អន្តរជាតិ
ចង់ទម្លាក់លោក Duterte ពីកៅអីប្រធានាធិបតី ជារឿងមិនអាចទៅរួច? ប្រធានាធិបតីហ្វីលីពីន Rodrigo Duterte (កណ្ដាល) អមដោយប្រធានព្រឹទ្ធសភា Aquilino Pimentel III (ឆ្វេង) និងប្រធានរដ្ឋសភា Pantaleon Alvarez (ស្ដាំ) (រូបថតពីរដ្ឋាភិបាលហ្វីលីពីន)
× កាន់តំណែងបាន៩ខែ ប្រធានាធិបតីហ្វីលីពីន Rodrigo Duterte ក៏ប្រឈមមុខការដកហូតតំណែងពាក់ព័ន្ធសំណុំរឿងជាច្រើន។ សមាជិករដ្ឋសភាបក្ស Magdalo លោក Gary Alejano បានដាក់ពាក្យបណ្ដឹងប្រឆាំងលោក Duterte ទៅកាន់សភា ដោយចោទប្រធានាធិបតីថាបានរំលោភរដ្ឋធម្មនុញ្ញ, ជាប់ពាក់ព័ន្ធករណីសូកប៉ាន់, ប្រព្រឹត្តអំពើពុករលួយ និងឧក្រិដ្ឋកម្មកម្រិតខ្ពស់មួយចំនួនទៀត។ គណៈកម្មាធិការសភា នឹងពិនិត្យមើលបណ្ដឹងនេះ មុននឹងចាប់ផ្ដើមដំណើរការតាមផ្លូវច្បាប់ ដែលត្រូវឆ្លងកាត់ការបោះឆ្នោតនៅសភាទាំងពីរជាន់ជាកន្លែងដែលសម្ព័ន្ធមិត្តលោក Duterte ក្ដោបក្ដាប់សំឡេងភាគច្រើន។
សមាជិករដ្ឋសភាហ្វីលីពីន Gary Alejano បានដាក់ពាក្យបណ្ដឹងប្រឆាំងប្រធានាធិបតី Duterte នៅថ្ងៃទី១៦ ខែមីនា នៅឯរដ្ឋសភាហ្វីលីពីន។ ពាក្យបណ្ដឹងនេះ បានចោទលោក Duterte ជាច្រើនករណីរួមមានទាំងការបង្កើតក្រុមឃាតករសម្ងាត់, សង្គ្រាមប្រឆាំងគ្រឿងញៀនដែលនាំទៅដល់ការសម្លាប់មនុស្សក្រៅប្រព័ន្ធតុលាការរាប់ពាន់នាក់, ការមិនលម្អិតព័ត៌មានទឹកប្រាក់រាប់លានពឺសូ និងទ្រព្យសម្បត្តិដែលមិនប្រកាសជាច្រើនទៀត។
យ៉ាងណាក្ដី យោងតាមសារព័ត៌មាន Rappler វិមានប្រធានាធិបតី Malacañang បញ្ជាក់ថា ពាក្យបណ្ដឹងលើកដំបូងនេះ គ្មានមូលដ្ឋានច្បាស់លាស់ដែលអាចឈានទៅដល់ការបោះឆ្នោតទម្លាក់លោក Duterte ពីតំណែងប្រធានាធិបតីបានឡើយ។ អ្នកនាំពាក្យប្រធានាធិបតី Ernesto Abella បាននិយាយក្នុងសន្និសីទកាសែតថា លោក Duterte មិនបានក្បត់ជាតិ, មិនបានបំពានទំនុកចិត្តរបស់ប្រជាជន ហើយក៏មិនបានប្រព្រឹត្តអំពើពុករលួយ សូកប៉ាន់ ឬក៏បំពានរដ្ឋធម្មនុញ្ញដែរ។
លើសពីនេះ អ្នកនាំពាក្យដដែលនេះ បានហៅពាក្យបណ្ដឹងនេះថាជាផ្នែកមួយនៃផែនការ ដែលរៀបចំឡើងដើម្បីបំបាក់មុខមាត់រដ្ឋបាលលោកប្រធានាធិបតី Duterte ទៅវិញ។ លោក Abella ក៏បញ្ជាក់ដែរថា ការសម្លាប់មនុស្សក្រៅប្រព័ន្ធតុលាការ មិនមែនជាស្នាដៃរបស់រដ្ឋាភិបាលដូចការចោទប្រកាន់ឡើយ ហើយលោក Duterte ក៏មិនមែនធ្វើមិនដឹងមិនលឺរឿងនេះដែរ ដោយលោកនឹងចាត់វិធានការស្វែងរកជនល្មើសមកកាត់ទោសឲ្យបាន ព្រោះគ្មាននរណាធំជាងច្បាប់ឡើយ។
យ៉ាងណាមិញ មន្ត្រីជាន់ខ្ពស់រដ្ឋបាលលោក Duterte ខាងលើ ហាក់សង្ស័យសមត្ថភាពរបស់គណបក្ស Magdalo ក្នុងការប្រមូលកម្លាំងសមាជិកសភា និងកងទ័ពដើម្បីផ្ដួលលោក Duterte ពីតំណែងប្រធានាធិបតី។ Magdalo ជាបក្សតូចមួយ ដែលមានសមាជិកភាគច្រើនមកពីក្រុមយោធា និងដឹកនាំដោយសមាជិកព្រឹទ្ធសភា Antonio Trillanes IV ដែលជាអ្នករិះគន់លោក Duterte មិនសំចៃមាត់នោះឡើយ។
ចង់ទម្លាក់លោក Duterte ដូចយកពងមាន់ជល់នឹងថ្ម?
