ប៉ូលិសហ្វីលីពីនត្រៀមគ្រាប់កាំភ្លើងប្រឡូកក្នុងសង្គ្រាមគ្រឿងញៀនឡើងវិញ ក្រោយជ្រះស្រឡះរឿងពុករលួយ

អន្តរជាតិ

ប៉ូលិសហ្វីលីពីនត្រៀមគ្រាប់កាំភ្លើងប្រឡូកក្នុងសង្គ្រាមគ្រឿងញៀនឡើងវិញ ក្រោយជ្រះស្រឡះរឿងពុករលួយ

07, Mar 2017 , 8:39 pm

រូបភាព

ដោយ: ថ្មីៗ

មួយខែក្រោយត្រូវប្រធានាធិបតីបញ្ជាឲ្យឈប់ពាក់ព័ន្ធសង្គ្រាមគ្រឿងញៀនដោយសារមានរឿងអាសស្រូវពុករលួយ ប៉ូលិសហ្វីលីពីនបានបញ្ជាក់ជាថ្មីថាខ្លួនអាចចាប់ផ្តើមការងារជាថ្មីម្តងទៀតបានហើយ។ មេប៉ូលិសហ្វីពីនបានសង្កត់ធ្ងន់ថា កូនចៅលោកត្រៀមខ្លួនរួចរាល់ហើយដើម្បីចូលបំពេញការងារឡើងវិញ។

ប៉ូលិសហ្វីលីពីននឹងត្រូវត្រឡប់ចូលប្រឡូកក្នុងសង្គ្រាមប្រឆាំងគ្រឿងញៀនឡើងវិញ។ នេះជាការបញ្ជាក់របស់មេប៉ូលិសហ្វីលីពីន ឧត្តមសេនីយ៍ Ronald Dela Rosa នៅថ្ងៃចន្ទទី ៦ មីនានៅទីបញ្ជាការប៉ូលិសស្ថិតនៅរដ្ឋធានីម៉ានីល។ ការប្រកាសពីការចូលរួមយុទ្ធនាការប្រឆាំងគ្រឿងញៀនរបស់ប៉ូលិសឡើងវិញនេះកើតឡើងប្រហែល ១ខែក្រោយការបញ្ជាឲ្យប៉ូលិសដកខ្លួន ដោយសារសំណុំរឿងអាស្រូវពុករលួយក្នុងស្ថាប័នប៉ូលីសផ្ទុះឡើង។

ក្នុងពេលប្រកាសបើកយុទ្ធនាការឡើងវិញ ឧត្តមសេនីយ៍ប៉ូលិស Dela Rosa បានបញ្ជាក់ថា ការកែទម្រង់ផ្ទៃក្នុងប៉ូលិសត្រូវបានអនុវត្តរួចហើយ ហើយលោកធានាថា វានឹងគ្មានបញ្ហាធំដុំរួមទាំងករណីការចាប់ជម្រិតនិងសម្លាប់អ្នកជំនួញកូរ៉េខាងត្បូងកន្លងមកនោះ កើតឡើងជាថ្មីឡើយ។

កាលពីចុងខែមករាប្រធានាធិបតីហ្វីលីពីនលោក រ៉ូឌ្រីហ្គោ ឌឺទែតេ បានសម្រេចបញ្ជាឲ្យក្រុមប៉ូលិសដកខ្លួនចេញពីយុទ្ធនាការប្រឆាំងគ្រឿងញៀន ដោយលោកលើកហេតុផលថា ស្ថាប័នប៉ូលិសនេះជាស្ថាប័នដែលពុករលួយបំផុតក្នុងចំណោមស្ថាប័នរដ្ឋទាំងអស់។ ប្រធានាធិបតីរូបនេះពិព័ណ៌នាស្ថាប័ននេះថាជាសត្វស្អុយរលួយត្រូវកាត់ចោលថែមទៀត។

«សង្គ្រាមប្រឆាំងគ្រឿងញៀនចាប់ផ្តើមទៀតហើយ ហើយលើកនេះវានឹងកាន់តែធំ, ខ្លាំង និងមានការសហការគ្នាច្បាស់លាស់និងពេញលេញដែលវាអាចធានាបានពីប្រសិទ្ធិភាព ការទទួលខុសត្រូវ និងវិន័យក្នុងចំណោមមន្ត្រីប៉ូលិស»។ នេះជាការបញ្ជាក់របស់លោក Dela Rosa។

តាមពិតទៅអាជ្ញាធរហ្វីលីពីនបានដាក់ឈ្មោះសង្គ្រាមប្រឆាំងគ្រឿងញៀនថា «ជាកាំភ្លើងកាណុងពីរ» ដែលវាសំដៅលើយុទ្ធសាស្ត្ររយៈពេលវែងក្នុងការប្រឆាំងគ្រឿងញៀនក្នុងនោះមានមួយធ្វើសង្គ្រាមប្រឆាំងឈ្មួញគ្រឿងញៀនតាមផ្លូវ និងមួយទៀតបន្តផ្តោតលើការបង្ក្រាបមេខ្លោងធំៗ។
លោក Dela Rosa បានបន្តថា៖« ថ្ងៃនេះយើងនឹងចាប់ផ្តើមសង្គ្រាមប្រឆាំងគ្រឿងញៀននេះឡើងវិញ។ យើងចាប់ផ្តើមគម្រោងនេះជាថ្មី ដោយយើងដាក់ឈ្មោះយុទ្ធនាការនេះថា ‘កាំភ្លើងកាណុងពីរច្រកគ្រាប់ពេញឡើងវិញ’»។

សូមបញ្ជាក់ថា ចាប់ពីពេលដែលលោក ឌឺទែតេ ឡើងកាន់អំណាចនិងចាប់ផ្តើមសង្គ្រាមគ្រឿងញៀនរបស់លោក ប៉ូលិសហ្វីលីពីនបានសម្លាប់ប្រជាជនពាក់ព័ន្ធគ្រឿងញៀនជាង ២៥៥០នាក់ ហើយជិត ៤០០០នាក់ផ្សេងទៀតបានស្លាប់ក្នុងស្ថានការណ៍ដែលពិបាកពន្យល់ឲ្យបានច្បាស់។មកដល់បច្ចុប្បន្នប្រជាជនហ្វីលីពីនភាគច្រើនគាំទ្រសង្គ្រាមប្រឆាំងគ្រឿងញៀន ប៉ុន្តែគេរិះគន់រដ្ឋាភិបាលដោយសារវាមានការសម្លាប់មនុស្សក្រៅប្រព័ន្ធតុលាការនិងការបំពារបំពារសិទ្ធិមនុស្សខ្លាំងក្លាយក្នុងការអនុវត្តសង្គ្រាមគ្រឿងញៀននេះ។អង្គការលើកលែងទោសអន្តរជាតិបានអះអាងថា ការសម្លាប់មនុស្សក្នុងសង្គ្រាមគ្រឿងញៀននេះវាស្មើបទឧក្រិដ្ឋប្រឆាំងមនុស្សជាតិទៅហើយ៕