អន្តរជាតិ
មេដឹកនាំក្រុមអាវក្រហមថៃជាប់គុកដោយសារប្រមាថព្រះមហាក្សត្រ
× តុលាការកំពូលថៃបានសម្រេចទទួលយកការកាត់ក្តីរបស់សាលាដំបូងដែលកាត់ទោសឲ្យមេដឹកនាំក្រុមអាវក្រហម Yosvaris Chuklom ជាប់ពន្ធនាគារដោយសារហ៊ានប្រមាថព្រះមហាក្សត្រ។ បើតាមច្បាប់មេដឹកនាំក្រុមអាវក្រហមនេះអាចនឹងជាប់ពន្ធនាគាររហូតដល់ ១៥ឆ្នាំឯណោះ។
មេដឹកនាំក្រុមអាវក្រហមថៃលោក Yosvaris Chuklom ប្រឈមមុខការជាប់ពន្ធនាគារ ១៥ឆ្នាំក្រោយពីតុលាការកំពូលថៃយល់ស្របតាមការសម្រេចរបស់សាលាដំបូងដោយកាត់ទោសលោកព្រោះហ៊ានប្រមាថព្រះមហាក្សត្រ។
យោងតាមទីភ្នាក់ងារព័ត៌មាន Reuters លោក Yasvaris ត្រូវបានគេស្គាល់ច្បាស់ថាជាមេដឹកនាំម្នាក់ក្នុងចំណោមក្រុមអ្នកស្មោះស្ម័គ្រក្រុមគ្រួសារស៊ីណាវ៉ាត្រា ដែលមានទាំងលោក ថាក់ស៊ីន និងលោកស្រីយីងឡាក់ដែលអ្នកទាំងពីរសុទ្ធតែត្រូវយោធាធ្វើរដ្ឋប្រហារទម្លាក់ពីតំណែងនោះ។
តាមពិតទៅសំណុំរឿងនេះមិនមែនជារឿងថ្មីឡើយ។ វាបានកើតឡើងតាំងពីឆ្នាំ ២០១០មកម្ល៉េះ ពោលគឺកើតឡើងក្រោយលោក Yosvaris ថ្លែងសារនយោបាយមួយនាឆ្នាំនោះដែលអាជ្ញាធរជឿជាក់ថា លោកមានគោលដៅវាយប្រហារលើព្រះមហាក្សត្រ។
ក្រោយមានការចោទប្រកាន់ លោក Yosvaris បានបកស្រាយថា លោកមិនបាននិយាយសំដៅលើអង្គព្រះមហាក្សត្រឡើយ ហើយលោកក៏ព្យាយាមអះអាងថាលោកគ្មានចេតនាប្រមាថព្រះមហាក្សត្រនោះឡើយ។ ប៉ុន្តែតុលាការសម្រេចថា កាយវិការរបស់អ្នកនយោបាយរូបនេះមានបង្កបអត្ថន័យមួយដែលប្រមាថមើលងាយព្រះមហាក្សត្រដែលមិនអាចមានអ្នកណាបំពារបំពារបាននោះ។
យ៉ាងណាក៏ដោយ ក្រោយតុលាការកំពូលសម្រេចចុងក្រោយនេះ លោក Yosvaris និងមេធាវីរបស់លោកផ្ទាល់មិនបានបកស្រាយអ្វីឡើយ។ វាប្រាកដណាស់ថា លោកគ្មានផ្លូវតវ៉ាប្រឆាំងការសម្រេចរបស់តុលាការកំពូលនេះឡើយ។
ចាប់តាំងពីរបបសឹកដណ្តើមអំណាចបានកាលពីឆ្នាំ ២០១៤ ការប្រើប្រាស់ច្បាប់ប្រមានថព្រះមហាក្សត្រកើតឡើងជាញឹកញយ ហើយអ្នករិះគន់រដ្ឋាភិបាលភាគច្រើនជាប់គុកដោយសារច្បាប់នេះ។ ហើយអ្វីដែលសំខាន់នោះ ក្រោយការសោយទិវង្គតរបស់ព្រះចៅភូមិបុល អាប់ឌុលយ៉ាដេត ការប្រើប្រាស់ច្បាប់នេះរឹតតែកើនឡើងខ្លាំងថែមទៀត៕
Tag:
មហាក្សត្រថៃ
Yosvaris Chuklom
© រក្សាសិទ្ធិដោយ thmeythmey.com