ជាតិ
សេដ្ឋកិច្ច
ក្រសួងទេសចរណ៍លើកលែងពិន័យចំពោះអាជីវកម្មទេសចរណ៍ដែលសុំអាជ្ញាបណ្ណមុនដាច់ខែឧសភា
×
ភ្នំពេញ៖ អាជីវកម្មទេសចរណ៍ដែលមិនមានអាជ្ញាបណ្ណ ឬខកខានដាក់ពាក្យសុំបន្តអាជ្ញាបណ្ណ ត្រូវមកដាក់ពាក្យសុំអាជ្ញាបណ្ណឲ្យបានមុនដាច់ខែឧសភាឆ្នាំនេះ ដើម្បីរួចការពិន័យអន្តរការណ៍។ នេះបើតាមសេចក្ដីជូនដំណឹងរបស់ក្រសួងទេសចរណ៍ នៅថ្ងៃទី២១ខែកុម្ភៈ។
សេចក្ដីជូនដំណឹងដដែលនេះបញ្ជាក់ថា ការប្រកបអាជីវកម្មទេសចរណ៍ទាំងអស់ ត្រូវតែមានអាជ្ញាបណ្ណដែលចេញដោយក្រសួងទេសចរណ៍ ឬរដ្ឋបាលថ្នាក់ក្រោមជាតិ។ អាជីវកម្មទេសចរណ៍ដែលគ្មានអាជ្ញាបណ្ណ ម្ចាស់ឬប្រតិបត្តិករទេសចរណ៍ត្រូវទទួលខុសត្រូចំពោះមុខច្បាប់ជាធរមាន។ មានត្រា៦៥នៃច្បាប់ស្ដីពីទេសចរណ៍ចែងថា«បុគ្គលណាដែលប្រកបអាជីវកម្មគ្មានអាជ្ញាបណ្ណទេសចរណ៍ ត្រូវពិន័យអន្តរការណ៍ពី ២លានរៀលទៅ ២០លានរៀល»។
ក្រសួងទេសចរណ៍បានណែនាំដល់ប្រតិបត្តិករដែលពុំទាន់មានអាជ្ញាបណ្ណទេសចរណ៍ ត្រូវរួសរាន់មកដាក់ពាក្យសុំអាជ្ញាបណ្ណពីក្រសួងទេសចរណ៍ ឬមន្ទីរទេសចរណ៍ តាមរយៈការដាក់ពាក្យសុំដោយផ្ទាល់ ឬតាមអនឡាញ www.cambodiatourismindustry.org ។សម្រាប់ព័ត៌មានបន្ថែមអាចទាក់ទងតាមរយៈលេខទូរសព្ទ ០២៣ ៥៣១០៩៩៩ ។
អាជីវកម្មទេសចរណ៍ រួមមាន៖ ទីភ្នាក់ងារទេសចរណ៍និងមគ្គុទេសចរណ៍ សណ្ឋាគារនិងសេវាកម្មស្នាក់នៅទេសចរណ៍ ស្ប៉ា-ម៉ាស្សាសុខភាព សេវាកម្សាន្តទេសចរណ៍ កីឡាទេសចរណ៍ ភោជនីយដ្ឋាននិងអាហារដ្ឋានទេសចរណ៍ ដឹកជញ្ជូនទេសចរណ៍ និងរមណីយដ្ឋានទេសចរណ៍។
កាលពីខែមករាឆ្នាំនេះ ក្រសួងទេសចរណ៍បានប្រកាសពីការប្ដេជ្ញារបស់ខ្លួនដើម្បីបញ្ចប់អាជីវកម្មទេសចរណ៍គ្មានអាជ្ញាបណ្ណឲ្យបានត្រឹមឆ្នាំ២០១៨ ដោយបើកយុទ្ធនាការ«គ្មានទៀតទេអាជីវកម្មទេសចរណ៍គ្មានអាជ្ញាបណ្ណ»៕
Tag:
ទេសចរណ៍
អាជ្ញាបណ្ណទេសចរណ៍
© រក្សាសិទ្ធិដោយ thmeythmey.com