ចិន ប្រដៅកូរ៉េខាងជើង, អាមេរិក និងកូរ៉េខាងត្បូងឲ្យឈប់បង្កើតភាពតានតឹងក្នុងតំបន់

អន្តរជាតិ

ចិន ប្រដៅកូរ៉េខាងជើង, អាមេរិក និងកូរ៉េខាងត្បូងឲ្យឈប់បង្កើតភាពតានតឹងក្នុងតំបន់

08, Mar 2017 , 4:06 pm

រូបភាព

ដោយ: ថ្មីៗ

ក្រោយភាពតានតឹងកើនឡើងខ្លាំងនៅឧបទ្វីបកូរ៉េ មហាយក្សចិនបានចេញមុខស្នើឲ្យក្រុងព្យុងយ៉ាងបញ្ឈប់ឲ្យអស់សម្មភាពបង្ករឿងដូចជាបាញ់សាកល្បងមីស៊ីល។ ហើយចិនក៏ស្នើឲ្យអាមេរិកនិងកូរ៉េខាងត្បូងផ្អាក់សមយុទ្ធយោធាហើយត្រឡប់ទៅស្វែងរកកិច្ចពិភាក្សាគ្នាវិញ។

សូមស្តាប់សំឡេង៖

ក្នុងសន្និសីទសារព័ត៌មានប្រចាំឆ្នាំនៅដាច់ដោយឡែកពីកិច្ចប្រជុំសភាប្រជាជនចិននាថ្ងៃពុធទី ៨មីនា រដ្ឋមន្ត្រីការបរទេសចិនលោក វ៉ាង យី (Wang Yi) បានអំពាវនាវឲ្យរបបដឹកនាំក្រុងព្យុងយ៉ាង បញ្ឈប់ឲ្យអស់រាល់សកម្មភាពបាញ់សាកល្បងនិងបន្តអភិវឌ្ឍកម្មវិធីនុយក្លេអ៊ែររបស់ខ្លួនដើម្បីបន្ថយភាពតានតឹងនៅក្នុងតំបន់។ បន្ថែមពីនេះប្រមុខការទូតចិនក៏បានស្នើសុំឲ្យកូរ៉េខាងត្បូងនិងអាមេរិកឈប់បង្កភាពតានតឹងដូចគ្នា ហើយស្វែងរកឱកាសចរចាវិញ។

កាលពីដើមសប្តាហ៍នេះ កូរ៉េខាងជើងបានបាញ់សាកល្បងមីស៊ីលរបស់ខ្លួនចំនួន បួនគ្រាប់ ដោយបីគ្រាប់បានហោះធ្លាក់ទៅក្នុងដែនសេដ្ឋកិច្ចផ្តាច់មុខជប៉ុនថែមទៀត។ តែគេសង្ស័យថា កូរ៉េខាងជើងធ្វើបែបនេះក៏ដើម្បីឆ្លើយតបសមយុទ្ធទ្រង់ទ្រាយធំរបស់កូរ៉េខាងត្បូងនិងអាមេរិកដូចគ្នា។

យោងតាមទីភា្នក់ងារព័ត៌មាន Reuters ប្រមុខការទូតចិនរូបនេះបានបញ្ជាក់ដូច្នេះថា៖« យោបល់របស់ចិនពេលនេះសម្រាប់កូរ៉េខាងជើងគឺ ជាជំហានដំបូង ប្រទេសនេះត្រូវផ្អាកសកម្មភាពនុយក្លេអ៊េរនិងមីស៊ីល ហើយសម្រាប់អាមេរិកនិងកូរ៉េខាងត្បូងវិញ គឺគេត្រូវផ្អាកសមយុទ្ធយោធាទ្រង់ទ្រាយធំរបស់ខ្លួន»។

លោក វ៉ាង យី បានសង្កត់ធ្ងន់ថា ការផ្អាកសកម្មភាពទាំងសងខាងនេះនឹងអនុញ្ញាតឲ្យភាគីទាំងពីរត្រឡប់ទៅកាន់តុចរចាវិញបានជាក់ជាមិនខាន។ ប៉ុន្តែទោះជាបែបនេះក្តីចិនហាក់បីដូចជាលែងមានទឹកមាត់ប្រៃទៀតហើយលើកូរ៉េខាជើង។ ដូចកាលពីខែមុន កូរ៉េខាងជើងថែមទាំងបានបន្ទោសនិងរិះគន់ចិនថែមទៀតដែលមហាអំណាចជាសម្ព័ន្ធមិត្តនេះមិនប្រើប្រាស់សិទ្ធិការទូតការពារកូរ៉េខាងជើងឲ្យផុតពីទណ្ឌកម្មក្រុមប្រឹក្សាសន្តិសុខអង្គការសហប្រជាជាតិឡើយ។

លោក វ៉ាង យី ក៏បានឆ្លៀតឱកាសវាយកូរ៉េខាងជើងបន្តផង វាយកូរ៉េខាងត្បូងនិងអាមេរិក បន្តិចផងដែរក្នុងសន្និសីទសារព័ត៌មាននេះ។ លោកថ្លែងដោយប្រយោលថា «មានអាវុធនុយក្លេអ៊ែរមិននាំមកនូវសន្តិសុខទេ ហើយប្រើប្រាស់កម្លាំងទ័ពក៏មិនមែនជាដំណោះស្រាយដែរ។ វានៅតែមានផ្លូវដើម្បីសម្រេចសន្តិភាពនោះគឺការចាប់ផ្តើមជជែកគ្នា»។

មួយវិញទៀត ការលើកឡើងរបស់លោក វ៉ាង យី កើតឡើងក្រោយពេលដែលសហរដ្ឋអាមេរិកពង្រាយប្រព័ន្ធការពារមីស៊ីលទៅកាន់ឧបទ្វីបកូរ៉េកាលពីថ្ងៃ ៧មីនាម្សិលមិញនេះ។ ការពង្រាយខែលមីស៊ីលនេះធ្វើឡើងតាមការស្នើសុំរបស់ក្រុងសេអ៊ូល ប៉ុន្តែសកម្មភាពនេះបង្កភាពស្មុគស្មាញនិងធ្វើឲ្យការប្រឈមមុខគ្នារវាងកូរ៉េខាងត្បូងនិងចិនកើនឡើងខ្លាំងថែមទៀត។

យ៉ាងណាក៏ដោយចុះបញ្ហាឧបទ្វីបកូរ៉េជាពិសេសបញ្ហាពង្រាយខែលការពារមីស៊ីលនេះប្រហែលជានឹងត្រូវអាមេរិកនិងចិនជជែកពិភាក្សាគ្នានៅក្នុងពេលដែលរដ្ឋមន្ត្រីការបរទេសអាមេរិក លោកRex Tillerson អញ្ជើញទៅដល់ចិននៅថ្ងៃ ១៨មីនា៕