សាលាឧទ្ធរណ៍ កំពុងបើកសវនាការលើសំណុំរឿងលោក គឹម សុខ នៅរសៀលថ្ងៃចន្ទនេះ

ជាតិ

នយោបាយជាតិ

សាលាឧទ្ធរណ៍ កំពុងបើកសវនាការលើសំណុំរឿងលោក គឹម សុខ នៅរសៀលថ្ងៃចន្ទនេះ

06, Mar 2017 , 3:13 pm

រូបភាព

ដោយ: សារព័ត៌មានថ្មីៗ

ភ្នំពេញ៖ រឿងក្តីពាក់ព័ន្ធនឹងការឃុំខ្លួនលោក គឹម សុខ អ្នកវិភាគនយោបាយ ដែលប្តឹងដោយសម្តេច ហ៊ុន សែន ត្រូវបានសាលាឧទ្ធរណ៍ បើកសវនាការ នៅរសៀលថ្ងៃទី៦មីនា នេះ។ ការបើកសវនាការនេះ គឺធ្វើឡើងតាមសំណើរបស់លោក ជូង ជូងី ដែលជាមេធាវីការពារក្តីឲ្យលោក គឹម សុខ។

លោក ជូង ជូងី ធ្លាប់និយាយថា ការដាក់បណ្តឹង ទៅកាន់សាលាឧទ្ធរណ៍ គឺដើម្បីប្រឆាំងនឹងចៅក្រមស៊ើបសួរនៃសាលាដំបូងរាជធានីភ្នំពេញ ដែលចេញដីកាឃុំខ្លួនលោក គឹម សុខ។ លោកមេធាវីដដែល បានអះអាងទៀតថា លោក គឹម សុខ មិនសុខចិត្តឡើយ ចំពោះការឃុំនេះ។

ក្រៅពីបណ្តឹងខាងលើ លោ ជូង ជូងី ក៏បានដាក់លិខិតមួយផ្សេងទៀត ទៅកាន់ចៅក្រមស៊ើបសួរនៃសាលាដំបូងរាជធានីភ្នំពេញ ផ្ទាល់តែម្តង ដើម្បីសុំឲ្យដោះលែងលោក គឹម សុខ បាននៅក្រៅឃុំជាបណ្តោះអាសន្ន។ សារព័ត៌មានថ្មីៗ មិនទាន់អាចសុំការបញ្ជាក់ពីលោក ជូង ជូងីបានទេថា ចៅក្រមស៊ើបសួរ សម្រេចឲ្យលោក គឹម សុខ នៅក្រៅឃុំ ឬយ៉ាងណា។

លោក គឹម សុខ ត្រូវបានចៅក្រមស៊ើបសួរនៃសាលាដំបូងរាជធានីភ្នំពេញ យកទៅឃុំនៅពន្ធនាគារព្រៃស ជាបណ្តោះអាសន្ន កាលពីថ្ងៃទី១៧ ខែកុម្ភៈ ឆ្នាំ២០១៧ ក្រោមបទចោទ «បរិហារជាសាធារណៈ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។ បើតាមលោក គី តិច មេធាវីរបស់សម្តេច ហ៊ុន សែន ការដាក់ពាក្យប្តឹងនេះ គឺដោយសារតែលោក គឹម សុខ និយាយថា គណបក្សប្រជាជនកម្ពុជា នៅពីក្រោយខ្នងនៃអំពើឃាតកម្មលើលោក កែម ឡី។ ក្នុងបណ្តឹងនេះ សម្តេច ហ៊ុន សែន ទារសំណងជំងឺចិត្តពីលោក គឹម សុខ ចំនួន ៥០ម៉ឺនដុល្លារ៕