ម៉ាឡេស៊ីព្រមានចាត់វិធានការចាំបាច់ បើកូរ៉េខាងជើងមិនព្រមដោះលែងប្រជាជនខ្លួន

អន្តរជាតិ

ម៉ាឡេស៊ីព្រមានចាត់វិធានការចាំបាច់ បើកូរ៉េខាងជើងមិនព្រមដោះលែងប្រជាជនខ្លួន

07, Mar 2017 , 9:59 pm

រូបភាព

ដោយ: ថ្មីៗ

ប្រមុខរដ្ឋាភិបាលម៉ាឡេស៊ីលោក ណាជីព រ៉ាហ្សាក់បានស្នើឲ្យរដ្ឋាភិបាលកូរ៉េខាងជើងដោះលែងជនជាតិម៉ាឡេស៊ី ចំនួន១១នាក់ជាបន្ទាន់ដើម្បីបញ្ចៀសវិបត្តិការទូតធ្ងន់ធ្ងរ។ ហើយរដ្ឋាភិបាលម៉ាឡេស៊ីព្រមានចាត់វិធានការចាំបាច់ដើម្បីការពារប្រជាជនខ្លួននៅកូរ៉េខាងជើងផង។

បន្ទាប់ពីប្រជាជនខ្លួនត្រូវរដ្ឋាភិបាលកូរ៉េខាងជើងឃាត់ខ្លួន នាយករដ្ឋមន្ត្រី ម៉ាឡេស៊ីលោក ណាជីព រ៉ាហ្សាក់ បានស្នើឲ្យកូរ៉េខាងជើងដោះលែងប្រជាជនទាំង ១១នាក់នោះជាបន្ទាន់ដើម្បីទប់ស្កាត់បញ្ហាធំកើតឡើងរវាងប្រទេសទាំងពីរ។ ម៉ាឡេស៊ីក៏បានចាត់ទុកសកម្មភាពកូរ៉េខាងជើងជា ការចាប់ចំណាប់ខ្មាំងនិងមិនអាចទទួលយកបានឡើយ។

នាយករដ្ឋមន្ត្រីម៉ាឡេស៊ី បានបញ្ជាក់ក្នុងសេចក្តីថ្លែងការណ៍ដែលទទួលបានដោយសារព័ត៌មាន Channel News Asia ថា៖« សកម្មភាពប្រមាថមើលងាយ ដែលចាប់ប្រជាជនយើងជាចំណាប់ខ្មាំង ប៉ះពាល់ខ្លាំងដល់ច្បាប់អន្តរជាតិ និង ទំនៀមទម្លាប់ការទូតផងដែរ»។

សេចក្តីថ្លែងការណ៍នេះបានបន្តថា ប្រមុខរដ្ឋាភិបាលម៉ាឡេស៊ីបានកោះប្រជុំក្រុមប្រឹក្សាសន្តិសុខជាតិបន្ទាន់ផងដែរដើម្បីស្វែងរកដំណោះស្រាយ។ លោក ណាជីព រ៉ាហ្សាក់ អធិប្បាយបន្ថែមថា ម៉ាឡេស៊ីចាត់ទុកប្រទេសទាំងអស់ជាមិត្ត ប៉ុន្តែម៉ាឡេស៊ីក៏ត្រូវធ្វើអ្វីគ្រប់យ៉ាងដូចគ្នាដើម្បីការពារប្រជាជនដូចគ្នា។

«ក្នុងនាមជាប្រទេសស្រលាញ់សន្តិភាព ម៉ាឡេស៊ីប្តេជ្ញាចិត្តរក្សាទំនាក់ទំនងជាមួយប្រទេសទាំងអស់ប៉ុន្តែ ការការពារប្រជាជនរបស់យើង គឺជារឿងអាទិភាពបំផុត។ យើងមិនស្ទាក់ស្ទើរក្នុងការចាត់វិធានការចាំបាច់ទាំងអស់នៅពេលដែលពួកគេរងការគំរាមកំហែងឡើយ»។

មកទល់ពេលបច្ចុប្បន្ននេះ រដ្ឋាភិបាលម៉ាឡេស៊ី ក៏ដាក់បញ្ជាឲ្យប៉ូលិសខ្លួនឃាត់រាល់មន្ត្រីទូតមិនឲ្យចាកចេញពីម៉ាឡេស៊ីដែរ ដរាបណាម៉ាឡេស៊ីមិនអាចដឹងច្បាស់ថា កូរ៉េខាងជើងអាចរក្សាសុវត្ថិភាពប្រជាជនខ្លួនបានឬអត់។

ពាក់ព័ន្ធសុវត្ថិភាពប្រជាជនម៉ាឡេស៊ី ទីភ្នាក់ងារព័ត៌មានកូរ៉េខាងជើង KCNA ស្រង់សម្តីក្រសួងការបរទេសកូរ៉េខាងជើងថា ប្រជាជនម៉ាឡេស៊ីទាំងអស់ទាំង១១នាក់បំពេញការងារនិងអាចរស់នៅកូរ៉េខាងជើងបានជាធម្មតា ខណៈដែលបទបញ្ជាហាមធ្វើដំណើរនៅជាធរមាននោះ។

សូមបញ្ជាក់បន្តិចថា ទំនាក់ទំនងរវាងម៉ាឡេស៊ីនិងកូរ៉េខាងជើងធ្លាក់ចុះខ្លាំងចាប់តាំងពីពេលដែលមានករណីឃាតកម្មលោក Kim Jong Nam ដែលជាបងប្រុសមេដឹកនាំកំពូលកូរ៉េខាងជើង គីម ជុងអ៊ុន នោះ។ កូរ៉េខាងជើងមិនពេញចិត្តរបាយការណ៍ស៊ើបអង្កេតរបស់ប៉ូលិសម៉ាឡេស៊ី ហើយបានចោទប្រកាន់ថា រដ្ឋាភិបាលម៉ាឡេស៊ីចូលដៃចូលជើងជាមួយរដ្ឋាភិបាលកូរ៉េខាងត្បូងដើម្បីចង្អុលដាក់ខ្លួនរឿងឃាតកម្មនេះទៀត។ ដូច្នេះហើយបានជាមានការប្រឈមមុខគ្នាផ្នែកការទូតរហូតដល់ថ្នាក់បណ្តេញមន្ត្រីទូតទៅវិញទៅមកបែបនេះ។

បើសិនជាគ្មានដំណោះស្រាយសមស្របទេ ការប្រឈមមុខគ្នាផ្នែកការទូតនេះនឹងផ្ទុះកាន់តែធំ ហើយកូរ៉េខាងជើងនិងម៉ាឡេស៊ីអាចនឹងផ្តាច់ចំណងការទូតដែលបង្កើតឡើងចាប់ពីឆ្នាំ ១៩៧៣ ថែមទៀតផង៕