អន្តរជាតិ
របាយការណ៍៖ ប្រជាជន៩០០លាននាក់នៅអាស៊ីត្រូវបង់«ថ្លៃទឹកតែ»ដើម្បីទទួលបានសេវាពីរដ្ឋ
× ប្រជាជនប្រហែល ច្រើនជាងមួយភាគបួននៃប្រជាជនដែលរស់នៅតំបន់អាស៊ីសុទ្ធតែបានចំណាយលុយសូកប៉ាន់ដើម្បីបានទទួលសេវាសាធារណរបស់រដ្ឋ។ នេះបើតាមរបាយការណ៍ពិសេសមួយអង្គការតម្លាភាពអន្តរជាតិ។ ស្ថាប័ននេះក៏បានអំពាវនាវឲ្យរដ្ឋាភិបាលក្នុងតំបន់ចាត់វិធានការដោះស្រាយបញ្ហាពុករលួយស៊ីរូងផ្ទៃក្នុងដែលកំពុងសាយភាពពេញតំបន់នេះដែរ។
របាយការណ៍មួយរបស់អង្គការតម្លាភាពអន្តរជាតិបានរកឃើញថា ប្រជាជននៅអាស៊ីប្រហែល ៩០០លាននាក់ត្រូវបង្ខំចិត្តបង់លុយសូកប៉ាន់ឬលុយថ្លៃទឹកតែដើម្បីទទួលបានសេវាសាធារណរបស់រដ្ឋនោះ។
បើតាមទីភ្នាក់ងារព័ត៌មាន AFP របាយការណ៍នេះត្រូវបានចងក្រងឡើងដោយផ្អែកលើការស្ទង់មិតប្រជាជនជាង ២ម៉ឺននាក់នៅក្នុងប្រទេសចំនួន១៦នៅក្នុងតំបន់ចាប់ពីប៉ាគីស្ថានទៅដល់អូស្ត្រាលី។ បើតាមរបាយការណ៍ ប្រជាជនទាំង ៩០០ លាននាក់ បានបង់លុយទឹកតែយ៉ាងហោចណាស់ក៏ម្តងដែរក្នុងរយៈពេល ១២ខែកន្លងទៅ។
ការប្រើប្រាស់លុយសំណូកឬលុយទឹកតែនេះកើតច្រើនជាងគេនៅឥណ្ឌានិងនៅប្រទេសវៀតណាម ដែលជាទីកន្លែងដែលមនុស្សចូលរួមស្ទង់មតិស្ទើរតែពីរភាគបីនិយាយថាពួកគេត្រូវការបង់លុយដើម្បីទទួលបានសេវាអប់រំនិងសុខាភិបាលរដ្ឋ។
ចំណែកនៅជប៉ុន កូរ៉េខាងត្បូងនិងហុងកុងនិងអូស្ត្រាលីវិញ របាយការណ៍នេះរកឃើញថា ការបង់លុយសំណូកកើតឡើងតិចតួចបំផុត។ ប៉ុន្តែអ្វីដែលគួរឲ្យកត់សម្គាល់ ប្រទេសសិង្ហបុរីដែលជារដ្ឋស្អាតស្អំរឿងអំពើពុករលួយនោះមិនស្ថិតក្នុងចំណោមប្រទេសដែលគេស្ទង់មតិឡើយ។
បើតាមរបាយការណ៍ដដែល ប្រជាជនក្រីក្រក្លាយជាជនរងគ្រោះខ្លាំងជាងគេក្នុងបញ្ហានេហ ដោយពួកគេត្រូវបង្ខំបង់លុយដើម្បីបានសេវាមូលដ្ឋាននេះ។
ពាក់ព័ន្ធបញ្ហានេះ ប្រធានស្ថាប័នតម្លាភាពអន្តរជាតិលោក Jose Ugaz បានអំពាវនាវឲ្យរដ្ឋាភិបាលនានាក្នុងតំបន់ប្រឹងប្រែងធ្វើយ៉ាងណាដោះស្រាយបញ្ហាពុករលួយដែលកំពុងសាយភាយនេះឲ្យបានរហ័ស។ លោកបានថ្លែងក្នុងសេចក្តីប្រកាសព័ត៌មានពេលចេញរបាយការណ៍នេះថា៖«រដ្ឋាភិបាល ត្រូវប្រឹងប្រែងធ្វើការងារឲ្យច្រើនដើម្បីជំរុញការប្រឆាំងអំពើពុករលួយ។ សំណូកសូកប៉ាន់នេះមិនមែនត្រឹមតែជាបទឧក្រិដ្ឋតូចតាចទេ តែវាធ្វើឲ្យខាតបង់ខ្លាំងទាំងលើការហូបចុក,ការសិក្សា,ប្រព័ន្ធសុខាភិបាល និងចុងក្រោយវាអាចសម្លាប់មនុស្សផង»។
យ៉ាងណាក៏ដោយចុះ បញ្ហាពុករលួយលែងជារឿងចម្លែកហើយសម្រាប់ប្រទេសនៅអាស៊ីនេះ។ ប្រទេសជាច្រើនក្នុងតំបន់រងផលប៉ះពាល់ខ្លាំងពីសំណុំរឿងពុករលួយនេះ ក្នុងនោះមានទាំងកូរ៉េខាងត្បូងថែមទៀត។ លោកស្រីប៉ាក ហ្គឺនហេ ប្រធានាធិបតីដែលត្រូវគេព្យួរតំណែងនោះបានរងការចោទប្រកាន់ក្នុងសំណុំរឿងពុករលួយ។
ចំណែកម៉ាឡេស៊ីឯណោះវិញ នាយករដ្ឋមន្ត្រីណាជីព រ៉ាហ្សាក់ ប្រឹងប្រែងជម្នះព្យុះភ្លៀងដើម្បីដោះស្រាយបញ្ហារឿងអាស្រូវពុករលួយកិបកេងលុយរដ្ឋរាប់រយលានក្នុងក្រុមហ៊ុនវិនិយោគរដ្ឋ1MDB កន្លងមកដែរ៕
© រក្សាសិទ្ធិដោយ thmeythmey.com