អន្តរជាតិ
ចលនាប្រឆាំងកូរ៉េខាងត្បូងកើនឡើងនៅចិន ក្រោយខែលមីស៊ីលអាមេរិកទៅដល់ឧបទ្វីបកូរ៉េ
× ការពង្រាយប្រព័ន្ធការពារមីស៊ីល THAAD ទៅកាន់ទឹកដីកូរ៉េខាងត្បូង បានធ្វើឲ្យចិនកាន់តែក្តៅក្រហាយខ្លាំង។ ចិនហៅការដំឡើងសព្វាវុធថាជាកំហុសឆ្គងមួយ ដែលវាបានធ្វើឲ្យភាពតានតឹងរវាងកូរ៉េខាងត្បូងនិងចិនកើនឡើងកាន់តែខ្លាំង ហើយមានចលនាអំពាវនាវឲ្យប្រជាជនចិនឈប់ប្រើប្រាស់ផលិតផលកូរ៉េខាងត្បូងទៀត។
ប្រព័ន្ធការពារមីស៊ីលអាមេរិកបានទៅឈរជើងកូរ៉េខាងត្បូងនៅថ្ងៃអង្គារទី ៧មីនាម្សិលមិញនេះ។ អាមេរិកបានសង្កត់ធ្ងន់ជាថ្មីថា ប្រទេសនៅក្នុងតំបន់មិនចាំបាច់ បារម្ភឡើយ ព្រោះការពង្រាយសព្វាវុធនេះជាវិធានការសម្រាប់រក្សាសន្តិសុខសុទ្ធសាធ។
ទោះមានការបញ្ជាក់បែបនេះក្តីចិនមិនបានស្តាប់ការបកស្រាយនោះឡើយ។ ក្នុងសន្និសីទសារព័ត៌មានមួយនាថ្ងៃពុធទី ៨មីនា រដ្ឋមន្ត្រីការបរទេសចិនលោក វ៉ាង យី (Wang Yi) បានហៅការសម្រេចចិត្តរបស់ក្រុងវ៉ាស៊ីនតោនក្នុងការបញ្ជូនសព្វាវុធទៅកូរ៉េខាងត្បូងថាជាកំហុសឆ្គងមួយ។
មន្ត្រីការទូតចិនរូបនេះបានបន្ថែមថា ទង្វើកូរ៉េខាងត្បូងនិងអាមេរិកនេះមិនខុសពីបង្កើតភាពស្មុគស្មាញបន្ថែមសម្រាប់បញ្ហាដែលអាក្រក់រួចទៅហើយឡើយ។ គេមើលឃើញថា ភាពតានតឹងរវាងចិននិងកូរ៉េខាងត្បូងដែលជាមិត្តជិតខាងនោះកាន់តែកើនឡើងគួរឲ្យបារម្ភក្រោយការប្រកាសបញ្ជូនប្រព័ន្ធមីស៊ីលនេះ។
ក្នុងនាមជាមហាអំណាចតំបន់ ចិនបានប្រាប់ទៅកូរ៉េខាងត្បូងថា ខ្លួនជំទាស់ដាច់ខាតចំពោះការដំឡើងសព្វាវុធរបស់អាមេរិកនៅជាប់ព្រំដែនរបស់ខ្លួនព្រោះខែលមីស៊ីលនេះមានបំពាក់រ៉ាដាដែលអាចមើលឃើញជ្រៅចូលដល់ទឹកដីចិន។ ហើយចិនបានព្រមានកូរ៉េខាងត្បូងផងដែរកន្លងមក។
កាលពីប៉ុន្មានសប្តាហ៍មុន ចិនបានសម្រេចបិទហាងផលិតផលក្រុមហ៊ុន Lotte របស់កូរ៉េខាងត្បូងដែលដំណើរការនៅចិន ក្រោយពេលដែលក្រុមហ៊ុននេះព្រមប្តូរដីជាមួយយោធាកូរ៉េខាងត្បូងដោយអនុញ្ញាតឲ្យគេដំឡើងប្រព័ន្ធការពារមីស៊ីលនេះ។
ដោយសារបញ្ហានេះ ប្រធានគណៈកម្មការទទួលបន្ទុកគោលនយោបាយនៃបក្សសេរីភាពដែលជាបក្សកាន់អំណាចកូរ៉េលោក Lee Hyun-jae បានបញ្ជាក់ថា កូរ៉េខាងត្បូងកំពុងពិចារណាដាក់ពាក្យប្តឹងចិន ទៅកាន់អង្គការពាណិជ្ជកម្មពិភពលោក ដើម្បីសងសឹកចិនផងដែរ។
មកដល់ពេលឥឡូវនេះ អ្វីដែលគេកំពុងតាមដានយ៉ាងយកចិត្តទុកដាក់នោះគឺចលនាប្រឆាំងកូរ៉េខាងត្បូងផុសផុលនៅក្នុងប្រទេសចិន។ សូម្បីប្រព័ន្ធផ្សព្វផ្សាយរដ្ឋចិនក៏បានអំពាវនាវឲ្យប្រជាជនចិនឈប់ប្រើប្រាស់ផលិតផលកូរ៉េខាងត្បូងថែមទៀតផង។
ចំណែកក្រុមហ៊ុនកូរ៉េខាងត្បូងនៅចិនខ្លះប្រឈមបញ្ហាដោយមានរបាយការណ៍ព័ត៌មានខ្លះផ្សាយថា ហាងកូរ៉េខាងត្បូងមួយចំនួនរងការវាយប្រហារតាមប្រព័ន្ធអ៊ីនធឺណិត, ហាងខ្លះទៀតត្រូវបិទទ្វារ និងខ្លះទៀតរងការផាកពិន័យផងដែរ៕
Tag:
ចិន
THAAD
កូរ៉េខាងត្បូង
វ៉ាង យី
អាមេរិក
© រក្សាសិទ្ធិដោយ thmeythmey.com