បើតាមរដ្ឋធម្មនុញ្ញហ្វីលីពីនឆ្នាំ១៩៨៧ មានមូលហេតុច្រើនដែលអាចធ្វើជាមូលដ្ឋានដើម្បីឈានដល់ការបោះឆ្នោតទម្លាក់តំណែងប្រធានាធិបតី។ ទោសក្បត់ជាតិ, ការសូកប៉ាន់, អំពើពុករលួយ និងបទឧក្រិដ្ឋកម្រិតខ្ពស់ ឬការក្បត់ទំនុកចិត្តប្រជាជន សុទ្ធតែជាអំពើដែលអាចធ្វើឲ្យប្រធានាធិបតី អស់តំណែងខ្ពង់ខ្ពស់នេះបាន។
មាត្រា២ រដ្ឋធម្មនុញ្ញហ្វីលីពីនចែងថា៖ «ប្រធានាធិបតី, អនុប្រធានាធិបតី, សមាជិកតុលាការធម្មនុញ្ញ, សមាជិកគណៈកម្មការធម្មនុញ្ញ និងបេសកជនពិសេស អាចត្រូវបានបណ្ដេញចេញពីតំណែង ដោយការបោះឆ្នោតទម្លាក់ ប្រសិនបើប្រព្រឹត្តទោសទាំងអម្បាលម៉ានខាងលើ។»សមាជិករដ្ឋសភា និងប្រជាជនហ្វីលីពីនណាម្នាក់ សុទ្ធតែអាចប្ដឹងទម្លាក់មន្ត្រីទាំងអស់ខាងលើ ហើយមន្ត្រីទាំងនោះ អាចទទួលបណ្ដឹងប្រឆាំងខ្លួនបានមួយប៉ុណ្ណោះក្នុងមួយឆ្នាំ។
នៅរដ្ឋសភា ប្រសិនបើសមាជិកមួយភាគបីនៃរដ្ឋសភាយល់ព្រមលើបណ្ដឹង ទើបបណ្ដឹងនោះអាចបញ្ជូនបន្តទៅកាន់ព្រឹទ្ធសភា។ សមាជិករដ្ឋសភាហ្វីលីពីនមានចំនួន២៩២នាក់ ហើយក្នុងនោះ២៦៧នាក់ ជាសម្ព័ន្ធមិត្តរបស់លោក Duterte ដែលសូម្បីតែប្រធានរដ្ឋសភា ក៏មកពីបក្សតែមួយជាមួយលោក Duterte ដែរ។ ដូចនេះច្បាស់ណាស់ថា ពាក្យបណ្ដឹងនេះ មិនអាចឆ្លងកាត់ដំណាក់កាលនេះបានឡើយ ព្រោះអ្នកគាំទ្រលោក Duterte មានលើសពាក់កណ្ដាលទៅហើយ។
ក្នុងករណីបណ្ដឹងរបស់លោក Gary Alejano មានវាសនាឆ្លងផុតរដ្ឋសភា ព្រឹទ្ធសភាហ្វីលីពីន នឹងសម្រេចចិត្តលើបណ្ដឹងនេះម្ដង។ ព្រឹទ្ធសភា នឹងបើកសវនាការមួយកាត់ក្ដី ហើយដោយសារជាបណ្ដឹងប្រឆាំងប្រធានាធិបតី ប្រធានតុលាការកំពូល នឹងធ្វើជាប្រធានអង្គជំនុំជម្រះ។ សមាជិកព្រឹទ្ធសភា នឹងបោះឆ្នោតថាត្រូវដកតំណែងប្រធានាធិបតី ដោយសំឡេងពីរភាគបីនៃសមាជិកទាំង២៤នាក់ តែបើគ្មានសំឡេងគ្រប់គ្រាន់ទេ បណ្ដឹងនេះមិនយកជាការឡើយ។
ជាការពិត បើយោងតាមចំនួនសម្ព័ន្ធមិត្តលោក Duterte ទាំងនៅរដ្ឋសភា និងព្រឹទ្ធសភា បណ្ដឹងប្រឆាំងនេះ ទំនងជាមិនមានប្រយោជន៍ឡើយ។ មួយទៀត លោក Gary Alejano ទំនងជាមិនអាចប្រមូលសំឡេងគ្រប់គ្រាន់ដើម្បីទម្លាក់ប្រធានាធិបតី Duterte ដែរ បើគ្មានការចូលរួមពីសមាជិកដទៃទៀត។ ការព្យាយាមរបស់លោកអាចត្រឹមជាការយកពងមាន់ទៅជល់ថ្មប៉ុណ្ណោះ៕
Tag:
ហ្វីលីពីន
Rodrigo Duterte
© រក្សាសិទ្ធិដោយ thmeythmey.com