ដូណាល់ ត្រាំ តែងតាំងកូនស្រីបង្កើតជាទីប្រឹក្សា តែមិនឲ្យប្រាក់ខែ

អន្តរជាតិ

ដូណាល់ ត្រាំ តែងតាំងកូនស្រីបង្កើតជាទីប្រឹក្សា តែមិនឲ្យប្រាក់ខែ

30, Mar 2017 , 9:59 pm

រូបភាព

ប្រធានាធិបតី ដូណាល់ ត្រាំ និងកូនស្រី Ivanka Trump ដែលទើបទទួលការតែងតាំងជាជំនួយការ (រូបភាព Xinhua)

ដោយ: តន ចាន់រិទ្ធារ៉ា

កូនស្រីបង្កើតរបស់ប្រធានាធិបតីអាមេរិក ដូណាល់ ត្រាំ គឺនាង Ivanka Trump ត្រូវបានតែងតាំងជាមន្ត្រីក្នុងរដ្ឋាភិបាលរបស់ឪពុកនាងហើយ។ Ivanka ក្លាយជាទីប្រឹក្សាប្រធានាធិបតីនៅឯសេតវិមាន ប៉ុន្តែនាងមិនទទួលបានប្រាក់ខែឡើយ។ ការតែងតាំងនេះ ធ្វើឡើងក្រោយស្វាមីរបស់នាង គឺលោក Jared Kushner ទើបត្រូវបានតែងតាំងជាប្រធានការិយាល័យច្នៃប្រឌិតរបស់សេតវិមាន បន្ថែមពីលើតំណែងទីប្រឹក្សាជាន់ខ្ពស់សម្រាប់លោក ត្រាំ ជាឪពុកក្មេកនោះ។

កូនស្រីរបស់ប្រធានាធិបតី ដូណាល់ ត្រាំ ដែលតែងនៅពីក្រោយការងារដឹកនាំរបស់ឪពុក បានទទួលតំណែងជាផ្លូវការហើយ។ សេតវិមាន នៅថ្ងៃទី២៩ ខែមីនា បានប្រកាសថា Ivanka Trump ត្រូវបានតែងតាំងជាទីប្រឹក្សារបស់លោក ត្រាំ បើទោះជានាងមិនធ្លាប់មានបទពិសោធន៍ពាក់ព័ន្ធកិច្ចការរដ្ឋបាលអ្វីសោះក៏ដោយ។ យ៉ាងណាក្ដី Ivanka នឹងមិនទទួលបានប្រាក់កំរៃអ្វីទេចំពោះតួនាទីថ្មី ដែលនាំឲ្យនាងចូលកាន់តែកៀកកិច្ចការដឹកនាំប្រទេសរបស់លោក ត្រាំ ។

តាមពិតទៅ នៅមុនការតែងតាំងនេះ Ivanka បានចូលរួមក្នុងកិច្ចការប្រចាំថ្ងៃរបស់ឪពុករួចស្រេចទៅហើយ។ គេឃើញមានវត្តមានរបស់នាងក្នុងជំនួបរវាងលោក ត្រាំ និងបណ្ដាមេដឹកនាំពិភពលោកជាច្រើនដូចនាយករដ្ឋមន្ត្រីជប៉ុន ស៊ីនហ្សូ អាបេ, អធិការបតីអាល្លឺម៉ង់ Angela Merkel និងនាយករដ្ឋ មន្ត្រីកាណាដា Justin Trudeau ជាដើម។ វត្តមានក្នុងជំនួបទាំងនេះ ធ្វើឲ្យគេបារម្ភខ្លាំង ព្រោះនាងមិនមានតំណែងអ្វីសោះក្នុងរដ្ឋាភិបាល។

ជាមួយនឹងការតួនាទីជាទីប្រឹក្សាឪពុក Ivanka នឹងមានលទ្ធភាពកាន់តែច្រើនក្នុងការលូកដៃចូលក្នុងការងារដឹកនាំប្រទេសមហាអំណាចពិភពលោកមួយនេះ។ បើតាមសារព័ត៌មាន CNN កូនស្រីច្បងលោក ត្រាំ ក៏ដឹងថាមានការព្រួយបារម្ភច្រើនទាក់ទងនឹងការចូលមកលូកលាន់កិច្ចការរបស់ឪពុកនាង ហើយដោយសាររឿងនេះ ទើបនាងសុខចិត្តធ្វើជាជំនួយការមិនយកប្រាក់ខែ និងអនុវត្តតាមបញ្ញត្តិទាំងឡាយដូចមន្ត្រីទាំងឡាយដែរ ដើម្បីចៀសវាងការបង្កទំនាស់ផលប្រយោជន៍។

ការតែងតាំងនេះក៏មានន័យថា ទាំង Ivanka ទាំងប្ដីរបស់នាង Jared Kushner សុទ្ធតែជាមន្ត្រីនៃរដ្ឋាភិបាលរបស់់ឪពុកនាងទាំងអស់។ លោក Kushner កាន់តំណែងទីប្រឹក្សាជាន់ខ្ពស់ ទើបទទួលបន្ទុកការងារថ្មីនៅការិយាល័យច្នៃប្រឌិត ដែលមិនទទួលប្រាក់ខែដូចគ្នា។ ប៉ុន្តែការតែងតាំងកូនខ្លួនឯងជាមន្ត្រីដូចនេះ ក៏ធ្វើឲ្យមានការព្រួយបារម្ភរឿងបក្សនិយមដែរ បើទោះជាច្បាប់អនុញ្ញាតឲ្យប្រធានាធិបតីតែងតាំងកូនៗ និងសាច់ញាតិសម្រាប់តំណែងថ្នាក់ទាបក៏ដោយ។

ក្រៅពីទំនាស់ផលប្រយោជន៍ និងបក្សពួកនិយម ការតែងតាំងនេះ ក៏បង្កការព្រួយបារម្ភជុំវិភាពមិនច្បាស់លាស់របស់លោក ត្រាំ ក្នុងការបែងចែកឲ្យដាច់រវាងការងារគ្រួសារ និងកិច្ចការប្រទេសជាតិ។ Ivanka បានដល់ខ្លួនចេញពីមុខជំនួញរបស់ខ្លួនកាលពីខែមករា និងបានរួមចំណែកមិនផ្ទាល់ក្នុងការជួយការងារលោក ត្រាំ ។ ឯលោក ត្រាំ ផ្ទាល់ ក៏ប្រកាសមិនពាក់ព័ន្ធការងាររកស៊ីរបស់ក្រុមហ៊ុនលោកដែរ និងទុកឲ្យកូនៗរបស់លោក ជាអ្នកចាត់ចែងជំនួញនេះ អំឡុងពេលលោកធ្វើជាប្រធានាធិបតី៕