ជាតិ
ខ្មែរទទួលលុយជប៉ុនជាង ១០០លានដុល្លារ នៅរសៀលថ្ងៃទី៣០មីនានេះ
× ភ្នំពេញ៖ កម្ពុជា នឹងទទួលថវិកាប្រមាណ ១៤០លានដុល្លារអាមេរិកពីរដ្ឋាភិបាល និងប្រជាជនជប៉ុន នៅរសៀលថ្ងៃទី៣០ ខែមីនានេះ។
ក្រសួងការបរទេស និងសហប្រតិបត្តិការអន្តរជាតិ បានជូនដំំណឹងថា ពិធីចុះហត្ថលេខាផ្ដល់ និងទទួលហិរញ្ញប្បទានឥតសំណង និងឥណទានសម្បទាននេះ នឹងប្រព្រឹត្តិក្រោមវត្តមានសម្តេចនាយករដ្ឋមន្ត្រី ហ៊ុន សែន, លោក ប្រាក់ សុខុន រដ្ឋមន្ត្រីក្រសួងការបរទេស,លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, លោក យូអ៊ីជី ស៊ូហ្គាណូ (Yuichi SUGANO) ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA)ប្រចាំកម្ពុជា និង ឯកអគ្គរាជទូតជប៉ុនប្រចាំកម្ពុជាលោក ហូរីណូអ៊ុជិ ហ៊ីដេហ៊ីសា (HORINOUCHI Hidehisa) ។
តាមក្រសួងការបរទេស កម្ពុជានឹងយកថវិកាសម្រាប់អនុវត្តគម្រោងចំនួន ៤ ក្នុងនោះ រួមមាន គម្រោងការពារទឹកជំនន់ដំណាក់កាលទី៤ ក្នុងរាជធានីភ្នំពេញ ដែលមានថវិកាចំនួន ១០៩ លានយ៉េន ស្មើនឹងប្រមាណ ៩៤៩.៩៧៣ ដុល្លារ, គម្រោងកែលម្អមន្ទីរពេទ្យបង្អែកខេត្តបាត់ដំបងមានថវិកាចំនួន ១.៤៥៣ លានយ៉េន ស្មើនឹងប្រមាណ ១២,៦៦ លានដុល្លារអាមេរិក, គម្រោងកែលម្អផ្លូវជាតិលេខ៥ ពីក្រុងបាត់ដំបង ដល់ក្រុងសិរីសោភ័យ ជំហានទី២មានថវិកាឥណទានសម្បទានចំនួន ១១.១៣៦ លានយ៉េនស្មើនឹងប្រមាណ ៩៨ លានដុល្លារ និងគម្រោងពង្រីកប្រព័ន្ធផ្គត់ផ្គង់ទឹកស្អាតក្នុងខេត្តកំពង់ធំដែលមានថវិកាចំនួន ៣.២៧១ លានយ៉េន ស្មើនឹងប្រមាណ ២៨,៥ លានដុល្លារអាមេរិក។
«ប្រទេសជប៉ុនគឺជាដៃគូដ៏សំខាន់បំផុតមួយរបស់កម្ពុជា ហើយបានរួមចំណែកជាច្រើនក្នុងការអភិវឌ្ឍសេដ្ឋកិច្ច សង្គម និងហេដ្ឋារចនាសម្ព័ន្ធនៅកម្ពុជា»។ ក្រសួងការបរទេសបញ្ជាក់ក្នុងសេចក្តីជូនដំណឹង នៅថ្ងៃទី២៩ មីនានេះ មុនរំពឹងបន្ថែមថា គម្រោងនេះនឹងជួយកែលម្អតំបន់តភ្ជាប់របស់កម្ពុជា និងជួយជីវភាព រួមទាំងសុខភាពប្រជាជនឲ្យកាន់តែប្រសើរឡើង៕
Tag:
ហ៊ុន សែន
ប្រាក់ សុខុន
HORINOUCHI Hidehisa
JICA
ជំនួយ
ជប៉ុន
© រក្សាសិទ្ធិដោយ thmeythmey.com