ
នយោបាយជាតិ
គណបក្សសង្គ្រោះជាតិ កំពុងធ្វើសមាជវិសាមញ្ញ ដើម្បីជ្រើសរើសប្រធាន និងអនុប្រធានថ្មី
× ភ្នំពេញ៖ គណបក្សសង្គ្រោះជាតិ កំពុងតែរៀបចំសមាជវិសាមញ្ញ នៅទីស្នាក់ការកណ្តាល នាពេលព្រឹក ថ្ងៃទី២ ខែមិនា ឆ្នាំ២១០៧នេះ ដើម្បីជ្រើសរើសប្រធានថ្មី ជំនួស ឯកឧត្តម សម រង្ស៊ី ដែលទើបតែលាលែងពីតំណែងកាលពីប៉ុន្មានសប្តាហ៍មុន។ បេក្ខជន ដែលឈរឈ្មោះជាប្រធានគណបក្សសង្គ្រោះជាតិ គឺមានតែឯកឧត្តម កឹម សុខា តែម្នាក់ប៉ុណ្ណោះ។
ដោយឡែក សមាសភាពថ្មីនៃអនុប្រធានគណបក្សសង្គ្រោះជាតិ មានរហូតដល់ទៅបីតំណែង ឯណោះ។ បេក្ខជន ដែលឈរឈ្មោះសម្រាប់តំណែងជាអនុប្រធានទាំងបី រួមមាន លោកស្រី មូរ សុខហួរ លោក ប៉ុល ហំម និងលោក អេង ឆៃអ៊ាង។
ពីមុន គណបក្សប្រឆាំងដ៏ធំមួយនេះ មានតែប្រធានមួយរូប និងអនុប្រធានមួយរូប ប៉ុណ្ណោះ។ ប៉ុន្តែ ប្រសិនបើអង្គសមាជវិសាមញ្ញ បោះឆ្នោតគាំទ្រ គណបក្សសង្គ្រោះជាតិ នឹងមានប្រធានមួយរូប និងអនុប្រធានបីរូប។
ក្រៅពីជ្រើសរើសប្រធាននិងអនុប្រធាន របៀបវារៈមួយចំនួនទៀត ក៏ត្រូវបានដាក់ចូលក្នុងអង្គសមាជវិសាមញ្ញនៃគណបក្សសង្គ្រោះជាតិ ផងដែរ។ របៀបវារៈទាំងនោះ រួមមាន ការធ្វើសោធនកម្មលើចំណុចមួយចំនួន នៃលក្ខន្តិកគណបក្ស និងការអបអរសាទរបញ្ជីបេក្ខជនឈរឈ្មោះក្រុមប្រឹក្សាឃុំ-សង្កាត់ ព្រមទាំង ការអនុម័តលើគោលនយោបាយអាទិភាព ប្រាំចំណុច សម្រាប់បោះឆ្នោតជ្រើសរើសក្រុមប្រឹក្សាឃុំ-សង្កាត់៕
© រក្សាសិទ្ធិដោយ thmeythmey.com